Programe mupiamupia wa mpuilu wa pa buende
Tuetu bumvue bela lubila bamanyisha bantu bua njiwu kampanda idi yamba kuenzeka kadi katuyi tunyema, bushuwa tudi mua kujiwuka. Kulonda buludiki budi Yehowa ufila mu malu a mu nyuma kudi ne mushinga wa bungi. Mpuilu wa pa buende wa tshidimu tshia mudimu tshidi tshilua neashindamene pa bualu ebu. Tshiena-bualu tshia mpuilu eu tshidi ne: “Nuteye ntema ku mushindu unudi nuteleja.”—Luka 8:18, NW.
Ngamba-malu walua kukumbula tshijengu nealeje mu muyuki wende wa kumpala mudi mibelu idi mu nshapita ya ku ntuadijilu ya mukanda uvua Paulo mufundile bena Ebelu itutangila nansha tuetu lelu. Mu muyuki wende wa ndekelu udi wamba ne: “Nuteye ntema misangu yonso ku dilongesha dia Nzambi,” ngamba-malu eu neambuluishe bantu bua kumona ni badi bulelela bateleja Yehowa, bateleja Muanende ne “mupika wa lulamatu ne wa budimu.”—Mat. 24:45, NW.
Bitupa bia bungi bia mu mpuilu eu nebiambuluishe nangananga bena mu mêku. Muyuki wa “Mêku adi ateleja Dîyi dia Nzambi ne ntema mikole” neutuambuluishe bua kushala ne budimu bua bintu bia pa buloba ebu kabitekeshi didiunda dietu dia mu nyuma. Nemuikale nkonko yelabu bana betu badi bashintulule nsombelu wabu bua kuteka malu a mu nyuma pa muaba wa kumpala. Mu muyuki mukuabu wa “Mushindu udi kuteleja Dîyi dia Nzambi ne ntema kukolesha bansonga betu,” nebalombe bansonga badi baleje lulamatu luabu bua bulelela mu tulasa, mu disomba diabu ne balunda babu anyi mu mudimu wa buambi bua kuandamuna imue nkonko. Muyuki wa “Bana batekete badi bateleja Nzambi ne balonga” neutuambuluishe bua kubenga kupepeja bukole budi nabu bana bua kulonga malu. Diela bana batekete ne baledi babu nkonko nedituambuluishe bua kumona malu mimpe adi amueneka padi baledi batuadija kulongesha bana njila ya Yehowa anu patshidibu bapuekele menemene.
Padi Satana ‘udinga ba pa buloba bonso,’ Yehowa yeye udi uleja basadidi bende ba lulamatu njila udibu ne bua kuendela. (Buak. 12:9; Yesh. 30:21) Kuteleja mibelu yende ne ntema ne kuyitumikila kudi kutuvuija bena meji, kutupetesha disanka ne kutufikisha ku muoyo wa tshiendelele.—Nsu. 8:32-35.