Tudi mua kuenza tshidi Yehowa utulomba
1. Nngimue ngenyi kayi itudi mua kuluangana nayi imue misangu, ne mbua ntshinyi?
1 Kutumikala mikenji ya Yehowa ne mêyi ende ke bualu bua nsongo butudi ne bua kuenza lelu, ne kudi kutuambuluisha bua kulongolola matuku etu atshilualua a tshiendelele. (Mus. 19:7-11; 1 Tim. 6:19) Kadi bulongolodi bua Satana buobu budi butubueja mu nsombelu mikole. Mubidi wetu mene mupange bupuangane udi utusakidila kabidi makuabu makenga. Mu diditatshisha bua kukumbaja malu adibu batulombe mu Bible, tutu tudiumvua imue misangu bu matupite makanda. (Mus. 40:12; 55:1-8) Bidi mua kutufikisha too ne ku didiebeja bua kumanya ni tudi mua kukumbaja bidi Yehowa utulomba bushuwa. Mu bikondo bia nunku, ntshinyi tshidi mua kutuambuluisha bua kulama nkatshinkatshi wetu wa mu nyuma?
2. Mmunyi mudi Yehowa muleje nkatshinkatshi wende mu malu adiye utulomba?
2 Mikenji ya Yehowa kayena ne bujitu to: Yehowa katu muanji kutulomba bua kuenza bualu budi butupite mutu to. Mikenji yende kayena ne bujitu to, kadi idi bua diakalenga dietu. (Dut. 10:12, 13; 1 Yone 5:3) Mmumanye mateketa etu, ‘uvuluka ne: tudi dimfuenkenya.’ (Mus. 103:13, 14) Ne bulenga buonso Nzambi udi wanyisha bionso bitudi tuenza bua kumusadila, nansha nsombelu wetu pamu’apa utuelela mikalu. (Lew. 5:7, 11; Mâko 14:8) Udi utuambila bua tuetu kumupuila bujitu buetu, ne kabidi udi utushindikila ne: neatuambuluishe bua kupeta bukole bua kushala ne lulamatu kudiye.—Mus. 55:22; 1 Kol. 10:13.
3. Mmunyi mudi Yehowa utukolesha bua kunanukila?
3 Bidi bikengela kunanukila: Bible udi ulonda miyuki ya bantu bavua bashale ne lulamatu bu mudi Eliya, Yelemiya, ne Paulo bakaleja mudibi bikengela kunanukila. (Eb. 10:36) Yehowa wakabakolesha mu tshikondo tshia buluishi ne tshivua malu mabatonde bikole. (1 Bak. 19:14-18; Yel. 20:7-11; 2 Kol. 1:8-11) Ne bidi bitukolesha ku muoyo patudi tumona lulamatu lua bana betu ba mu tshikondo tshietu etshi. (1 Pet. 5:9) Dielela meji pa bilejilu bia nunku didi mua kutuambuluisha bua kubenga kuteketa mu mikolo.
4. Bua tshinyi mbia mushinga bua kushala batuishile mêsu etu pa malaya a Nzambi?
4 Ditekemena mu malaya a Nzambi didi bu ‘luongo lua muoyo wetu.’ (Eb. 6:19) Ditekemena diakasaka Abalahama ne Sala bua kuitaba tshivua Yehowa mubalombe bua kumuangala ne kuya ‘kusomba bu benyi mu buloba bua mulayi.’ Diakapesha kabidi Mose bukole bua kuakula bua ntendelelu mulelela kayi utshina. Divua dikoleshe Yezu bua kutantamena mutshi wa makenga. (Eb. 11:8-10, 13, 24-26; 12:2, 3) Kulama dilaya dia Nzambi dia bulongolodi bupiabupia muikale buakane mu mitshima yetu nekutuambuluishe bua kushala bashindame mu ditabuja.—2 Pet. 3:11-13.
5. Bua tshinyi bidi mua kutukolesha ku muoyo bua kuelela meji pa malu a lulamatu atukadi benze?
5 Divuluka bienzedi bietu bia lulamatu bia matuku mapite ne didipangisha amue masanka bidi kabidi mua kutupesha bukole mu mudimu wetu. (Eb. 10:32-34) Dienza nunku didi divuluija disanka dituvua bapete patuvua bapeshe Yehowa tshidiye utulomba, mmumue ne: didifila dietu bua kumusadila ne muoyo mujima.—Mat. 22:37.