Mijiki idi yoyi ipeteshangana ditalala

¹ Misambu ne mijiki mbimue bia ku bintu bia mushinga mu ntendelelu mulelela. Mu Isalele wa kale, Asafa ne bana babu bakimba, bamba ne: ‘Nusakidile bienu Yehowa. Numuimbile misambu, numuimbile misambu ya kumutumbisha nayi, nuyikilangane bua malu ende onso a kukema.’ (1 Kul. 16:8, 9) Lelu’eu, tutu tuimbila Yehowa misambu mu bisangilu bietu. (Ef. 5:19) Eu mmushindu mutambe buimpe wa kutumbisha dîna diende.​—Mus. 69:30.

² Kuteleja bande ya Misambu ya Bukalenge mimba kudi kasumbu ka bamanyi ba mijiki, kudi kuuja lungenyi luetu ne malu a mu nyuma. Muanetu wa bakaji kampanda wakamba ne: “Padi bande wenda wimba, mêyi a misambu adi amvuila mu mutu. Eu mmushindu muimpe mutambe wa kuikala ne Yehowa mu lungenyi luanyi pandi ngenda nteleja mijiki.”​—Filip. 4:8.

³ Bikondo bia kuyiteleja: Kuteleja Misambu ya Bukalenge kumbelu kudi kufila nsombelu mulenga wa mu nyuma udi ufikisha dîku ku dikala mu ditalala. Bena dîku kampanda bakafunda ne: “Tutu tuteleja [mijiki] eyi misangu ne misangu kumbelu ne mu mashinyi, kayitu itutonda to, bualu itu mienza bimpe be! Misangu ya bungi, Misambu ya Bukalenge itu itupesha ditalala mu lungenyi patudi tudilongolola bua kuya mu bisangilu anyi patudi mu mashinyi batangile mu mpuilu kampanda.” Muanetu wa bakaji mukuabu wakamba yeye ne: “Kuyiteleja pandi ngenza midimu ya ku nzubu kudi kumpesha disanka dia bungi; nganyi udi mua kuela meji ne: nengikale ne disanka pandi mbunya bilamba? Ntu nteleja mijiki eyi padi malu mantonde. Mijiki eyi itu ikoleshangana bikole be! . . . Musambu wonso udi ungenza disanka.” Kudiku bikondo bidi mijiki eyi milenga mua kuikala ikuambuluisha anyi?

⁴ Mijiki ya bungi idiku lelu’eu idi ne lungenyi lua bena mu bulongolodi ebu. Baledi badi mua kuambuluisha bana babu bua kuanyisha mijiki milenga pa kuteleja bande ya Misambu ya Bukalenge. Balongi ba Bible ba bungi ne bantu bakuabu badi basankidila bulelela badi pabu mua kusanka bua kuteleja misambu milenga eyi idi itumbisha Yehowa ne idi ilenga mutshima.​—Mus. 47:1, 2, 6, 7.