Mmuenekelu wetu ikale muimpe

1. Bua tshinyi tudi ne bua kutangila tshilumbu tshia mmuenekelu wetu patudi tuenda tudilongolola bua mpungilu wa distrike?

¹ “Bantemu ba Yehowa mbantu bimpe be! Nudi bantu ba malu makane ne mvuadilu wenu mmuimpe mutambe ne nudi ne kanemu ka bungi.” Mêyi aa ngakamba mutangidi kampanda wa nzubu wa tshilala benyi bua bana betu bavua balue bua mpungilu wa distrike wa tshidimu tshishale. Mu mpungilu mukuabu, muena mudimu kampanda wa mu nzubu wa tshilala benyi wakamba ne: “Bidi bimueneka patoke ne: nutu nuvuala bua kusankisha Nzambi.” Eyowa, bantu bakuabu batu bamanye bantu batu balua bua mpungilu. Ke bualu kayi mbimpe mvuadilu wetu ikale “muakanangane ne lumu luimpe,” bua bantu badi kabayi Bantemu batuanyishe misangu yonso ne bua kuleja patoke ne: tudi bena mudimu ba Nzambi. (Filip. 1:27) Bu mutudi tuenda tudilongolola bua mpungilu wa distrike, bidi bikengela kuela meji kumpala kua dîba bua mmuenekelu wetu.

2. Bua tshinyi mbikole bua kuvuala ne kudilengeja mu mushindu muimpe?

² Yakobo wakafunda ne: ‘Meji adi afuma mu diulu diambedi adi mimpe.’ (Yak. 3:17) Dileja buimpe anyi budipope ku mmuenekelu wetu didi mua kuikala bualu bukole. Bualu bulongolodi bubi bua Satana budi busaka bantu bua kuangata mvuadilu idi kayiyi ileja budipuekeshi, idi ijulangana majinga mabi, ne miodele mibi idi bantu kabayi banyisha to. (1 Yone 2:15-17) Ke bua tshinyi, patudi tuangata mapangadika bua mvuadilu ne ndengejilu wetu wa mubidi, tudi ne bua kuteya ntema ku didimuija dia mu Bible edi: ‘Kupidia malu adi kaayi a Nzambi ne nkuka ya pa buloba, kuikala ne meji mapuekele munkatshi mua bena pa buloba ebu.’ (Tito 2:12) Katuena basue kulenduisha bakuabu ku mmuenekelu wetu to, nansha buobu bikala bana betu, nansha bena ku nzubu ya tshiala benyi ne bena ku restoran anyi bakuabu badi batutangila.​—1 Kol. 10:32, 33.

3. Nnkonko kayi idi mua kutuambuluisha bua kukenketa bimpe tshimuenekelu tshietu?

³ Mvuadilu muimpe wa budipuekeshi: Paudi wenda udilongolola bua mpungilu, udiele nkonko eyi: ‘Mvuadilu wanyi udi uleja budipuekeshi peshi udi ukoka ntema ya bantu kundi? Mvuadilu udiku uleja kanemu bua mmuenenu wa bakuabu anyi? Buluze buanyi budi bushiya makaya onso pambelu anyi? Mbuipi anyi? Bilamba bianyi mbikuata pambidi bizola mubidi wanyi anu mushindu utuwu anyi? Bidiku ne mankenda ne kabiyi binunka anyi? Pandi musue kudia mu nzubu wa tshiala benyi anyi nsua kupitshisha lutetuku ku dilolo padi mpungilu ujika, ndiku ne tshimuenekelu tshimpe ne ndi ne mankenda bu muena mudimu wa Nzambi anyi, peshi ndi ne bilamba bia manyanu bidi kabiyi bikumbana bua bantu badi balue mu mpungilu bavuale kamanyishilu anyi? Mvuadilu wanyi wa mu tshikondo tshia dijikija lutetuku udiku ungenza bundu, umpangisha mua kuyisha padi mpunga umueneka anyi?’​—Lomo 15:2, 3; 1 Tim. 2:9.

4. Mmunyi mudi bakuabu mua kutuambuluisha bua kuleja mmuenekelu muimpe?

⁴ Tudi mua kuanyisha mmuenenu ya bena Kristo bapie. Bakaji basela badi ne bua kuebeja babayabu bua mushindu udi bantu bakuabu bamona mvuadilu wabu. Baledi batshinyi ba Nzambi badi mua kuambuluisha bana babu mu tshilumbu etshi tshia mvuadilu. Kabidi, bana betu ba bakaji bakole ba kunemeka badi mua ‘[kufikisha bansongakaji ku lumvu] . . . bua bikale ne meji mimpe’ ku mmuenekelu wabu ‘bua dîyi dia Nzambi kadipendibu.’ (Tito 2:3-5) Mikanda yetu idi ne bimfuanyi anyi foto idi mua kutuambuluisha pa mushindu wa kuvuala udi muimpe ne wa budipuekeshi.

5. Mmunyi mutudi mua kutumbisha tuetu bonso Yehowa mu tshikondo tshia mpungilu?

⁵ Tutumbishayi Yehowa: Mpungilu ya distrike idi itupetesha tuetu bonso too ne badi ne midimu ya kuenzamu mushindu wa kutumbisha Yehowa. Bushuwa, ngikadilu wetu wa bena Kristo ne ngakuilu wetu nebimutumbishe. Kadi tshintu tshia kumpala tshitu bantu batumanyina tshidi mvuadilu wetu ne ndengejilu wetu wa nsuki ne mubidi. Buonso buetu tutumbishayi Yehowa ku mmuenekelu wetu mulenga.​—Mus. 148:12, 13.

[Kazubu mu dibeji 6]

Diambuluisha bua mmuenekelu muimpe

▪ Dîyi dia Nzambi

▪ Didikenketa

▪ Mibelu ya bakuabu

▪ Mikanda yetu