‘Tulejayi Dianyisha’

¹ Patuvua bana, bavule ba kutudi bakalonga mua kuamba ne: “bu wewe mua kuanyisha” ne “tuasakidila” padi muntu utuleja kalolo ne bulenga. Paulo udi utubela bua ‘kuleja dianyisha’ misangu yonso, ne tudi ne bua kuleja dianyisha kudi Yehowa. (Kolos. 3:15, 16, NW ) Kadi mmunyi mutudi mua kuleja dianyisha dietu kudi Mutufuki wetu Munene? Ntubingila kayi tua pa buatu tutudi natu tua kumuleja dianyisha?

² Mupostolo Paulo wakafunda ne: “Tuanyishe [“Nzambi,” NW] udi ututshimuina mvita mu dîna dia Mfumuetu Yezu Kristo!” (1 Kor. 15:​57, MMM) Tshidimu tshionso, mu tshikondo tshia Tshivulukilu, tutu tuvuluka dinanga dikena mikalu didi Nzambi ne Kristo batuleje pa kufila tshia-bupikudi tshidi tshitupetesha mua kutekemena nsombelu wa tshiendelele mu matuku atshilualua. (Yone 3:16) Bavule ba kutudi bakadi bafuishe munangibue kampanda, nunku tudi ne dianyisha dia bungi bua dibiishibua ku lufu dilaya kudi Yezu. Mutshima wetu udi uula ne dianyisha patudi tuelangana meji pa ditekemena dia kupanduka ku nshikidilu wa ndongoluelu eu, kakuyi kabidi difua nansha. (Yone 11:​25, 26) Mbikole bua kupeta miaku idi ikengela bua kuleja dianyisha dietu bua mabenesha a dikema atuapetela ku tshianza tshia Yehowa, mu Mparadizu utshilualua. (Buak. 21:⁠4) Ntubingila kayi tutambe buimpe tutudi mua kuikala natu bua ‘kuleja dianyisha’ kudi Nzambi?

³ Mushindu wa kuleja dianyisha dietu kudi Nzambi: Bushuwa, bidi biakane kuela Yehowa tuasakidila mu disambila bua bulenga buende. (Mus. 136:1-3) Tudi tudiumvua kabidi basakibue bua kumuleja dianyisha dietu mu mishindu mikuabu kabidi. Ne disanka dionso tudi ‘tutumbisha Yehowa ne bintu bietu bia mushinga,’ bua kuambuluisha ne bintu bia ku mubidi tshisumbu tshietu ne mudimu wa pa buloba bujima. (Nsu. 3:9) Tudi tutua bakulu nyama ku mikolo ne muoyo mujima ne tuenzejangana nabu mudimu, tuleja nunku dianyisha dietu kudi Yehowa bua diambuluisha didiye utupetesha ku butuangaji buabu. (1 Tes. 5:12, 13) Dituku dionso, tudi tuenza madikolela bua kuikala ne tshikadilu tshilulame tshidi tshitumbisha dîna dia Nzambi. (1 Pet. 2:12) Mishindu yonso eyi ya dileja dianyisha idi isankisha Yehowa.​—⁠1 Tes. 5:18.

⁴ Dileja dietu ditambe buimpe dia dianyisha: Kudifila ne anyima wetu mujima mu bumanyishi bua Bukalenge, kunemeka dîna dia Yehowa, kuleja dianyisha dietu mu disambila, kusanyika bulelela ne lulamatu, malu onso aa adi mishindu mitambe buimpe ya dileja dianyisha dia mu mutshima ditudi mua kulubuila Mutufuki bua bionso bidiye mutuenzele. Yehowa mmusue bua “bantu ba mishindu yonso bapandishibue” ne udi usanka pa kutumona tumuenzela mudimu wa tshijila udi wambuluisha dikumbana dia disua diende. (1 Tim. 2:3, 4, NW) Ke bua tshinyi bamanyishi bavule bàdì ne mushindu wa kuenza nunku badi bandamuna ku dibikila difila mu Mudimu wetu wa Bukalenge wa Luabanya pa kuikala bampanda-njila bambuluishi mu ngondo umue peshi ya bungi mu Lumungulu ne Kabalashipu. Mushindu mutambe buimpe wa ‘kuleja dianyisha’ kudi Nzambi ng’wa kudifila bikole mu mudimu. Netuikaleku bampanda-njila mu Lumungulu ne mu Kabalashipu anyi?

⁵ Tudi bapete ditekemena dilelela dia kuikala ne muoyo wa kashidi. Pa kudimona disemena ku dikumbana, tudi kabidi tupeta tubingila tuvule tua kutungunuka ne kuela Yehowa tuasakidila dituku dionso ne disanka.​—⁠Mus. 79:13.