Mudimu udi ufila bukole
1 Mukenji wa mu Bible udi upetesha bantu bonso badi bawitaba ne bautumikila mu nsombelu wabu bukole. (Mus. 19:7, 8) Udi ubambuluisha bua kupatuka mu bupika bua malongesha a dishima ne bua bienzedi bibi, ubapesha kabidi ditekemena dishindika bua matuku atshilualua. Kadi lumu luimpe kaluena luambuluisha anu aba badi balupeta to. Bantu badi bamanyisha bakuabu malongesha malelela a mu Bible adi apeshangana bukole badi pabu bakoleshibua.—Nsu. 11:25.
2 Bakolesha kudi mudimu wa buambi: Yezu wakamba ne: badi bitaba bujitu bua kuikala bayidi ba Kristo (budi bukonga mudimu wa kuyisha ne wa kuvuija bantu bayidi) ‘nebapete dikisha mu mitshima yabu.’ (Mat. 11:29) Yeye nkayende wakamona ne: kuyisha bantu kuvua kumupetesha bukole. Buende yeye kuyisha aku kuvua anu bu biakudia biende. (Yone 4:34) Pakatumaye bayidi 70 bua kuyisha, bakasanka pakamonabu ne: Yehowa uvua ubenesha mudimu wabu.—Luka 10:17.
3 Lelu’eu kabidi, bena Kristo ba bungi badi bapeta bukole padibu badifila mu mudimu wa buambi. Muanetu mukuabu wa bakaji wakamba ne: “Mudimu wa buambi udi ufila bukole bualu udi undeja tshia kuenza ne tshia kuipatshila mu nsombelu wanyi. Pantu mu buambi, ntatu yanyi ne malu atu ambungamija dituku dionso bitu bituya.” Mumanyishi mukuabu wa lukunukunu wakamba ne: “Mudimu wa buambi . . . udi wenza bua Yehowa kuikala muntu mulelela ku mêsu kuanyi dituku dionso ne udi umpesha ditalala mu mutshima wanyi, kabidi ne disanka dindi tshiyi mua kupeta mu mushindu mukuabu nansha.” Edi ndiakalenga dia dikema ditudi nadi dia kuikala ‘benzejanganyi ba mudimu ne Nzambi’!—1 Kol. 3:9.
4 Mutshi wa tshikokedi wa Kristo udi muakanyine: Nansha mudibu balomba bena Kristo bua ‘kuenza muabu muonso,’ Yezu kêna ujinga bua tuenze bipitshidile pa tshitudi mua kuenza to. (Luka 13:24, Mukanda wa Mvidi Mukulu [Mishonyi, MMV]) Udi utubikila ne dinanga dionso bua tuetu ‘kuangata mutshi wende wa tshikokedi pa nshingu yetu.’ (Mat. 11:29) Bantu badi baluangana ne ntatu mu nsombelu wabu badi mua kushala bashindike se: mudimu udibu benza ne muoyo mujima, nansha wowu mukese, udi usankisha Nzambi bikole.—Mâko 14:6-8; Kolos. 3:23.
5 Kabiena bitupeshaku bukole bua kusadila Nzambi udi wangata tshionso tshitudi tuenza bua butumbi bua dîna diende ne mushinga anyi? (Eb. 6:10) Tudienzejayi bua kumupesha tshietu tshionso tshitambe buimpe tshitudi natshi.