Leja dianyisha diebe
1 Nansha mutudi mu ‘matuku a malu makole,’ tudi ne malu a bungi atudi mua kuelela Yehowa tuasakidila. (2 Tim. 3:1) Bualu bua kumpala, tudi ne dianyisha dikole bua muvuaye mutume Muanende bua kutufuila. (Yone 3:16) Tshikuabu tshintu, nansha mudi bantu badi mu bitendelelu bia dishima bikale ne nzala ya mu nyuma, tuetu tudi tusanka bualu tudi ne biakudia bia mu nyuma bia bungi. (Yesh. 65:13) Tudi munkatshi mua dîku dinene didi ne bantu pa buloba bujima ne tudi ne disanka dia pa buadi dia kutungunuja ntendelelu mulelela. (Yesh. 2:3, 4; 60:4-10, 22) Mmunyi mutudi mua kuleja Yehowa dianyisha dietu bua mabenesha a bungi adiye utupesha?—Kolos. 3:15, 17.
2 Mudimu muenza ne disanka ne muoyo umue: Pavua mupostolo Paulo wakula bua kufila kua bintu, wakafunda ne: ‘Nzambi udi musue muena kupa udi ufila ne disanka.’ (2 Kol. 9:7) Tudi mua kuela mudimu utudi tuenzela Nzambi mu tshidi mvese eu wamba. Dianyisha dietu didi dimueneka mu mushindu utudi tusankidila bulelela, disanka ditudi nadi mu bisangilu, lukunukunu lutudi nalu bua mudimu wa buambi ne disanka ditudi nadi patudi tuenza disua dia Nzambi.—Mus. 107:21, 22; 119:14; 122:1; Lomo 12:8, 11.
3 Mikenji ya Isalele wa kale kayivua ileja bungi buvua muntu ne bua kufila bua milambu kampanda to. Mutendeledi yonso uvua uleja dianyisha diende pa kufila “bintu bilondeshile bungi buvua [Yehowa]” mumupeshe. (Dut. 16:16, 17, Mukanda wa Mvidi Mukulu [Katolike, MMM]) Bia muomumue lelu’eu, mutshima muule tente ne dianyisha neutusake bua kuenza mudimu wa bungi wa kuyisha Bukalenge ne kuvuija bantu bayidi bilondeshile nsombelu wetu. Ngondo muisambombo, wa muanda-mutekete ne wa muanda-mukulu itu itupesha mishindu mikuabu ya kuleja dianyisha dietu. Bamue batu bavudija dîba didibu bapitshisha mu buambi anyi bangata bumpanda-njila buambuluishi padibu bapeta dikisha ku mudimu anyi mu kalasa peshi padibu bapeta mushindu. Udiku mua kuvudija mudimu webe wa buambi anyi?
4 Buule tente ne muoyo wa dianyisha: Disambila mmushindu munene utudi mua kuela Yehowa tuasakidila. (1 Tes. 5:17, 18) Dîyi dia Nzambi didi ditusaka bua kuikala “buule tente ne muoyo wa dianyisha [Nzambi].” (Kolos. 2:7, MMM) Nansha tuetu bikale ne midimu ya bungi anyi bikale ne ntatu, tudi ne bua kuikala tuela Nzambi tuasakidila mu masambila etu a matuku onso. (Filip. 4:6) Eyowa, ku mudimu wetu wa buena-Kristo ne mu masambila etu, tuikalayi ‘tuanyisha [Nzambi] bikole.’—2 Kol. 9:12, MMM.