Nuikale bakezuke mu ngikadilu yenu yonso
1. Bua tshinyi bidi ne mushinga bua kuikala bakezuke mu bienzedi bietu bionso?
1 Bu mutudi basadidi ba Yehowa Nzambi wa bukezuke, udi utulomba bua tuikale petu bakezuke mu malu onso atudi tuenza. (1 Pet. 1:15, 16) Mbuena kuamba ne: tudi ne bua kutumikila mikenji ya Yehowa mu malu onso atudi tuenza mu nsombelu wetu. Mpungilu wa distrike wa tshidimu etshi neatupeteshe mushindu wa kuleja ngikadilu milenga.
2. Tudi mua kuleja ngikadilu mimpe pa muaba utudi batudile mushindu kayi?
2 Miaba ya kutudila: Nansha buobu mua kutuakidila ku nzubu ya bena Kristo netu, kua balela betu anyi ku Nzubu wa Bukalenge, tudi ne bua kulonda malu aa: (1) Kumpala kua kulamba, ebeja muanetu udi mukuakidile anyi bana betu badi batangila Nzubu wa Bukalenge bua kumanya tshia kuenza bua kuepuka njiwu. (Bala Mudimu wetu wa Bukalenge wa Tshisua-munene 2003, dibeji 3.) (2) Kunyangi tshintu nansha tshimue ku bionso bidibu bateke bua benyi to. Tangila malu abidi a kulama misangu yonso mu lungenyi: enza malu ne nkatshinkatshi ne meji. (3) Mankenda mmuanabu ne ditshina Nzambi. Misangu yonso kumpala kua kupatuka, ushiye mu nzubu mulongolola bimpe, mutoke ne muikale ne mankenda. (4) Leja mamuma a nyuma muimpe kudi bakuabu, nansha kudi eu udi mukuakidile anyi kudi bana betu bakuabu bena Kristo baudi nabu mu nzubu umue.—Gal. 5:22, 23.
3. Mmunyi mudi ngikadilu ya bana ba Bantemu ikemesha bakuabu?
3 Baledi ne bana: Batu banyisha bikole bana betu balela bua ngikadilu yabu mimpe kumpala kua Yehowa ne kua bulongolodi buende budi bumueneka ne mêsu. Bantu batu bakema bikole patubu bamona bana bateleja ne ntema yonso, bafunda amue malu ne babulula pabu Bible bua kubala padi ngamba-malu ufila mvese. Kadi, bidi bimueneka se: bamue bana kabatu bateya ntema bu mudibi bikengela to, bionso ebi bua dipanga kubatabalela dia baledi. (Nsu. 29:15) Bana kabena ne bua kushala kabayi ne muntu udi ubatangila to. Bamue batu baya ku nkumba tshianana tshianana. Badi balomba muledi wabu anyi muntu mukole mukuabu aya kubafila. Mbia meji bua kuikala ne ndambu wa mâyi bua kuepuka dijuka dîba dionso. Mu mêba a dikisha, tudi ne bua kutangila bana betu bua kabikadi banyemakana mu njila idi bantu bapitshila bua kuepuka dikuluka anyi dikebesha njiwu mikuabu. Dipanga bulongame dia mushindu eu didi mua kulela tunyinganyinga ne kupendesha dîna dia Yehowa tshianana. Ngikadilu yetu milenga idi itumbisha Yehowa ne ipesha dilongesha dia mu Bible mushinga wadi.—Tito 2:7.
4. Mmunyi mutudi mua kuangata bakuabu ne mushinga mu tshikondo tshia kudia?
4 Biakudia: Kukadi ndambu wa bidimu kabatu bafila biakudia mu mpungilu kabidi to, muntu yonso udi mua kulua ne biende biakudia bua kudia mu dikisha dia mu midi, bikalaye musue kuenza nanku. Bavua batubele bua kulongolola biakudia bitu bipepele mu tshifu ne bidiishi bia mubidi, tshilejilu bu mudi: mampa mela munyinyi munda, bimuma (bu mudi bibote), tumbele, bitumbula anyi kato. Katuena mua kujinga bua kudia biakudia bidi ne bujitu bifuane mua kulua kututekesha ne kutupangisha mushindu wa kulonda programe wa mu mapingaja. Bua pa bidi bitangila bia kunua, mbilombibue bua kulua ne mâyi, kafe anyi tshiayi. Ne bintu ebi mbia kuela mu tshintu tshidi mua kubilama ne luya anyi mashika peshi mu tshintu kayi tshikuabu tshionso kadi tshidi katshiyi mua kutayika bua kuepuka njiwu. Kabena banyisha bua muntu kulua ne maluvu mu mpungilu to. Bikala muntu yonso mulue ne biende biakudia ne biakunua bua bena mu dîku, nebituambuluishe bua kuepuka diya kusumba biakudia kudi basumbishi ba biakudia ba pa muaba udi mpungilu muikale wenzekela. Bivua bimueneka ne: bantu badi baya kukeba biakudia kudi basumbishi abu, ke batu pa tshibidilu bimansha mabeji panshi, muaba wa mpungilu uula tente ne mabeji, tubudimbu, tutolotolo ne bikuabu. Eu mmushindu wa kupepeja muaba wa mpuilu utudi tuangata bu muaba wa ntendelelu mu tshikondo tshia mpungilu. Basumbishi ba bintu kabena ne bua kubuela muaba udi mpungilu wenzekela to. Yehowa udi Nzambi mukezuke ne bantu badi bamutendelela badi ne tshia kuikala pabu bakezuke.—1 Pet. 1:16.
5. Bua tshinyi ki mbimpe bua kulamba biakudia padi mpungilu wenda wenzeka?
5 Mu imue mpungilu kabidi bavua bamone bamue bantu balamba biakudia dîba divua mpungilu wenda wenzeka. Katuena ne bua kuenza kabidi nunku to. Tudi basue kuteya ntema ne kuteka malu a mu nyuma pa muaba wa kumpala. Katuena basue kukebesha ditanaji kudi bakuabu pa kubanda kupueka kakuyi bualu to. Bua bana betu badi balambila pa mbabula, badi ne bua kuanji kuebeja bana betu badi batangila malu a mpungilu bua kubalejabu muaba udibu mua kuyitemeshila kumpala kua kulamba. Mbimpe kuikala ne ntema bua kuepuka njiwu.—Luka 10:38-42.
6. Ngikadilu milenga idi ilomba bua kuenza tshinyi tshikuabu muaba wa mpungilu?
6 Mu mpungilu: Tudi ne bua kutamba kuleja ngikadilu yetu milenga nangananga pa muaba wa mpungilu. Suaku ulonde bulombodi bua bakididianganyi badi miaba ya disomba ne ku tshimanyikilu tshia mashinyi, makalu anyi mioto. (Eb. 13:17) Mbimpe bua bena dîku dimue kusombabu muaba umue pamutu pa bana babu kudisombelabu pa wabu muaba ne bana nabu. Nudi ne bua kuenza bua se: telefone yenu ya ku bianza kayipeshi bakuabu ditanaji to.
7. Mmunyi mudi ngenzelu wetu wa malu mua kutumbisha Nzambi mu mpungilu?
7 Ngikadilu yetu mimpe idi itutapulula ne bantu ba mu bulongolodi ebu ne idi itumbisha Nzambi wetu. (1 Pet. 2:12) Ngikadilu milenga ya Bantemu ba Yehowa itu imueneka patoke ku mêsu kua bantu mu mpungilu. Ke bualu kayi enza muebe muonso bua kuikala mukezuke mu ngikadilu yebe yonso.
[Kazubu mu dibeji 5]
Mua kuleja bukezuke mu ngenzelu wa malu
▪ Nemeka mikenji ya muaba uudi mutudile
▪ Lama bana bimpe menemene
▪ Angata bakuabu ne mushinga