Tukebayi bantu ba muoyo muimpe
1 Mudimu wa kuyisha uvua Yezu mutushile bua kuenza utu imue misangu umueneka ne ntatu ya pa buayi. Wakamba ne: ‘Panuabuela mu tshimenga anyi mu musoko mukese, nukebe bantu [ba muoyo] muimpe badimu.’ (Mat. 10:11) Bu mudi bantu kabayi batamba kusomba ku mbanza yabu, mmunyi mutudi mua kubakeba mu mushindu muakane?
2 Longa mudi teritware webe: Tuadija ne kulonga mushindu udi teritware webe. Ndîba kayi ditu bantu ba bungi batamba kuikala ku mbanza yabu? Mmuaba kayi uudi mua kubasangana mund’a munya? Kudiku dituku kampanda disunguluke anyi dîba kampanda dia mu lumingu didibu mua kutamba kusua bua bantu kubakumbula ne mukenji wa Bukalenge anyi? Kuakaja mudimu webe bilondeshile programe ne nsombelu ya bena mu teritware uudi nekukuambuluishe bua kupatula bipeta bilenga bia dikema.—1 Kol. 9:23, 26.
3 Bamanyishi bavule mbapatule bipeta bilenga bua dituadija mudimu wabu mu mêba a mapingaja. Bamue bena nzubu kabatu ne midimu ya bungi ne batu ne ntema ya bungi mu mêba au. Nansha kuyishila ku telefone mu mêba a ku dilolo kudi kabidi mua kupatula bipeta bilenga. Kuyisha mu bisalu anyi miaba itu bangenda basumbishila bintu ne miaba itu bantu basanganyibua ba bungi mmushindu mukuabu udi wambuluisha bua kupeta bantu ba bungi ba kuambila lumu luimpe.
4 Mu ngondo kampanda uvua tshimue tshisumbu tshidilongolole bua kuenza mudimu muvule, bakalongolola bua kuikala kuyisha matuku a Disambombo ne a Dia lumingu onso ku dilolo menemene, ne matuku makuabu abidi a mu lumingu Disatu ne Ditanu mu mapingaja. Bavua balongolole kabidi bua kuyisha ku telefone ne bua kuenza mudimu miaba idi bangenda basumbishila bintu. Mushindu uvuabu balongolole eu wakapatula bipeta bilenga mu mudimu, e kusakabi tshisumbu bua kutungunuka ne programe eu.
5 Ubapinganyine ne lukasa: Pikalabi ne: mu teritware wenu mbikole bua kupeta bantu ku nzubu paudi ubapinganyina bua kubakumbula, keba bua nupeshangane ne muntu dituku dinuamonangana kabidi panudi nujikija kuyukila nende, ne udi mua kuenza nunku nansha mu dimonangana ne muntu dia musangu wa kumpala. Pashishe udienzeje bua kunemeka tshipungidi etshi. (Mat. 5:37) Kuoku kuikala mushindu, udi mua kulomba muntu uudi uyukila nende nimero wende wa telefone. Nimero eu udi mua kukuambuluisha bua kuyukila nende kabidi.
6 Bushuwa, Yehowa neabeneshe bionso bitudi tuenza ne muoyo mujima bua kukeba bantu ba muoyo muimpe ne kubapinganyina bua kubambila makuabu malu a bungi adibu nau dijinga.—Nsu. 21:5.