Tudi dijinga ne Dilonga dia Mukanda dia Tshisumbu bua tshinyi?

1. Mmunyi muakafika Dilonga dia Mukanda dia Tshisumbu ku diledibua?

¹ Mu 1895, tusumbu tua Balongi ba Bible (dîna divuabu babikila Bantemu ba Yehowa) tuvua tumanyike ku dîna dia Tusumbu tua pa Kabundubundu tua Dilonga dia Bible. Mikanda ya L’Aurore du Millénium ke ivuabu balonga nayi Bible. Panyima pa matuku bakalua kuinyika tusumbu etu ne: Tusumbu tua bena Beloya tua Dilonga dia Bible. (Bien. 17:11) Pa tshibidilu, kasumbu ka bantu bungi butshintshikila kavua kadisangishila mu nzubu wa muanetu kampanda ku dilolo dîba divua bena kasumbu bumvuangane. Tusumbu etu ke tuakalua kulela tshitudi tubikila lelu ne: Dilonga dia Mukanda dia Tshisumbu.

2. Mmunyi mutudi mua ‘kukoleshangana ku muoyo’ mu dilonga dia mukanda?

² Dikoleshangana ku muoyo ne dibuelamu: Bu mudi tusumbu tua dilonga dia mukanda tuenza bua kuikala ne bantu anu bakese, bantu badimu badi ne mushindu wa kuakula misangu ya bungi bua kuleja ditabuja diabu patoke. Nanku ‘dikoleshangana ku muoyo mu ditaba dia muomumue ditudi nadi bonso’ ke tshipeta tshidi tshipatuka.​—Lomo 1:12, Mukanda wa Mvidi Mukulu [Katolike, MMM].

3, 4. Mmunyi mudi dilonga dia mukanda dituambuluisha bua kuenza mudimu wetu?

³ Dimona mushindu udi mutangidi wa dilonga dia mukanda ulongesha didi mua kutuambuluisha bua kumanya mua ‘kuludikila bantu njila mululame mu dîyi dia Nzambi dia bushuwa.’ (2 Tim. 2:15) Tangila bimpe ne longa mushindu udiye uleja ngenyi minene ya mu Bible idi mu mukanda unudi nulonga. Biobi biakanyine bua mukanda unudi nulonga, udi mua kuleja ngenyi minene ku diambuluisha dia diambulula dia nkomenu, wenza mudimu anu ne Bible nkayende. Tshilejilu tshiende tshilenga tshidi mua kutuambuluisha bua kuakaja ndongeshilu wetu mu mudimu wetu wa bena Kristo.​—1 Kol. 11:1.

⁴ Pa kumusha dilombola dia dilonga lumingu luonso, mutangidi wa dilonga dia mukanda udi kabidi ntunga-mulongo mu mudimu wa diyisha. Udi wenza programe muimpe bua mudimu wa diyisha mu diumvuangana ne mutangidi wa mudimu. Udi wambuluisha bantu bonso badimu bua kuenza mudimu wabu wa bena Kristo wa kuyisha lumu luimpe ne kuvuija bantu bayidi.​—Mat. 28:19, 20; 1 Kol. 9:16.

5. Ndiambuluisha kayi didi muntu ne muntu mua kupeta munda mua dilonga dia mukanda?

⁵ Mutangidi wa dilonga dia mukanda udi uditatshisha bua muntu yonso wa mu kasumbu ikale mukole mu nyuma. Udi uleja bualu ebu padiye mu bisangilu bia tshisumbu ne kabidi padiye uyisha pamue ne bena mu kasumbu kende. Udi kabidi ukolesha bana betu mu nyuma dîba dionso dituye uya kubatangila ku nzubu yabu. Muntu yonso udi ne bua kudiumvua bimpe bua kumonangana ne mutangidi wa dilonga dia mukanda bua kupeta diambuluisha dia mu nyuma dîba dionso didiye nadi dijinga.​—Yesh. 32:1, 2.

6. (a) Mmunyi muvua bamue bana betu bakoleshibue mu mikolo mu imue miaba pavuabu badisangisha mu tusumbu tukese? (b) Mmasanka kayi akadi dilonga dia mukanda dikupeteshe wewe?

⁶ Tukoleshanganayi: Mu matunga mudi mudimu wa bantu ba Nzambi mukandika, bana betu badi badisangisha mu tusumbu kukese. Muanetu wa balume mukuabu udi wamba ne: “Nansha muvuabu bakandike mudimu wetu wa bena Kristo, tuvua tudisangisha lumingu luonso pavuaku mushindu mu tusumbu tukese tua bantu bafike ku 10 too ne 15. Mu bisangilu tuvua tupeta bukole bua mu nyuma, buvua bufumina ku dilonga dia Bible edi ne disombeshangana ne bana betu panyima pa bisangilu. Mu dilondelangana malu atuvua bapete, tuvua tufika ku dimona ne: tuetu bonso tuvua ne mvita ya mushindu wa muomumue.” (1 Pet. 5:9) Tuetu petu, mu mushindu wa muomumue, tukoleshanganayi pa kuikala kubuela ne kuenza bionso bidi bikengela kuenza bua Dilonga dia Mukanda dia Tshisumbu kuendadi bimpe.​—Ef. 4:16.