Mabenesha a mudimu wa bumpanda-njila
1, 2. Mmasanka kayi adi amueneka menemene mu mudimu wa bumpanda-njila, ne mbua tshinyi?
1 Mpanda-njila kampanda wakamba ne: “Ndi mumanye ne: kakuena mudimu mukuabu uvua mua kumpa disanka bu edi dindi mupetele mu diyisha bakuabu bulelela to.” Mukuabu pende ne: “Ku dilolo dionso, ntu ndala tulu tuimpe ne mutshima wanyi muwule tente ne disanka.” Bampanda-njila aba badi bakuila ne bana betu bakuabu ba miaba yonso badi bapeta masanka a mu mudimu wa bumpanda-njila.—Nsum. 10:22.
2 Kuambuluisha bakuabu bua kupetabu dimanya dia mu Dîyi dia Nzambi kudi kufila disanka dilelela. (Bien. 20:35; 1 Tes. 2:19, 20) Mpanda-njila mukuabu ukadi muenze bidimu bia bungi mu mudimu eu wakafunda ne: “Bidi bisankisha bikole ne bikolesha ditabuja patudi tumona mudi Dîyi dia Nzambi dikale ne bukole bua kusaka bantu ku dishintulula mu nsombelu wabu.” Bushuwa, bua didifila diabu bua kuambuluisha bantu ne kulombola malonga a Bible, bampanda-njila badi bafika ku dipeta masanka a buena aa.
3, 4. Mmushindu kayi udi mudimu wa bumpanda-njila ulongesha muntu mua kueyemena Yehowa, ne mmunyi mudiwu wambuluisha bua kukola mu nyuma?
3 Tueyemenayi Yehowa: Padi bampanda-njila beyemena dituku dionso nyuma wa Nzambi mu dienza dia mudimu wabu, bushuwa bidi bibambuluisha bua kukuama “mamuma a nyuma” ne kuenza malu nunku kudi kubakuba. (Gal. 5:16, 22, 23) Kabidi, bu mudi bampanda-njila bakuata mudimu ne Dîyi dia Nzambi misangu yonso, badi balua bapiluke mu dikeba mvese mikumbanyine bua kushindika bulelela ne kukolesha bakuabu ku muoyo. (2 Tim. 2:15) Muanetu kampanda wa balume uvua mpanda-njila munkatshi mua bidimu bia bungi wakamba ne: “Bumpanda-njila mbungambuluishe bua kumanya Bible bikole, ne bua dimanya edi ndi muambuluishe bantu ba bungi bua kumanyabu Yehowa ne malu adiye mulongolole.” Ndisankapu bungi kayi!
4 Bampanda-njila ba pa tshibidilu badi kabidi ne bua kueyemena Yehowa mu malu makuabu a bungi. Ditabuja diabu didi dikola padibu bamona mushindu udiye ubenesha bionso bidibu benza bua kupeta bimue bintu bidibu bakengela. Mpanda-njila wa pa tshibidilu mukuabu wa bidimu 72 udi muenze mudimu eu munkatshi mua bidimu 55 bulubulu, wakamba ne: “Yehowa katu muanji kundekela to.” Kabidi, padi bampanda-njila balama nsombelu wabu mupepele, bidi bibepula ku tunyinganyinga tua mu nsombelu. Bualu ebu budiku bukusankisha anyi?—Mat. 6:22; Eb. 13:5, 6.
5. Mmushindu kayi udi bumpanda-njila buambuluisha muntu bua kusemena pabuipi ne Yehowa?
5 Tusemenayi pabuipi ne Nzambi: Malanda etu ne Yehowa ntshintu tshia mushinga wa bungi tshitudi natshi. (Mus. 63:3) Patudi tudifila bikole mu buambi bua dinanga ditudi banange Yehowa, malanda au adi ashemakana bikole. (Yak. 4:8) Mpanda-njila udi muenze bidimu bipite pa 18 mu mudimu eu wakamba ne: “Mudimu wa bumpanda-njila udi utuambuluisha bua ‘kuteta, kulabula ne kumvua ne: Yehowa udi muakane,’ ku dituku ne ku dituku tudi tukolesha kabidi bikole malanda etu ne Mufuki wetu.”—Mus. 34:8.
6. Ntshinyi tshidi bampanda-njila ne bua kuikala natshi, ne mbanganyi bakuabu badi mudimu eu wambuluisha?
6 Bua kuenza mudimu eu, bampanda-njila badi ne bua kuikala ne mushindu wa kuwenza, badi kabidi ne bua kuikala ne ditabuja dikole, kunanga Nzambi ne muntu nabu ne dinanga dilelela ne kuitaba bua kudibudisha bimue bintu. (Mat. 16:24; 17:20; 22:37-39) Kadi, anu mututu tumona mpala ya bampanda-njila miaba yonso ne disanka, masanka a mu mudimu wa bumpanda-njila mmapite kule ne kule bionso bidi muntu mua kudibudisha bua mudimu eu. (Mal. 3:10) Masanka aa kaena anu kudi bampanda-njila nkayabu to, bena mu mêku abu ne bena mu tshisumbu tshiabu bidi pabi bibambuluisha bikole bua lungenyi luimpe ludi bampanda-njila baleja.—Filip. 4:23.