Mapangadika mapiamapia bua bilaminu bia mikanda bia ku Nzubu wa Bukalenge
Kukadi bidimu bia bungi mpindieu bidi bisumbu bia pa buloba bujima bikale ne tshilaminu tshia mikanda tshia ku Nzubu wa Bukalenge tshivuabu babikila kumpala ne: tshilaminu tshia mikanda tshia Kalasa ka Mudimu wa Teokrasi. Kale bavua bamona ne: bivua bikengela bua tshisumbu tshionso kuikalatshi ne tshiatshi tshilaminu tshia mikanda. Kadi bu mukadi mpindieu mu Nzubu ya Bukalenge ya bungi bisumbu bivule bienzelamu bisangilu, bimue bia kudibi bikale bia miakulu mikuabu, bidi bimueneka biakanyine bua kuikala ne tshilaminu tshia mikanda anu tshimuepele tshidi ne mikanda yonso mipiamipia mu Nzubu wa Bukalenge yonso, muakulu wonso udi bisangilu bienzekela ne tshilaminu tshimuepele. Bua Nzubu wa Bukalenge udi ne Nzubu mikuabu ya Bukalenge ibidi anyi ya bungi munda, Nzubu wa Bukalenge yonso wa munda udi ne bua kuikala ne tshiende tshilaminu tshia mikanda bilondeshile bungi bua miakulu ya bisumbu bitu bibuelamu.
Tudi batekemene se: dipangadika edi nediambuluishe bua kulobelela muaba ne makuta. Kabidi, padibu batutakaja bilaminu bia mikanda bia bisumbu bibidi peshi bia bungi, badi bapeta bilaminu bimpe bitambe bia mikanda. Padibu babisangisha nunku, badi mua kulama mikanda mikuabu ya pa mutu bua kulua kuyangata bua kuyela mu tshilaminu tshipiatshipia tshikondo tshikalabu bibake Nzubu ya Bukalenge mipiamipia. Padi mu Nzubu wa Bukalenge muikale ordinatere ne Watchtower Library (ditadi dia CD-ROM didi ne Tshilaminu tshia mikanda ya Bantemu ba Yehowa), bidi mua kuambuluisha bantu bakuabu bikole.
Tshilaminu tshia mikanda tshia ku Nzubu wa Bukalenge yonso netshikale ne muanetu umue (nangananga mutangidi wa Kalasa ka Mudimu wa Teokrasi) wikala utshitangila. Neikale usakidila misangu yonso mikanda idi ikengedibua, ufunda tu-miaku tukumbanyine pa tshizubu tshia munda mua mukanda wonso tudi tuleja ne: eu mmukanda wa mu tshilaminu tshia mikanda tshia ku Nzubu wa Bukalenge. Musangu nansha umue ku tshidimu, neikale ubalulula mikanda ya mu tshilaminu tshia mikanda bua kumanya ni mukanda nansha umue ki mmujimine ne bikalayi yonso ni idi mimpe. Kabapatuki ne mikanda ya mu bilaminu ebi pambelu pa Nzubu wa Bukalenge to.
Bantu bonso ba mu tshisumbu batu banyisha tshilaminu tshia mikanda tshia ku Nzubu wa Bukalenge bikole. Tulejayiku ne: tudi petu tuangata ndongoluelu eu ne mushinga pa kukuba bilaminu ebi ne kuenza makebulula ne mikanda eyi bua kupeta “dimanya dia malu a Nzambi.”—Nsu. 2:5.