Mudimu wa bena Kristo ke mudimu wetu munene

¹ Tuetu bonso tudi ne midimu mishilashilangane itudi ne bua kuenza. Kukumbajila bena mu dîku dietu bidibu nabi dijinga mbualu budibu batulomba kudi Nzambi. (1 Tim. 5:8) Kadi mudimu mene utudi tuenza bua tshidi Nzambi utulomba etshi kawena ne bua kutshiamakana kumpala kua mudimu wa diyisha Bukalenge ne dienza bayidi to.​—Mat. 24:14; 28:19, 20.

² Yezu wakafila tshilejilu tshia tuetu kulonda mu mushindu wa ‘kukeba diambedi bukalenge.’ (Mat. 6:33; 1 Pet. 2:21) Nansha muvuaye kayi ne bintu bia bungi, uvua anu mudifile bikole mu kuenza kua disua dia Tatuende. (Luka 4:43; 9:58; Yone 4:34) Wakadienzeja bua kuyisha misangu yonso ivua mpunga umueneka. (Luka 23:43; 1 Tim. 6:13) Wakakankamija bayidi bende bua bikale badifila pabu nanku mu mudimu wa dinowa.​—Mat. 9:37, 38.

³ Tuidikijayi Yezu lelu: Tudi mua kuidikija tshilejilu tshia Yezu pa kukepesha amue majinga etu a mu nsombelu, tumushindamijila nangananga pa mudimu wa bena Kristo. Patudi ne bintu bia kudikuatshisha nabi, tuteleje mubelu wa mu Bible wa kubenga kukeba bua kuboya anu diboya biuma bia panu. (Mat. 6:19, 20; 1 Tim. 6:8) Mbitambe buimpe bua kukeba tshitudi mua kuenza bua kuvudija mudimu wetu wa buambi. Patudi tupeta ntatu, tudienzejayi mushindu uvua Yezu mudienzeje, katulekedi malu a buatshia buila afimpakaja mudimu wetu munene utudi nawu wa dimanyisha lumu luimpe lua Bukalenge to.​—Luka 8:14; 9:59-62.

⁴ Nansha bantu badi ne makuabu majitu a bungi batu pabu bateka mudimu wa buambi pa muaba wa kumpala. Muanetu mukuabu udi ne dîku dinene utu ne muanzu munene ku mudimu, eku muikale kabidi mukulu mu tshisumbu tshiabu; udi wamba ne: “Ndi ngangata mudimu wa buambi bu mudimu wanyi munene.” Munga muanetu wa bakaji udi mpanda-njila udi wamba yeye ne: “Kuenza bumpanda-njila nkupite mudimu kampanda muimpe wa makuta kule ne kule.”

⁵ Nansha tuetu bikale mu nsombelu kayi, tulondayi tshilejilu tshia Yezu. Mushindu kayi? Pa kuvuija mudimu wa bena Kristo mudimu wetu munene.