Ikala tshilejilu mu malu mimpe
1. Bua tshinyi bidi bikengela bua tuetu kutabalela bikadilu bietu mu mpungilu wa distrike?
1 Patudi tudisangisha bantu ba bungi mu mpungilu ya distrike, bantu badi batutangila batu nangananga bamona bienzedi bietu ne mushindu utudi tusomba ne bakuabu. Nunku tuetu bonso tudi ne bua kutuma ntema mikole ku mubelu wa mu Bible wa ‘kuikala ne lungenyi ne kuikala tshilejilu tshia midimu mimpe mu malu onso.’ (Tito 2:6, 7) Bidi mua kulomba bua tuenze kabidi bukole bua ‘muntu ne muntu katangidi malu ende nkayawu, kadi muntu ne muntu atangile kabidi malu a bakuabu.’ (Filip. 2:4) Tutangilayi imue nsombelu itudi mua kutumikila mêyi adi akankamija aa mu Mpungilu wa Distrike wa “Tutumbishayi Nzambi” udi ulua kumpala eku.
2. Mbualu kayi butudi ne bua kulama mu lungenyi bua bidi bitangila miaba ya kutudila?
2 Miaba ya kutudila: Mushindu mutambe bulenga wa tuetu kuleja malu mimpe ngua bualu budi butangila miaba ya kutudila. Pa tshibidilu, aba batu balomba miaba ya kutudila patudi tshikondo tshia mpungilu, batu babateka ku nzubu ya bana betu badi bunzulula biibi biabu bua kuakidila badi balua ku mpungilu. Kadi bakuabu badi mua kusungula bua kutudila mu balela babu ne tshipatshila tshia kubamanyisha lumu luimpe ne kubabikila bua kuluabu pabu mu mpungilu. Bualu ebu mbua kubelela kalumbandi kakole. Mu nsombelu yonso ibidi eyi, bidi nangananga ne mushinga bua tuetu kuleja lungenyi luakane ne mamuma a nyuma wa Nzambi. (Gal. 5:22, 23) Mu mishindu ayi yonso, katuena ne bua kunemejila badi batuakidila bujitu bua ditula makuta to. Kumpala kua kulua ku mpungilu, nebikale bualu buimpe tuetu bakebe mushindu wa kupeta bietu biakudia ne makuta a njila pikalabi bikengedibua nanku mu matuku a mpungilu. Katuena nansha ne bua kunangidila muoyo wabu muimpe wa diakidilangana e kuvudija patupu matuku etu a disomba ku mabu pikala mpungilu mumane kupita bua kuenza malu etu nkayetu to. Mushindu eu ke utuabaleja kanemu ne kubangata ne mushinga bua muoyo wabu muimpe.
3. Mmushindu kayi utudi mua ‘kuenzela bantu bonso bimpe’ ku nzubu kudibu batuakidile?
3 Tudi ne bua kuvuluka ne: muaba utudi batudile, tudi benyi, nenku bidi bitulomba bua kuleja kanemu bua malu adi atangila anu bena ku nzubu nkayabu ne bua bintu biabu. Kabiakuikala biakanyine bua kulenga tshintu ta kuangata bintu padi muena ku nzubu kayi mutuanyishile to. Mu matuku adibu batuteka au, nebikale bualu buimpe tuetu mua kuenzaku petu midimu ya ku nzubu bu mudi disukula mu nzubu ne bintu bikuabu bidimu ne dibilama ne mankenda ne bulongame. Patudi tumuka, tuikale bajadike ne: katuena bashile muena nzubu mudimu mukuabu wa kukuataye bualu tuvua batudile kuende to. Mêyi a Yezu adi mu Matayo 7:12 adi aleja tshidi ne bua kutulombola mu nsombelu eu. Pa kuenza nanku tudi ‘tuenzela bantu bonso bimpe’ ne tufila bumanyishi buimpe kudi bakuabu.—Gal. 6:10.
4, 5. Mmushindu kayi udi bana mua kutumbisha Yehowa, ne mbujitu kayi budi nabu baledi?
4 Baledi ne bana: Bana batudi balele badi bamueneka bashilangane ne bansonga ba bungi ba panu badi bapange malu, nenku bidi bitumbishisha Yehowa ne bulongolodi buende. Kadi imue misangu bilumbu bikadi bijuke pavuabu kabayi batabalele bana bimpe. (Nsu. 29:15) Baledi kabena ne bua kulekelela bana babu muaba udi mpungilu wenzekela to. Tshianana badi batuadija kuendakana dîba didi mpungilu wenzeka, kabayi bateleja, benza mutoyi tshianana tshianana ne benza aba badi ne dijinga dia kuteleja ditanaji. Kabena ne bua kubalekela basesa misangu ne misangu ku nkumba padi mpungilu wenzeka to. Muledi udi ne bua kufila muana ku nkumba padibi bikengela. Bana badi ne bua kusomba pamue ne baledi babu, muana yonso ne Bible, ne kaye kende ka kufundila mvese, ke tshiabambuluisha bua kuteleja, kulonga ne kutshina Yehowa.—Dut. 31:12.
5 Baledi bakuabu mbamone ne: kuyukila ne bana kumpala kua mpungilu bua ngikadilu udibu ne bua kuikala nende kudi kuambuluisha bikole. (Ef. 6:4) Badi bambuluisha bana bua kumvuabu ne: dinanga dia buena-Kristo dia bushuwa ‘kadiena dipanga kanemu’ anyi ‘dikeba kudisankisha’ to. (1 Kol. 13:5) Mpungilu wa distrike ntshikondo tshilongolola bua kutulongeshabu kudi Yehowa, nenku bana pamue ne bantu bakulumpe badi mua kuleja kanemu bua dilongolola edi ku bikadilu biabu muaba udi mpungilu wenzekela ne miaba mikuabu.—Yesh. 54:13.
6. Bikadilu bietu bimpe bidi mua kuenzela bakuabu tshinyi?
6 Bikadilu bietu bimpe bidi mua kuambuluisha bikole bua kukupula meji mabi mu mitu ya bantu ne kubakoka mu ntendelelu mulelela. (Mat. 5:16; 1 Pet. 2:12) Tuenzayiku bua bantu bonso batudi tumonangana nabu mu mpungilu wetu wa distrike bapete bumanyishi buimpe pa kumona mushindu utudi tuenza malu ne utudi tubangata. Mushindu eu netuikale ‘tshilejilu tshia midimu mimpe’ ne netutumbishe Yehowa.—Tito 2:7.
[Kazubu mu dibeji 4]
Ikala ne kanemu bua bakuabu
▪ Ikala ne lutulu ne kanemu kudi bana betu balume ne bakaji ne kudi muena ku nzubu kuudi mutudile
▪ Bua bimpe bietu ne bia bakuabu, utumikile ne ulonde ngenyi mifila kudi badi balombola
▪ Kunyangi malu pa kunangidila muoyo wa kalolo wa muntu udi mukuakidile kuende
▪ Utabalele bana bebe biakane