Mvuadilu muakane udi uleja kanemu kudi Nzambi

1. Mmunyi mutudi mua kuleja dianyisha bua mpungilu wetu wa distrike udi kumpala eku?

¹ Matuku makese kumpala eku, netuikale ne diakalenga dia Yehowa kutuakidilaye bu benyi bende mu Mpungilu wa Distrike wa “Tutumbishayi Nzambi” wa tshidimu tshia 2003. Bushuwa, tudi ne dianyisha dia bungi bua mudi Yehowa utubikila mu difesto dia mu nyuma edi! Tudi mua kuleja ne: tudi tumutshina ne tudi ne dianyisha bua biakudia bia mu nyuma ku mushindu wetu wa mvuadilu ne ndengejilu wetu wa mubidi.​—Mus. 116:12, 17.

2. Bua tshinyi bidi ne mushinga bua tuetu kuikala ne mankenda ne kudilengeja mubidi bimpe?

² Mankenda ne bulongame: Mmuenekelu wetu udi ne bua kuleja ne: tudi tunemeka mikenji ya Nzambi wetu udi mukezuke ne wa bulongame. (1 Kol. 14:33; 2 Kol. 7:1) Mubidi wetu, nsuki ne nzadi bidi ne bua kuikala ne mankenda, ne tudi ne bua kudilengeja bimpe. Lelu’eu, bantu ba bungi badi ne mvuadilu ne nsuki bivuandulukangane. Kadi patudi tumona muntu munene kampanda wa mu filme ta muntu udi tshilobo tshia mu manaya muikale ne bilamba ne nsuki bilekelelangana, ki nkabingila bua muena Kristo kulondaye mmuenekelu wende to. Tuetu bikale tulonda miodela, bantu badi mua kupeta lutatu lua kumona dishilangana pankatshi pa badi basadila Nzambi ne badi kabayi bamusadila.​—Mal. 3:18.

3. Mmunyi mutuikala mua kujadika ne: mmuenekelu wetu udi upetangana ne mibelu mifila mu 1 Tim. 2:9, 10?

³ Mvuadilu udi muakanyine bua basadidi bena Kristo: Pavua mupostolo Paulo mufundile Timote mutangidi muena Kristo, wakabela ‘bakaji bua bikale ne mvuadilu muakane, wa kanemu ne bupuekele; bikale ne nsombelu mulenga wa bakaji badi banemeka [Nzambi].’ (1 Tim. 2:9, 10, MMM) Bua kuikala bajadike ne: bilamba bietu mbilongolola bimpe, bidi bikengela kuela meji bimpe. Bilamba bietu bidi ne bua kuikala bia mankenda ne budipope; kabikadi bia kudileja nabi anyi bidi bijula bantu bakuabu majinga mabi to.​—1 Pet. 3:3.

4, 5. Mmibelu kayi idi idimuija idi balume ne bakaji bena Kristo ne bua kulonda?

⁴ Paulo wakadimuija kabidi bantu bua kabanekeshi ne ‘nsuki miluka bipia; ne ngolo ne mabue ne [bilamba] bia mushinga mupite bungi.’ (1 Tim. 2:9) Kuikala ne nkatshinkatshi mu divuala dia bikanu, mu bilabu ne bintu bikuabu mbualu bua meji bua bakaji bena Kristo kulondabu.​—Nsu. 11:2.

⁵ Mibelu ivua Paulo mupeshe bakaji bena Kristo idi kabidi dîyi dia kulonda kudi balume bena Kristo. Bana betu ba balume badi ne bua kuepuka mvuadilu udi uleja lungenyi lua bena panu. (1 Yone 2:16) Tshilejilu, mu matunga makuabu batu basue kuvuala mabomba anyi bilamba bibapite bunene, kadi mvuadilu wa nanku kena umueneka muakanyine bua musadidi wa Nzambi to.

6. Bua tshinyi tudi ne bua kuikala tshilejilu tshimpe mu mvuadilu wetu ne ndengejilu wa mubidi patudi mu luendu batangile ku mpungilu ne patudi tukufuma, patudi mu mpungilu muine ne dituku dionso kunyima kua mpungilu?

⁶ Patudi mu malu etu makuabu: Patudi mu mpungilu, bana betu ba bungi batu bafila tshilejilu tshimpe bua bidi bitangila mvuadilu ne dilengeja mubidi. Kadi luapolo itudi bapete idi ileja ne: bamue kabatu batabalela bualu ebu dîba didibu benza luendu bua kuya ku mpungilu anyi kukufuma ta padibu mu malu abu makuabu kunyima kua mpungilu. Bushuwa, mmuenekelu wetu udi ne buenzeji bukole pa mushindu udi bakuabu bangata bantu ba Nzambi. Bu mututu tuvuala tubeji tuetu tua tumanyishilu, tudi ne bua kuvuala misangu yonso mu mushindu udi muakanyine bua basadidi bena Kristo. Bitu bisaka bantu bakuabu bua kutuela kalumbandi ne bitupetesha mushindu wa kuyisha bantu.​—1 Kol. 10:31-33.

7. Mvuadilu wetu muakane ne dilengeja mubidi bidi mua kuenzela bakuabu tshinyi?

⁷ Anu bu mutu ditua mimuemue dilengeja mpala yetu, mvuadilu muakane ne didilengeja bidi binemesha mukenji utudi tuenda nawu ne bulongolodi butudi bikale baleji-mpala babu. Bamue bantu batumona mu Mpungilu wa Distrike wa “Tutumbishayi Nzambi” tshidimu etshi badi mua kufika ku didiebeja bua tshinyi tudi bashilangane ne bakuabu ne ku diamba pamuapa ne: ‘Tudi basue kuya nenu, bualu bua tuakumvua ne: Nzambi udi nenu.’ (Zek. 8:23) Tuetu bonso tulejayiku muntu ne muntu mutudi tutshina Yehowa ku mvuadilu wetu ne dilengeja mubidi.

[Kazubu mu dibeji 5]

Wikale ne mmuenekelu wa bunême

▪ Paudi wenza luendu

▪ Ku mpungilu

▪ Paudi mu malu ebe makuabu