Programe mupiamupia wa mpuilu wa pa buende

Matuku aa badi bamanyisha malu a bungi adi atangila tshilumbu tshia dilama dia dimuma dia muoyo wetu wa munda muena dîna bimpe bua kumona mua kuvudija matuku a muoyo ne kusomba bimpe panu. Bualu budi ne mushinga wa bungi menemene mmushindu udi mutshima wetu wa mu tshimfuanyi muikale. Nunku, tshiena-bualu tshia mpuilu wa pa buende watuadija mu ngondo wa tshitema 2003 ntshiakanyine menemene; tshidi tshiamba ne: “Tuenzelayi Yehowa mudimu ne muoyo mutoke.” (1 Kul. 28:9) Mmalu kayi atudi mua kudianjila kutekemena bua kulonga?

Mutangidi wa tshijengu neenze muyuki eu: “Tuambuluishayi bakuabu bua kuenzelabu Yehowa mudimu ne lungenyi luabu luonso.” Mandamuna a nkonko yelabu bamue bantu nealeje patoke disanka didi difumina ku dijinga bua kulonga Bible ne bantu badi basue kuenzela Yehowa mudimu. Bateleji bonso nebakoleshibue ku muoyo ne nebakankamijibue patelejabu muyuki wa kumpala wa ngamba-malu udi mulue kutukumbula eu: “Tukubayi mitshima yetu mu bukua-panu budi mu tshimvundu.” Tshitupa tshia mu dinda netshijike ne muyuki wa batismo.

Mu mapingaja nekuikale muyuki eu: “Tuambuluishayi bakuabu,” muyuki waleja mushindu utudi mua kuambuluisha bakuabu. Ntshinyi tshidi baledi mua kuenza bua kukuba mitshima ya bana ku malu mabi ne kubambuluisha bua kusemena pabuipi ne Yehowa? Muyuki eu wa ne: “Ambuluisha bana bebe bua basankile mu Yehowa” neufile ngenyi mimpe ne kabidi neuleje mushindu wa kuenza nanku.

Tudiku tudia biakudia bionso bia nyuma bidi Yehowa utulongoluela bua kulama mutshima wetu wa mu tshimfuanyi ne makanda ne bukole anyi? Muyuki wa ndekelu wa ngamba-malu udi mulue kutukumbula eu wa ne: “Lama mutshima webe mutoke mu mudimu wa Yehowa,” newimanyine pa malu manene anayi adi atangila bibidilu bimpe bidi mua kutuambuluisha bua kukuba makanda etu a mu nyuma. Mmutantshi bule kayi ne mmushindu kayi utudi tudifila mu disambila, mu dilonga dia Dîyi dia Nzambi, mu diyisha ne lukunukunu ne mu didisangisha ne bena Kristo netu? Tudiku mua kuakaja malu mu tshitupa kayi tshionso tshia ku malu atudi batele aa anyi?

Yehowa udi wambila muntu yonso ne: ‘Teka mutshima webe ku diyisha, uteleje matshi ebe ku mêyi a lungenyi.’ (Nsu. 23:12) Dilongolola kutuadijila ku mpindieu bua kuikalaku dituku dimpe adi dia malongesha a mu Dîyi dia Nzambi. Kuenza nanku nekukukoleshe bua kutungunuka ne kuenzela Yehowa mudimu ne mutshima mutoke ne lungenyi luebe luonso.