Mushindu wa kuyisha miaba itu bantu basumbishila bintu

1. Diyisha muaba udibu bapanyishila bintu ndimpe ku tshinyi?

¹ Utuku musue kuyisha muaba utu bantu bakidila benyi bilenga anyi muaba uudi kuyi mua kupangila bantu kumbelu anyi? Udi mua kupeta muaba wa nunku anu mu teritware wa tshisumbu tshienu muine. Munyi? Udi mua kuya kubatangila miaba idibu bapanyishila bintu. Bambi ba lumu luimpe batu bayisha ku katanda ne katanda anyi makazen ne makazen batu bapatula bipeta bilenga misangu ya bungi.

2. Mmunyi munudi mua kulongolola mudimu wa diyisha mu teritware ya miaba idi bantu basumbishila bintu?

² Bimue bisumbu bidi ne miaba itu bantu basumbishila bintu mu teritware yabi. Muanetu udi utangila malu a teritware udi mua kulongolola tuarte tua pa buatu tudi tuleja teritware eyi. Karte ka teritware udi bantu basombele nansha yeye muikale ne miaba idibu basumbishila bintu, bidi bikengela kuleja patoke ne: miaba eyi ki nya kuenzela mudimu bu mudi muaba udi bantu basombele to. Mu imue teritware, badi mua kuenzela mudimu miaba idibu basumbishila bintu pamue ne idi bantu basombele. Biwikala kutu muanji kuteta kuyisha mu teritware wa mushindu’eu, udi mua kubanga ne butike ya mikese mikese.

3. Ntshinyi tshidi mua kutuambuluisha bua kuyisha bimpe ku makazen ne ku makazen?

³ Mbuelelu mupepele: Paudi uyisha ku makazen ne ku makazen, mbimpe kuvuala bu muutu uya mu bisangilu ku Nzubu wa Bukalenge. Mbimpe kabidi kusungula tshikondo tshidi basumbi ba bintu kabayi ba bungi to. Pikalaku mushindu, mbimpe kubuela paudi umona ne: kakutshiena muntu udi ukeba bua kusumba tshintu to. Lomba bua kuyikila ne muntu udi ulombola midimu mu makazen au. Akula mu tshikoso, ne uleja diakamue tshiudi muendele. Udi mua kuamba tshinyi?

4-6. Ntshinyi tshitudi mua kuambila muena makazen anyi muntu udi ulombola midimu yawu?

⁴ Paudi uyikila ne muena makazen anyi eu udi ulombola midimu yawu, udi mua kuamba mêyi bu mudi aa: “Bu mudi bangenda-mushinga bikale ne malu a bungi a kuenza adi atupangisha bua tuetu kubapeta ku mbanza yabu, tudi bakuluile muaba eu. Bibejibeji bietu bidi ne malu adi atangila mianda ya matuku etu aa.” Pashishe umuleje bualu bumue mu tshimue tshia ku bibejibeji ebi.

⁵ Anyi udi mua kutuadija muyiki mu mushindu’eu mupepele: “Bantu ba bungi batu basue kumanya malu a bungi adi mu Bible kadi kabatu ne dîba to. Trakte eu udi umvuija mudiku programe wa dilonga Bible kakuyi bia difuta makuta, programe eu udi mua kukuambuluisha bua wewe kupeta mandamuna a mu Bible a nkonko yebe.” Pashishe leja dibeji 4 ne 5 dia trakte wa Udi musue kumanya malu a bungi a mu Bible anyi?

⁶ Kadi bikala muntu umueneka ne midimu ya bungi, udi mua kumupesha trakte ne kuamba ne: “Nempinganyine apa dîba diwikale kuyi ne bantu to. Kadi mvua musue ungambile tshiudi pebe wamba bua malu adi mu trakte eu.”

7. Mmunyi mutudi mua kukolesha dijinga didi muntu udi muaba utu bantu basumbishila bintu muleje?

⁷ Kukolesha dijinga didi muntu muleje: Udi mene mua kulombola dilonga dia Bible ne muntu muaba utu bantu basumbishila bintu. Mpanda-njila wa pa buende kampanda uvua ne tshibidilu tshia kupesha ngenda-mushinga kansanga bibejibeji bietu. Pakaleja muntu au dianyisha bua bivuaye mubale, mpanda-njila wakamuleja mutu dilonga dia Bible dienzeka ku diambuluisha dia broshire wa Utulomba. Bakatuadija kulongela anu muaba uvua muntu au usumbishila bintu biende. Ku musangu wonso, mpanda-njila eu uvua ulombola dilonga mu minite 10 anyi 15 bilondeshile mushindu udi malu dituku adi. Tutungunukayi petu ne kukeba bantu ba muoyo muimpe pa kuyisha miaba itu bantu basumbishila bintu.