Mandamuna ku nkonko yenu

▪ Bidi bikengela kufila luapolo lua dilonga dia Bible dia mu dîku mu tshisumbu anyi?

Bu bikala muledi muena Kristo ulombola dilonga dia Bible mu dîku ne bana badi kabayi banji kutambula, muledi eu udi ne bua kubala dîba dimue ku lumingu, dikumbula dimue ku lumingu ne dilonga dia Bible dimue ku ngondo. Bidi nanku nansha padi dilonga edi dikale dipita pa dîba dimue, nansha badilombola misangu mipite pa umue ku lumingu anyi nansha padibu balonga ne muana yonso pa nkayende.​—Tangila mukanda wa Mudimu wetu dib. dia 104.

Bu bikala bena mu nzubu bonso bakadi Bantemu batambule, kuena ubala dîba dimue anyi dilonga edi mu luapolo lua mudimu webe wa buambi to (pa kumusha bua muana utshidi ulonga mukanda muibidi kunyima kua batismo). Bidi nanku bualu luapolo lua mudimu wa buambi bua tshisumbu ludi bangabanga luleja tshidi tshienzeka mu dimanyisha lumu luimpe ne mu dilongesha bulelela bua mu Bible kudi bantu badi kabayi banji kutambula bua kuikalabu basadidi ba Yehowa. (Mat. 24:14; 28:19, 20) Kadi, bualu ebu kabuena bukepesha mushinga udi nawu dilombola dia dilonga dia Bible dia mu dîku pa tshibidilu nansha.

Baledi bena Kristo ke badi ne bua kulonga ne bana babu. Baledi bonso badi dijinga ne diambuluisha bua kulengeja anyi kuikala ne dilonga diabu dia mu dîku pa tshibidilu badi mua kulomba diambuluisha edi kudi bakulu. Bikalabi bikengela bua mumanyishi wa lumu luimpe kampanda kulongaye Bible ne muana udi kayi muanji kutambula wa mu dîku dia muena Kristo, bidi bikengela kuanji kuebeja mutangidi-muludiki anyi mutangidi wa mudimu. Biamuanyishilabu, mumanyishi wa lumu luimpe eu neafile luapolo lua dilonga edi anu bu mutuye wenza bua malonga makuabu a Bible.

Kukoleshila bana mu njila wa Yehowa kudi kulomba dîba ne makanda a bungi kupita bidibu bafila bu luapolo lua mudimu wa buambi. (Dut. 6:6-9; Nsu. 22:6) Baledi bena Kristo badi ne bujitu pa makaya abu bua kukolesha bana babu ‘ne dibela ne didimuija bia [Yehowa]’ mbakanyine tuetu kubela kalumbandi.​—Ef. 6:4.