Tuidikijayi buimpe bua Yehowa
1 Kunyima kua tuetu bamane kutangila mudi dîba dibuela ku dilolo anyi kunyima kua didia biakudia bimpe bia muenya, muoyo wetu kautuku utusaka bua kuela Yehowa tuasakidila, yeye udi Mpokolo wa buimpe bua mishindu yonso anyi? Buimpe buende budi butusaka bua kumuidikija. (Mus. 119:66, 68; Ef. 5:1) Mmushindu kayi utudi mua kuleja ngikadilu wa buimpe eu?
2 Kudi badi kabayi bena kuitabuja netu: Mushindu wa kumpala utudi mua kuidikija buimpe bua Yehowa ngua kuditatshisha ne muoyo umue bua aba badi kabayi bena kuitabuja netu. (Gal. 6:10) Kubenzela malu mimpe kudi mua kubambuluisha bua kuikala ne meji mimpe pa mushindu udibu bangata Bantemu ba Yehowa ne udibu bangata mukenji utudi tuenda nawu.
3 Tshilejilu, pavua muanetu mukuabu wa balume mpanda-njila utshivua nsonga muindile bua kumonangana ne munganga mu nzubu kampanda wa luondapu, wakasomba ku luseke lua mamu mukuabu mukulakaje uvua umueneka muikale usama bikole kupita babedi bakuabu bavua muaba au. Pakafika dîba dia muanetu au bua kubuela mua munganga, wakapitshisha mamu au bua kubuelaye kumpala kuende. Dikuabu dituku bakalua kumonangana ne mamu au mu tshisalu, mamu kusankaye bikole pakamumonaye. Nansha muvua mamu au ubenga bua kuteleja lumu luimpe kumpala, wakalua kuamba ne: bushuwa ndi mufike mpindieu ku dimona mudi Bantemu ba Yehowa banange bantu nabu. Bakatuadija kulonga Bible ne mamu eu.
4 Kudi bana betu bena kuitabuja: Tudi kabidi tuidikija buimpe bua Yehowa patudi tutabalela bena kuitabuja netu bua kubambuluisha. Mu bikondo bia bipupu, batu batubala munkatshi mua bantu ba kumpala batu baya kuambuluisha bana betu. Tutu kabidi tuenza bia muomumue patutu tuambuluisha bana betu badi dijinga ne kubambula bua kufikabu mu bisangilu, patutu tukumbula badi ne bulema ne patudi tudiundisha dinanga dietu too ne kudi bantu batudi katuyi bamanye bimpe mu tshisumbu.—2 Kol. 6:11-13; Eb. 13:16.
5 Mushindu mukuabu udi Yehowa uleja buimpe mpadiye “musue kubuikidila bantu mibi.” (Mus. 86:5) Bua kumuidikija, tudi mua kuleja dinanga dietu dia buimpe pa kubuikidila bakuabu mibi. (Ef. 4:32) Ebi bidi bivuija malanda etu ne bena kuitabuja netu ‘matambe buimpe ne a disanka.’—Mus. 133:1-3.
6 Nunku tuanyishayi bua buimpe bua Yehowa bupite bungi butusake ku ditshionkomoka ne butumbi buende ne disanka tente mu mutshima. Butusake kabidi bua kuditatshisha bua kuidikija buimpe buende mu malu onso atudi tuenza.—Mus. 145:7; Yel. 31:12.