Tshikondo tshia pansio ntshikondo tshia wewe kuvudija mudimu anyi?

¹ Benji ba mudimu mukole ba bungi batu bindila ne muoyo mujima tshikondo tshia pansio tshikalabu mua kusulakanaku ku midimu yabu mikuabu ya buatshia buila. Misangu mivule diangata pansio ditu difikisha bamue bantu ku diumvua lulengu anyi ku diumvua bibi, bamona malu onso abatonda ne dibafikisha too ne ku dikulakaja lukasa. Padi muntu kayi ne mudimu udi ne tshipatshila, udi mua kushala utata ne lungenyi anu bua malu ende yeye nkayende. Kudi kabidi bamue baledi bakadi bakulakaje batu batshiunga bikulu babu ne bana bakuabu ba pambidi dîba didi batatuabu ne bamamuabu badikuma eku ne eku bua kupeta makuta. Nansha nanku kabiena bishintulula ntatu ya mu nsombelu to.

² Pabi, bena Kristo ba bungi batu bamona tshikondo tshipiatshipia tshia matuku abu a muoyo etshi bu tshiibi tshibunzuluila bua kuvudija mudimu wabu pa bidi bitangila malu a mu nyuma. Padibu basombele ku nzubu kua bana babu bakadi bakulumpe, badi bapeta mushindu wa kuenza mudimu eu. Muanetu mukuabu wakatuadija bumpanda-njila mbingu ibidi kunyima kua yeye mumane kukumbaja bidimu 65; wakamba ne: “Katshia bandela tshitu muanji kupitshisha tshikondo tshia mabenesha a bungi nunku bu bidimu dikumi bindi muenze bumpanda-njila ebi to.” Muanetu mukuabu ne mukajende bakafunda buobu ne: “Bidimu bietu bitambe buimpe biakabanga patuakatuadija bumpanda-njila.” Bushuwa, bua bantu ba bungi, diangata pansio didi dipetesha mpunga mutambe buimpe wa kuvudija mudimu wabu wa buambi ne kupeta mabenesha mavule a kudi Yehowa.

³ Enza mudimu wa bungi upatule bipeta: Bantu ba bungi badi mu pansio lelu mbakole tshikondo tshivua bintu bimpe bidiku lelu’eu kabiyiku to, nenku mbalonge mua kuenza mudimu mukole katshia ku buana buabu. Nansha mudibu kabatshiyi ne makanda avuabu nawu ku bunsonga, tshidibi batshidi anu benji ba mudimu bimpe. Mu ditunga dikuabu didi filiale kampanda utangila midimu yetu ya Bantemu, bampanda-njila 22 pa lukama (anyi bana betu ba balume ne ba bakaji bu 20 000) badimu badi ne bidimu 60 anyi bipite apu. Bantu bakulumpe aba ke badi benza mudimu wa bungi mu buambi. Malu akadibu bamonemone ne ngikadilu yabu idi Nzambi musue bidi biambuluisha bisumbu biabu.​—Yak. 3:17, 18.

⁴ Kudifila bikole mu mudimu wa buena-Kristo kudi kukolesha makanda a mubidi ne kulengeja nsombelu wa muntu. Muanetu wa bakaji kampanda wa bidimu 84 uvua mutuadije bumpanda-njila dîba divuaye mupete pansio wakamba ne: “Kulonga Bible ne bantu ba bungi badi banyisha bulelela nkungambuluishe bua kushala ne lungenyi lukazamuke. Tshiena ne mashinyi to, nunku ntu ngenda lua makasa bikole. Bidi bingambuluisha bua kulama makanda anyi a mubidi.” Bampanda-njila bakuabu, mulume ne mukajende, bakadi bakulakaje bavua bamba ne: “Mudimu eu udi utulama ne makanda a mubidi ne bukole bua lungenyi. Tudi anu pamue misangu yonso. Tutu tuseka bikole ne tuanyisha nsombelu wetu.”

⁵ Enza mudimu muaba udibu dijinga ne bamanyishi: Bamue bena Kristo bakadi bangate pansio ne bikale ne makuta a mua kudikuatshisha nawu mbamuangale baye kuenzela mudimu wa buambi miaba idibu dijinga bikole ne bamanyishi ba Bukalenge. Bakuabu mbavudije mudimu wabu pa kuya kuyisha miaba idibu bakula muakulu mukuabu. Anu bu mupostolo Paulo, bamanyishi ba lukunukunu aba ‘badi benza malu onso bua lumu luimpe, bua kulua baluabanyanganyi [ne bakuabu].’​—1 Kol. 9:23.

⁶ Mumanyishi mukuabu ne mukajende bakatuadija bumpanda-njila pakavua bana babu babidi bamane kulua bantu bakulumpe. Kunyima kua bidimu bia bungi bia bumpanda-njila bakatuadija kulonga tshiena-Chine. Mpindieu ukadibu bapitshishe bidimu 70, badi ne disanka dia kumona kasumbu ka mu tshiena-Chine kavuabu benza naku mudimu kalue tshisumbu tshinene. Bamanyishi bu mudi muanetu eu ne mukajende mbaleje ne: badi dibenesha dilelela!

⁷ Mudimu wa buambi kautu ne pansio to: Padi bantu ba bungi bangata pansio ku midimu yabu ya buatshia buila, muena Kristo nansha umue katu upeta pansio mu mudimu wa Nzambi to. Bonso badi ne bua kutungunuka ne lulamatu luabu ‘too ne ku nshikidilu.’ (Mat. 24:13, 14) Mu teritware wetu mudi bampanda-njila ba pa tshibidilu bapite pa 700 badi ne bidimu bipite pa 60 badi baleja mudibu banange mudimu wa buambi bikole. Bushuwa, bu mukadibu bele bidimu bia bungi, bamue kabena ne mushindu wa kuenza mudimu bikole bu muvuabu benza kumpala to. Kadi bidi bikankamija bikole pa kubamona bawenza muabu muonso ne muoyo mujima! Dîyi dia Nzambi didi dibajadikila ne: Yehowa kakupua muoyo mudimu wabu ne dinanga didibu baleje bua dîna diende.​—Luka 21:1-4; Eb. 6:10.

⁸ Biwikala ukadi pa kuangata pansio, bua tshinyi kubenga kuela meji bimpe ne kusambila bua mushindu uudi mua kukuata mudimu bimpe menemene ne tshikondo tshiebe tshipiatshipia tshia pansio etshi? Ne diambuluisha dia Nzambi, neumone ne: tshikondo tshia pansio tshidi tshikunzuluila tshiibi bua wewe kuvudija mudimu udi utumbisha Yehowa ne upeteshangana masanka mavule.​—Mus. 148:12, 13.