Biakudia bia mu nyuma pa dîba diakane
1. Mmunyi mudi Yehezekele 36:29 ne bua kukumbana matuku etu aa?
1 Mukalenge Yehowa udi wamba ne: ‘Nemmeneshe ntete ya bukula, nyivudije, tshiakunutumina kabidi tshiyole tshia nzala.’ (Yeh. 36:29, MMM) Mêyi a tshiprofete aa adi akumbanyina bantu ba Nzambi lelu. Mu ngakuilu wa mu tshimfuanyi, Yehowa uvua wenzeja bua ntete idi ipesha bantu bukole ikuama ya bungi bua bantu bende. Biakudia bia mu nyuma bitubu bapatula mu mpungilu yetu ya distrike bitu bileja mudi mêyi aa malelela.
2. Mmunyi muvua Yehowa mukuate mudimu ne mpungilu ya distrike bua kufila biakudia bia mu nyuma mu tshikondo tshiabi?
2 Mu mpungilu wa distrike wakenzeka ku Columbus, mu provense wa Ohio, mu tshidimu tshia 1931, Yehowa wakalombola bantu bende bua kuangatabu dîna dipiadipia dia Bantemu ba Yehowa. (Yesh. 43:10-12) Mu 1935 bakasunguluja musumba munene udibu bakula bualu buawu mu Buakabuluibua 7:9-17. Mu 1942, Muanetu Knorr wakenza muyuki uvua ne tshiena-bualu tshia ne: “Ditalala nedinenge anyi?” Muyuki eu wakapesha bantu bukole bua kuyisha pa buloba bujima ne pashishe bakasa kalasa ka Gilada (Tshilongelu tshia Bible tshia Société Watchtower). Nansha mudi imue mpungilu mishale kayiyi kupua muoyo, mpungilu yonso utu muikale muaba udibu bafidila biakudia bia mu nyuma mu tshikondo tshiabi.—Mus. 23:5; Mat. 24:45.
3. Ntshinyi tshitudi ne bua kuenza bua biakudia bia mu nyuma bia mu mpungilu wetu wa distrike kutuambuluishabi?
3 Ndilu webe udiku muimpe anyi? Bidi mua kuenzeka bua muntu kuikalaye ne biakudia bivule, kadi eku wenda uboba ne nzala padiye kayi ubidia to. (Nsu. 26:15) Bidi bia muomumue kabidi mu malu a mu nyuma. Mu imue mpungilu kuvua bantu bavule bavua batambakana batua eku ne eku anyi benda bayukila padi mpungilu wenda wenzeka. Nansha mudi disomba dietu pamue ne bena Kristo netu ne diyukila pa malu adi akolesha ku muoyo dikala tshimue tshia ku bintu bitu bienzeka mu mpungilu, tshikondo tshimpe tshia kuyukila nunku nkumpala ne kunyima kua tshitupa tshia mpungilu. (Muam. 3:1, 7) Biwikala kuyi musomba pa muaba webe ne kuyi muteya ntema mikole, neujimije tshitupa tshikuabu tshia malu a mushinga mukole. Bakulu badi benza mudimu mu bibambalu bia mpungilu ne bana betu bakuabu badi ne midimu ya kuenza badi imue misangu mua kuyukila pa amue malu pa bidi bikengedibua mu tshikondo tshidi programe wa mpungilu wenda wenzeka. Bikalaku kakuyi malu a nunku, badi ne bua kufila tshilejilu tshimpe pa kuteleja programe ne ntema ya bungi. Muntu nansha umue wa kutudi kêna ne bua kulengulula biakudia bia mu nyuma bidibu balongolole nansha.—1 Kol. 10:12; Filip. 2:12.
4. Mmushindu kayi utudi mua kuleja dianyisha dietu bua biakudia bia mu nyuma bidi Yehowa utupesha?
4 Ndisankapu kayi ditudi nadi bua bulelela bua mu nyuma budi Yehowa utupesha bushilangane ne malongesha a dishima adi kaayi ambuluisha adi mu Bukua-Buena-Kristo! (Yesh. 65:13, 14) Umue mushindu utudi mua ‘kuleja muoyo wa dianyisha’ ng’wa kuangata mpungilu bu mushindu udi Yehowa utulongesha. (Kolos. 3:15) Teya ntema ku miyuki idi bana betu benza, kadi ki nku tshidibu to, ne angata malu adibu bakula bu mikenji mifume kudi ‘Muyishi webe’ munene. (Yesh. 30:20, 21; 54:13) Teya ntema mikole. Funda malu adi ne mushinga. Balulula malu manene a mu programe webe ku dilolo dionso. Teka mu tshienzedi malu audi ulonga.
5. Mmalu kayi atutu tusankila mu mpungilu ya distrike?
5 Mpungilu yonso udi wenzeka kumpala kua Armagedone, nansha yeye wenzekela mu kamponyi ka bena tshimuanyi, mu bitupa bia maloba bidi mvita itua ipela, anyi mu matunga adi ne ditalala divule, udi uleja mutudi batshimune Satana! Bu mutudi mu buobumue ne bana betu, tudi ne disanka dia kudisangisha nabu pamue mu mpungilu ya distrike. (Yeh. 36:38) Tudi bamanye bimpe ne: mu mpungilu eu kabidi, Yehowa mmutulongoluele ‘biakudia dîba diakane’ ne dinanga dionso.—Luka 12:42, MMM.
[Kazubu mu dibeji 4]
Leja dianyisha bua mêsa a Yehowa
▪ Teya ntema mikole
▪ Funda malu adi ne mushinga
▪ Balulula malu manene a mu programe webe mu dilolo dionso
▪ Teka mu tshienzedi malu audi ulonga