Tuikalayi ne lungenyi lua kuenza malu ne mitalu!
1 Yezu uvua mumanye ne: matuku avuaye nawu bua kukumbaja mudimu wa Tatuende pa buloba avua mabadika. (Yone 9:4) Ke bualu kayi uvua muenze mudimu wende ne mitalu, ne uvua mulongeshe balongi bende bua kuenza pabu bia muomumue. (Luka 4:42-44; 8:1; 10:2-4) Kavua muteke bintu bia ku mubidi pa muaba wa kumpala nansha. (Mat. 8:20) Bu muvuaye ne mmuenenu eu, wakajikija mudimu uvua Yehowa mumupeshe.—Yone 17:4.
2 Dîba ndikese: Dîba dia kuyisha ‘bantu bonso ba pa buloba’ lumu luimpe ndikese. (Mat. 24:14) Milayi ya mu Bible idi ileja ne: tukadi basemene bikole ku dituku dia nshikidilu. Mu katupa kakese emu, ‘bantu badi kabayi bamanye Nzambi ne badi kabayi batumikila lumu luimpe lua Mukalenge wetu Yezu nebapete dikenga, dibutuka dia tshiendelele.’ (2 Tes. 1:6-9) Dibutuka edi nedilue mu tshintuluntulu tshia dikema. (Luka 21:34, 35; 1 Tes. 5:2, 3) Bantu badi dijinga ne kutabuluka ku tulu tuabu tudi tubateke mu njiwu. Ne tudi ne bujitu bua kubambuluisha bua kukebabu dianyisha dia Yehowa patshidiku dîba apa.—Sef. 2:2, 3.
3 Tuenzayi muetu muonso: Bu mudi basadidi ba Nzambi bajadike ne: ‘tshikondo tshidi tshishale ntshîpi,’ badi bateka mudimu wa diyisha pa muaba wa kumpala mu nsombelu wabu. (1 Kol. 7:29-31; Mat. 6:33) Bamue mbabenge malu avua mua kubapetesha makuta a bungi anyi mbalekele midimu yabu mikuabu bua kumona mua kuvudija dîba didibu bapitshisha mu buambi. (Mâko 10:29, 30) Bakuabu pabu badi batungunuka ne ‘kuikala misangu yonso ne bivule bia kuenza mu mudimu wa Mukalenge’ nansha mudibu ne ntatu idi kayiyi ijika. (1 Kol. 15:58, NW) Bantu ba bungi mbaditue mu dimanyisha lumu luimpe kukadi bidimu bia bungi kabayi bateketa to. (Eb. 10:23) Yehowa udi wanyisha bikole didifila diabu ne muoyo mujima edi bua kuyisha malu a Bukalenge kumpala.—Eb. 6:10.
4 Nsombelu wetu mujima yeye muimanyine pa ntendelelu wa Yehowa, bu mudi mudimu wa buambi, nebituambuluishe bua kuvuluka dituku dia Yehowa dîba dionso. Bidi kabidi bitumbusha ditanaji didibu mua kutukebela kudi ba pa buloba ebu bua Satana ne dipangadika dietu dia kuikala ne bienzedi bilenga nedikole. (2 Pet. 3:11-14) Bushuwa, kuenza mudimu wetu wa buambi ne lungenyi lua kuenza malu mitalu kudi mua kupandisha mioyo yetu, ne ya bantu badi batuteleja kabidi.—1 Tim. 4:16.