Ikala ne tshisumi tshia ‘kuyisha kuyishilamu’
1, 2. Ntshinyi tshidi tshikusankisha bua mmuenenu uvua nende Paulo bua mudimu wa buambi bua lumu luimpe, ne mmunyi mutudi mua kuidikija tshilejilu tshiende tshia ‘kuyisha kuyishilamu’?
1 Anu bu Yezu ne basadidi ba lulamatu bakuabu ba bungi ba pa kale, mupostolo Paulo uvua muyishi wa lukunukunu wa lumu luimpe, ‘uyisha uyishilamu’ nansha pavuaye mu nsombelu wa mushindu kayi. Nansha pavuaye mu buloko, ‘uvua witabuja bantu bonso bakalua kudiye, ubambila bua bukalenge bua Nzambi, ubayisha malu a Mukalenge Yezu Kristo ne dikima dionso.’—Bien. 28:16-31.
2 Tuetu petu tudi mua kuikala ne tshisumi tshia ‘kuyisha kuyishilamu’ dîba dionso. Bidi biumvuija kabidi kuyisha bantu batuasambakena nabu patudi tuya anyi tufuma ku Mpungilu wa Distrike wa “Tutumbishayi Nzambi” ne kabidi patudi mu musoko udi mpungilu eu wenzekela. —Bien. 28:23; Mus. 145:10-13.
3. Mmunyi mutudi mua kuepuka bua diyisha dietu dia padi mpunga umueneka kadilu anu bu diyisha dia mu mpukapuka patupu?
3 Diyisha dia nunku ndia mu mpukapuka anyi peshi ndia dîba dionso didi mpunga umueneka? Kudi dishilangana muaba eu anyi? Eyowa. Bualu bua mu mpukapuka mbudi bufika mu tshimpitshimpi muntu kayi mubuelele meji, bienze anu bu ne: kabuvua bulongolola anyi buvua bua mushinga mukese. Kadi mudimu wetu kawena nanku to. Anu bu muvuabi bua Paulo, kutumbisha Nzambi pa kuyisha kudi ne mushinga muvule buetu tuetu, ne tudi ne bua kuikala ne meji a kuyisha muaba wonso udi mukumbanyine patudi mu luendu. Kadi mushindu mene utudi tuyikila ne bantu ke utudi mua kubikila ne: ng’wa dîba dionso didi mpunga umueneka, mbuena kuamba ne: tuakula bu balunda, anu bu mututu tuakula pa tshibidilu. Ngenzelu eu udi mua kupatula bipeta bimpe.
4. Ntshinyi tshivua tshiambuluishe Paulo bua kuyishaye muaba uvuaye musombele?
4 Dilongolola bua kuyisha: Paulo uvua ne bua kukeba mpunga yonso ivua imueneka bua kuyisha pavuaye mu buloko ku Lomo. Anu muaba uvuabu bamulamine mu buloko au, wakabikidisha bamfumu ba bena Yuda. (Bien. 28:17) Nansha muvuaku kuikale tshisumbu ku Lomo, Paulo wakamona ne: bena Yuda bavua mu tshimenga atshi bavua bamanye malu anu makese patupu pa bidi bitangila ditabuja dia buena-Kristo. (Bien. 28:22; Lomo 1:7) Kakadikanda bua ‘kuyisha kuyishilamu’ malu avua atangila Yezu Kristo ne Bukalenge bua Nzambi to.
5, 6. Mmishindu kayi idi mua kutumuenekela ya kuyisha padi mpunga umueneka, ne mmunyi mutudi mua kudilongolola bua kumona mua kuenza nanku?
5 Ela meji bua bantu bonso baudi mua kumonangana nabu paudi mu luendu badi bamanye Bantemu ba Yehowa anu bia pamutu pamutu. Badi mua kuikala kabayi bamanye ne: tutu tulonga Bible ne bantu ku mabu katuyi tubafutshisha makuta. Ikala ukeba mpunga yonso idi mua kumueneka bua kuyisha bantu baudi umonangana nabu paudi mu luendu, paudi wimana bua kuikisha, paudi usumba kasolonyi, paudi uya bua kusumba bintu, paudi mu nzubu wa tshilala benyi, paudi uya kudia mu restoran, paudi mu mashinyi ne miaba mikuabu kabidi. Dianjila kulongolola tshiwamba bua kutuadija diyuki ne muntu ne kuyisha mu tshikoso. Pamuapa mu matuku adi kumpala udi mua kuteta padi mpunga umueneka bua kuyisha bena mutumba nebe, balele bebe, bena mudimu nebe ne bantu bakuabu baudi mumanyangane nabu.
6 Paudi uyisha nanku dîba dionso didi mpunga umueneka, newikale dijinga ne mikanda. Mmikanda kayi? Udi mua kuangata trakte yonso uwudi mumone. Wewe muikale ne trakte wa Aimeriez-vous en savoir plus sur la Bible?, ubale ne muntu bikoso bitanu bia ntuadijilu bidi bileje mu mishindu mishilashilangane tshitudi ne bua kubadila Bible. Leja panyima pa trakte muaba wa kulombela dilonga dia Bible kadiyi dia kufuta makuta. Wewe mupete muntu udi wanyisha paudi umuyisha, umupeshe broshire wa Utulomba. Udi mua kuambula trakte ne broshire anyi bibejibeji bia mu miakulu idibu bakula miaba mikuabu bua kudianjila kudilongolola bualu udi mua kupetangana ne bantu badi bakula muakulu mukuabu. Paudi wenza luendu mu mashinyi, udi mua kuambula ndambu wa mikanda itutu tutamba kulonga ne bantu bua kuyipesha badi baleja menemene ne: badi banyisha mukenji wa Bukalenge.
7, 8. Mmubelu kayi utudi ne bua kulonda pa bidi bitangila mmuenekelu ne ngikadilu wetu patudi mu luendu ne matuku makuabu a tshianana?
7 Tabalela mmuenekelu ne ngikadilu webe: Tuenzayi bua ngikadilu wetu ne mvuadilu ne didilengeja dietu kabipeshi bantu meji mabi anyi kubafikisha ku ‘dibanda’ bulongolodi bua Yehowa to. (Bien. 28:22) Mvuadilu wa nunku kêna anu bua dîba dia mpungilu to, kadi udi kabidi bua patudi mu luendu ne matuku makuabu a tshianana. Mu Tshibumba tshia Nsentedi tshia dia 1 Tshimungu 2002, dibeji dia 18, tshikoso tshia 14, badi bamba ne: “Mvuadilu wetu kêna ne bua kuikala wa kudileja nende, munekeshe, ujula bantu majinga mabi, ushiya mubidi patoke peshi muele kalele mu dilonda dia miodele idiku lelu nansha. Tudi kabidi ne bua kuikala ne mvuadilu udi uleja ne: ‘tudi tunemeka Nzambi.’ Ke muaba udi ulomba bua kuela meji eu, ki mmuomu anyi? Ki ntshilumbu tshia kuvuala patupu bimpe anu patudi mu bisangilu bia tshisumbu ne pashishe kudilengulula mu muanda eu patudi mu bikondo bikuabu to. Mvuadilu wetu udi ne bua kuikala misangu yonso uleja ne: tudi bantu badi batendelela Nzambi, ne kuleja kabidi lungenyi luetu luimpe bualu tudi bena Kristo ne basadidi ba Nzambi mêba onso.”—1 Tim. 2:9, 10.
8 Tudi ne bua kuvuala bilamba bidi bileja kanemu ne budipope. Padi mmuenekelu ne ngikadilu wetu bileja misangu yonso ditabuja dietu kudi Nzambi, nansha musangu umue katuakudikanda bua kuyisha padi mpunga umueneka, tufika ku dienza nanku anu bualu mvuadilu wetu ki mmuimpe to.—1 Pet. 3:15.
9. Mbipeta kayi bimpe biakapatula Paulo bua diyisha diende ku Lomo?
9 Kuyisha dîba dionso didi mpunga umueneka kutu kupatula bipeta bimpe: Mu bidimu bibidi bivua Paulo mu nzubu wa lukanu ku Lomo, wakapatula bipeta bimpe bu muakadifilaye bikole bua kuyisha. Luka wakafunda ne: ‘Bakuabu bakadi bitabuja malu akambaye.’ (Bien. 28:24) Paulo wakamona mudibi bikengela ‘kuyisha kuyishilamu’ pakafundaye ne: ‘Malu akunkuata akuandamuka bua kudiundisha lumu luimpe; nunku nkanu yanyi bua Kristo yakamanyibua munkatshi mua masalayi onso a mu nzubu wa lukanu ne munkatshi mua bantu bonso bakuabu kabidi. Ne batambe bungi ba munkatshi mua bana betu ba mu Mukalenge bakakolesha mitshima yabu bualu bua nkanu yanyi, badi bamba dîyi dia Nzambi ne dikima ditambe, kabayi batshina.’—Filip. 1:12-14.
10. Ndisanka kayi diakapeta muanetu mukuabu ne mukajende mu diyisha mu tshikondo tshia mpungilu wa tshidimu tshishale?
10 Tshidimu tshishale muanetu mukuabu ne mukajende, bamane kupitshisha dituku mu mpungilu wa distrike, bakamona bualu buimpe pakayishabu pavua mpunga mumueneke mukaji mukuabu uvua upanyisha biakudia mu restoran, yeye eu uvua mubele lukonko bua tumanyishilu tua mpungilu tuvuabu bavuale. Bakamulondela bua mpungilu ne bua ditekemena didi Bible ufila bua matuku atshilualua. Bakamupesha trakte wa Aimeriez-vous en savoir plus sur la Bible? ne kumumvuijabu bua dilonga dia Bible dia ku nzubu. Muntu mukaji au kuambaye ne: mmusue bua muntu alue kumutangila, wakafunda dîna diende ne adrese panyima pa trakte ne kulombaye muanetu au ne mukajende bua kulongololabu bualu bua dilonga abu. Ndisanka kayi diudi mua kupeta tshidimu etshi wewe muikale ne tshisumi witaba bua ‘kuyisha kuyishilamu’?
11. Nngikadilu kayi itudi ne bua kupeta bua kumona mua kuya ne lumu luimpe kumpala pa ‘kuyisha kuyishilamu’?
11 Amba lumu luimpe uluambilamu: Elabi meji bua disanka divua nadi Paulo pakumvuaye ne: bena Kristo nende bavua bidikija lukunukunu luende! Tuenzayi muetu muonso bua kuya ne lumu luimpe kumpala pa kuyisha dîba dionso didi mpunga umueneka, tuyisha bantu malongesha etu a nshindamenu eku bindile bua mpungilu udi kumpala eku kutuambuluishaye.
[Kazubu mu dibeji 3]
Mikanda itudi nayi dijinga bua kuyisha dîba dionso didi mpunga umueneka
▪ Aimeriez-vous en savoir plus sur la Bible? (trakte)
▪ Ntshinyi tshidi Nzambi utulomba? (broshire)
▪ Trakte ya mu miakulu mikuabu
▪ Mikanda mikuabu itutu tulonga nayi ne bantu
[Kazubu mu dibeji 4]
Kubapu muoyo to!
Mbanganyi abu? Bantu bonso badi basankidila bulelela bavua babuele mu Tshivulukilu tshia lufu lua Kristo anyi mu muyuki wa pa buawu. Tudiku babambile bua kuluabu mu mpungilu wa distrike wa tshidimu etshi anyi? Pamu’apa ba bungi ba kudibu badi mua kulua bikalabu babakankamije bimpe. Bu mudibu banyisha buena-muntu budi buimpe butu bumueneka mu tshikondo tshia mpungilu ne ndongamu wa malu a mu nyuma adi akankamija, bantu batuabikila abu nebasemene pabuipi ne Yehowa ne bulongolodi buende kabidi. Bua tshinyi kubenga kubabikila bua kumona ni bikala mua kulua? Bambila malu onso adibu nawu dijinga, matuku ikala mpungilu ne bua kuenzeka, kumuleja njila wa muaba udi mpungilu wenzekela, dîba didiye utuadija ne ujika ne programe udibu badianjile kuleja pa dibeji dia panyima pa Réveillez-vous! wa dia 8 Kabalashipu 2003.