Bansonga, Mbinganyi Bidi Bipatshila Bienu Bia Mu Nyuma?

¹ Yehowa mmumanye mushindu utu mudimu musankishi ne bipatshila bitekela bantu bonso bipetesha diakalenga. (Tangila Genese 1:28; 2:15, 19.) Mu matuku etu aa, udi upesha basadidi bende bukenji bua kuyisha ne kulongesha. Tudi kabidi ne tshipatshila tshia ndekelu tshia kupeta muoyo wa kashidi mu Mparadizu. Mu dindila, tudi ne bua kudifundila bipatshila bia mu nyuma bidi bilubuluka bituajinga kutumika bimpe ne makanda etu ne bintu bietu.​—⁠1 Kol. 9:⁠26.

² Bipatshila bia meji bua bansonga: Bansonga badi ne bua kuikala ne bipatshila bia teokrasi biakanangane ne makokeshi abu buobu bine. (1 Tim. 4:15) Bana batekete mbafike ku tshipatshila tshia kumanya mêna a mikanda yonso ya mu Bible kabayi nansha banji kumanya mua kubala. Ku diambuluisha dia dilonga dia mu dîku, bana badi balonga mua kulongolola bisangilu mu tshipatshila tshia kufila mandamuna a meji ne kudifundisha mu Kalasa ka Mudimu wa Teokrasi. Mu difila baledi babu mu buambi, badi balonga mua kuenza mudimu wa bumanyishi ne badi balubuluka bua kulua bamanyishi bakena batambule. Mbimpe bua baledi kuikalabu bakula pa tshibidilu ne bana babu batekete bua tshipatshila tshia didilambula ne tshia batismo.

³ Biwikala mupiankunde, mbipatshila kayi bia mu nyuma biudi udifundila? “Uvuluke Mufuki webe” pa kuteka ntema yebe pa bipatshila bidi ne mushinga bushuwa mu nsombelu. (Muam. 12:1; Mus. 71:17) Bua tshinyi kubenga kuikala mpanda-njila muambuluishi mu diikisha dia tulasa? Ukadiku muele meji bua kuenza mudimu wa ku dîba ne ku dîba pa kuikala mpanda-njila wa pa tshibidilu anyi? Udi wela meji kayi bua dilonga dia muakulu muenyi bua kupeta mushindu wa kuambuluisha mu matuku adi kumpala kasumbu kakese peshi tshisumbu tshidi tshiakula muakulu muenyi, mu tshimenga tshienu anyi muaba mukuabu? Ku bana betu balume ne bakaji badi basadila mpindieu ku Betele peshi badi batangidi bena ngendu anyi ba-misionere, bavule bakadifundila tshipatshila tshia mudimu wa ku dîba ne ku dîba patshivuabu mu kalasa. Bua tshinyi kubenga kuenza pebe bia muomumue?

⁴ Nuenu batshidi bana batekete, dienzejayi bua kuidikija tshilejilu tshia Yezu. Pavuaye ne bidimu 12, ukavua wakula pa tshibidilu bua malu a mu nyuma. (Luka 2:​42-49, 52) Pa kudifundila bipatshila bimpe bianusaka bua kuikala ne dilonga dia muntu pa nkayende, bua kubala Bible dituku dionso ne bua kukeba bunyana bua bena nkristo bapie dîba dia bisangilu ne dia buambi, nenupete dishidimuna dianuambuluisha bua kulongesha bakuabu pa bidi bitangila Bukalenge bua Nzambi, bu muakenza Yezu.