‘Tutumbishayi pamue Dîna diende’

1. Ntshikondo kayi tshituapeta tshia kutumbisha dîna dia Nzambi pamue, ne ntshinyi tshitudi mua kuenza kubangila ku mpindieu mu didilongolola?

¹ Mufundi wa Misambu wakimba ne: ‘Tumbishayi nanyi Yehowa, tunemeke bietu dîna diende diatshimue.’ (Mus. 34:3) Mpungilu wetu wa Distrike wa “Tuendayi ne Nzambi” utudi bindile kumpala eku neatupeshe mushindu wa tuetu kutumbisha dîna dia Yehowa pamue ne bana betu ba bungi badi bafuma mu bisumbu bishilashilangane. Ukadiku mutuadije kudilongolola bua muaba wa kutudila, bua makuta a njila ne bua kulomba dikisha ku mudimu anyi? Mbimpe tuetu kulongolola malu aa kumpala kua dîba.​—Nsu. 21:5.

2. Bua tshinyi bidi ne mushinga bua kufika kumpala kua dîba mu mpungilu?

² Patudi tufika pa muaba wa mpungilu: Kudi malu a bungi a kuenza patudi tubuela mu mpungilu. Kujuka kumpala kua dîba bua kuya mu mpungilu nekutuambuluishe bua kuepuka njingakanyi idi mua kufika, kudi kutuambuluisha bua kumona mushindu wa kusomba pa miaba yetu pa dîba bua kuimba musambu wa kumpala ne muoyo mujima ne kuteleja disambila. (Mus. 69:30) Kumpala kua tshitupa tshionso kutuadija, mulombodi wa tshitupa atshi neasombe ku tshiakuidi padi mijiki ya Bukalenge ya ntuadijilu yenda yimba. Dîba adi tuetu bonso netusombe pa miaba yetu kumpala kua dîba bua programe kutuadijaye mu bulongame.​—1 Kol. 14:33, 40.

3. Mmunyi mutudi mua kuleja ne: tudi tuangata bakuabu ne mushinga patudi tukuatshila miaba?

³ Dîyi dia Nzambi didi ditulomba bua tuenze ‘malu etu onso ne dinanga.’ (1 Kol. 16:14, Mukanda wa Mvidi Mukulu [Katolike, MMM]) Tuleje bakuabu kanemu padibu babueja bantu pa dîba dia 8:00 wa dinda, nanku tuepuke dinyemakana, difuilakana, disakilangana bua kukuata miaba mimpe itudi basue kumpala kua bakuabu. Udi ne bua kulaminyina miaba anu bua bena mu dîku diebe ne bua aba banuaya nabu njila umue.​—1 Kol. 13:5; Filip. 2:4.

4. Ntshinyi tshiudi mua kulongolola bua biakudia bia mu dikisha, ne mmunyi mudi dilongolola edi ne mushinga?

⁴ Suaku wambule biakudia biudi mua kudia mu mpungilu mu tshikondo tshia kuikisha pamutu pa kulua kuya pambelu bua kukeba tshiakudia. Kuenza nunku nekuambuluishe bantu bonso ku dipeta disanka dia kusomba pamue ne kuyukila malu adi akoleshangana ne kuikala pabuipi bua tshitupa tshia mu mapingaja. Kuoku mushindu, tshilaminu tshia biakudia tshikese ke tshimpe tshia kulua natshi bua kumona mua kutshiteka muinshi mua nkuasa. Mbakandike bintu bia kuelela biakudia bipite bunene, milangi ne maluvu mu mpungilu.

5. Ndilongolola kayi didiku bua bakulakaje ne bua balema?

⁵ Bua bana betu bakulakaje ne balema, nebalongolole muaba muimpe wa kusombelabu. Kuoku mushindu, muaba eu udi ne bua kuikala muimpe bua kubakuba ku bintu bu mudi mvula ne munya. Dimanyisha edi ndia kuenza kumpala kua tshitupa tshia kumpala kutuadijatshi.

6. Tudi mua kulongolola mutshima wetu bua dilongesha dituapeta mushindu kayi?

⁶ Biakudia bia mu nyuma mbituindile: Mukalenge Yehoshafata uvua ‘mulongolole mutshima wende bua kukeba Nzambi mulelela.’ (2 Kul. 19:3, NW) Mmunyi mutudi mua kulongolola mutshima wetu kumpala kua mpungilu? Biena-bualu bidi mu dibeji dia ndekelu dia Réveillez-vous! wa dia 22 Lumungulu ne wa dia 8 Kabalashipu bidi bifila ka-diosha ka muikala biakudia bia mu nyuma bidi bituindile kumpala eku. Bua tshinyi kubenga kukeba dîba bua kuelela meji pa biena-bualu abi, kudianjila kupeta lungenyi pa biakudia bia mu nyuma bidi Yehowa mutulongoluele? Kulongolola mutshima wetu kudi kumvuija kulomba Yehowa diambuluisha bua tumvua dilongesha dituapeta mu mpungilu ne bua kuditumikila mu nsombelu wetu.​—Mus. 25:4, 5. 

7. Ndijinga kayi ditudi nadi, ne mbua tshinyi?

⁷ Tuetu bonso tudi dijinga ne kulonga malu mavule a mu Dîyi dia Nzambi adi mua kutufikisha ku dikola too ne ku lupandu. (1 Pet. 2:2) Nenku tudilongololayi bua kubuela mu Mpungilu wa Distrike wa “Tuendayi ne Nzambi” ne ‘tutumbishayi Yehowa diatshimue.’​—Mus. 34:3.

[Kazubu mu dibeji 3]

Mishindu ya kutumbisha Dîna dia Nzambi

▪ Kudilongolola kumpala kua dîba

▪ Kuleja bakuabu dinanga

▪ Kulongolola mutshima wetu