Mukanda wa Kudi Kasumbu Kaludiki
Bana betu basuibue,
‘[BULENGA budi kabuyi butuakanyine buikale] kunudi ne ditalala bia kudi Nzambi Tatu wetu ne kudi Mukalenge Yezu Kristo.’ (1 Kol. 1:3) Tudi bindile ne muoyo kulukulu tshikondo tshikala bintu bionso bidi bipuyakana mua kutumbisha Yehowa ne butumbi budi bumuakanyine! (Mus. 150:6) Mu dindila dituku edi dinene, tudi tutungunuka ne kumanyisha lumu luimpe lua Bukalenge bua Nzambi ne kuvuija bantu bayidi.
Kumanyisha evanjeliyo ke tshipatshila tshinene tshia mudimu wa Yehowa lelu pa buloba. (Mâko 13:10) Bu mutudi bamanye menemene tshidi dijinga dia Yehowa mu mudimu eu, tudi tulomba Nzambi bua atuambuluishe bua kuukumbaja ne muoyo mujima, tuenza bua muntu yonso ikale ne mushindu wa kupeta masanka ku mulambu wa tshia-bupikudi. (Buak. 14:6, 7, 14, 15) Nansha mutudi ne ntatu, tudi ne dianyisha dia bungi bua mutudi ‘baluatshishibue ne bukole bua mu diulu’ bua kukumbaja mudimu wende!—Luka 24:49.
Bidi bisankisha bikole pa kutangila mudimu udi muenzeke tshidimu tshia mudimu tshishale etshi ne kumona bidi Yehowa muenze ku diambuluisha dia basadidi bende ba lulamatu. Bakoleshibue kudi nyuma muimpe wa Nzambi, bantu ba Nzambi mbaleje dinanga dia buena dia Kristo, batantamena lukuna lua ba pa buloba. Dinanga dia mushindu eu divua dimueneke mu mpungilu yetu. Kubangila mu ngondo muisambombo too ne wa dikumi ne muibidi 2003, bantu bafume mu matunga mapite pa lukama bavua baye kubuela mu mpungilu 32 ya bantu bafumina mu matunga a bungi ivua mienzeke mu kontina itanu. Bavua bele ba-misionere, basadidi ba mu bukua-matunga ne bena ku Betele badi benza mudimu kubabende nkonko mu mpungilu ya distrike ne ya bantu bafumina mu matunga a bungi.
Mu mpungilu eyi, tuvua bapete mikanda mipiamipia: ‘Voyez le bon pays’ ne Longa malu kudi Mulongeshi Munene. Bavua bamanyishe kabidi ne: mbalongolole dienzulula dia mukanda wa Kalasa ka Mudimu wa Bumpanda-njila ku ndekelu kua tshidimu tshia mudimu tshia 2004. Ku kakese ku kakese, bampanda-njila ba matuku a bungi bakavua babuele mu kalasa aka nebabuele mu tulasa muikala kabidi bampanda-njila bapiabapia.
Ku diambuluisha dia Nzambi ne dia mapa adi bantu bafila mbibake Nzubu ya Bukalenge ya bungi, nangananga mu matunga mudi bantu ne dimona dikese. Bu mudiku dijinga dikole bia biakudia bia mu nyuma pa buloba bujima, didiundisha dia nzubu ya filiale mu matunga a bungi didi dienda dienzeka. Broshire wa Ikalayi ne muoyo wa kashidi ne disanka pa buloba! udiku mpindieu mu miakulu 299, bungi busanga bukadibu bapatule budi bua broshire miliyo 139; bua mukanda wa Dimanya didi difikisha ku muoyo wa kashidi mbupite pa miliyo 93 mu miakulu 161; ne bua broshire wa Ntshinyi tshidi Nzambi utulomba? miliyo 200 mu miakulu 267.
Tudi kabidi tujingila bantu 258 845 bavua balambule mioyo yabu kudi Yehowa pa kutambula mu mâyi mu tshidimu tshia mudimu tshishale etshi difika dilenga! Nansha mudi ditua dienu dia Bukalenge bua Nzambi nyama ku mikolo dinuvuije bantu badi Satana mutue mutu, ndikupeteshe mabenesha mavule a kudi Yehowa ne bukubi bua mu nyuma mu lubilu luudi wenda unyema. (Eb. 12:1, 2; Buak. 12:17) Bushuwa, ikala mutuishibue ne: “utu wakulama kena ulala tulu.”—Mus. 121:3.
Mvese wa tshidimu tshia 2004 udi wamba ne: “Nuikale batabale . . . Nuikale badilongolole,” mmulue anu pa dîba diende menemene. (Mat. 24:42, 44, MMM) Dîyi dia Nzambi didi difuanyikija bena Kristo ne bena luendu mu ndongoluelu eu wa malu udi mutangile ku lufu. (1 Pet. 2:11; 4:7) Nunku, tudi ne bua kutuishila mêsu anu pa malu a mu nyuma, kulama nsombelu wetu mupepele ne kuikala kukenketa mitshima yetu bimpe. “Dragon munene” udi ukeba bua kutubutula, ujinga bua tuetu kufuanangana ne bena panu.—Buak. 12:9.
Dishala dietu batabale didi ne mushinga ne didi dituambuluisha bua kubala Bible dituku dionso. Kubala eku kudi mua kutuambuluisha bua ‘Eyowa wetu ikala anu Eyowa’ mu dikumbaja dia mutshipu wetu ne bua ‘tulamata ku tshibangidilu tshia dieyemena dietu too ne ku nshikidilu.’ (Yak. 5:12; Eb. 3:14) Dibala dia Bible dituku dionso didi mua kutuambuluisha kabidi bua kuvuluka mudi bena panu basesuke ku mikenji ya Nzambi idi kayiyi mua kushintuluka. (Mal. 3:6; 2 Tim. 3:1, 13) Dimanya dia mu Bible didi mua kutuambuluisha bua kukina ‘nsumuinu yakambabu ku budimu bua bantu’ ne kushala ne lulamatu kudi Yehowa.—2 Pet. 1:16; 3:11.
Baledi, mu dikolesha dienu dia bana mu dibela ne didimuija bia Yehowa, nudiku nubambuluisha bua badifundile bipatshila bia mu nyuma ne bua ‘kuikalabu batabale’ anyi? (Ef. 6:4) Nudiku nubambuluisha bua kumonabu matuku abu atshilualua bu muvua Yezu, muntu wa meji mapite a bonso batu pa buloba apa umona ende anyi? Yezu uvua mua kulua muenji wa mabaya wa dipoko, mupatudi wa bintu bipiabipia ne munganga wa katshia ne katshia, kadi wakadifila mu mudimu wa ku dîba ne ku dîba. Tshilejilu tshiende tshinusake bua kuambuluisha bana benu bua bateke malu a Bukalenge pa muaba wa kumpala mu nsombelu wabu.
Kasumbu ka mupika wa lulamatu, kadibu baleje mpala kudi Kasumbu Kaludiki, kadi kanuela tuasakidila wa manza tente nuenu bena mu “musumba munene” bua munudi batuambuluishe bua kukumbaja mudimu wetu wa ‘kuyisha lumu luimpe lua bukalenge kudi bantu bonso ba pa buloba.’ (Buak. 7:9; Mat. 24:14, 45) Nuenu bana betu basuibue, nuikale batuishibue bua dilaya dia Yehowa edi didi dileja ne: mmuvuluke ‘mudimu wenu ne dinanga dinuakaleja bua dîna diende, panuakakuatshila bansantu mudimu ne panutshidi nubakuatshilawu.’ (Eb. 6:10) Paudi ubala malu adi asankisha bikole malonda mu mukanda wa Annuaire, ikala mumanye ne: udi muenze tshiebe tshitupa tshia mudimu tshia mushinga mu difila bumanyishi ebu pa buloba bujima.
Tangilayi matuku atshilualua ne muoyo mukole eku nutungunuka ne ‘kutangila too ne ku dipingaja dia difutu,’ kanuyi nuanyisha bua muntu anyi ba-demon banupangishadi to. (Eb. 11:26; Kolos. 2:18) Eyowa, eyemenayi Yehowa, bashindike ne: neambuluishe bantu bonso badi bamunange bua kupeta muoyo wa bushuwa.—Yone 6:48-54.
Nuikala bamanye ne: tudi ne disanka bua kuenza nenu mudimu pamue bua butumbi bua Yehowa.
Bana benu,
Kasumbu Kaludiki ka Bantemu ba Yehowa