Mpungilu wa Distrike wa Bantemu ba Yehowa wa “Tutumikilayi Nzambi” bua 2005
1 Bu mudi Yehowa Nzambi muikale Mulongeshi wetu Munene, udi ulongolola bua tuetu kudisangisha bua yeye kutulongesha njila yende. (Yesh. 30:20, 21; 54:13) Udi ulongolola malu aa ku diambuluisha dia kasumbu ka mupika wa lulamatu ne wa budimu, kadi kalongolola bisangilu bu mudi mpungilu wetu wa distrike udi wenzeka ku tshidimu tshionso. (Mat. 24:45-47) Tudi tudiumvua anu bu mufundi wa Misambu Davidi, pavuaye muimbe ne: ‘Nemvudijile Yehowa disanka mu masangisha a bantu bende.’ (Mus. 26:12) Davidi uvua mumvue bimpe bitambe tshivua dikala mulongesha kudi Yehowa diumvuija ne wakapangadika bua kuikala munkatshi mua bantu ba Yehowa dîba dionso divuabu mua kudisangisha pamue.
2 Newikale pebe mu ‘bantu badisangisha’ bua kubuela mu Mpungilu wa Distrike wa “Tutumikilayi Nzambi” bua tshidimu etshi anyi? Biwikala musue kuikala wa ku bobu, malu adi alonda aa neakuambuluishe bikole bua wewe kudilongolola bua kubuelamu bimpe.
3 Dilongolola ku mpindieu bua kuikalamu matuku onso: “Malu adi muntu wa tshisumi ujinga kuenza adi akumbana.” (Nsu. 21:5, MMM) Mêyi aa kaenaku aleja mushinga wa kudilongolola bua kubuela mu mpungilu anyi? Bua wewe kuikala mujadike ne: neubuele mu bitupa bionso bia programe eu, mbimpe wewe kutuadija ku mpindieu bua kudilongolola bu mudibi bua wewe kuikalaku matuku onso asatu. Wewe muikale muena mudimu, lomba mfumuebe dikisha anu mpindieu. Bikalabi bikengela kuyikila bua mpungilu ne muena dibaka nebe udi kayi Ntemu, kuindidi mu minite ya ndekelu to. Kuoku kumueneka ntatu nansha ya mushindu kayi, uyikuatshile Yehowa, wikale ne dieyemena dia se: ne diambuluisha diende ‘malu awapangadija nealubuluke.’ (Nsu. 16:3) Tshintu tshikuabu, wambuluishe kabidi balongi bebe ba Bible bua badilongolole bua kuikalaku mu bitupa bionso bia mpungilu.
4 Miaba ya kulala: Pa tshibidilu, miaba ya kulala mu tshimenga tshidi mpungilu wenzekela itu ku nzubu kua bena Kristo netu, ku Nzubu wa Bukalenge anyi ku balela betu. Panyima pa Tshisangilu tshia Mudimu tshinuakonkonona tshisakidila etshi, nebalamike dibeji didi dileja miaba yenzekela mpungilu ku tablo wa mamanyisha. Tudi tunulomba bua kuela meji bimpe bua kumona mua kusungula muaba unuikala ne bua kubuela mu mpungilu bua tshidimu tshia 2005. Wewe musue kusombela kua muena Kristo anyi ku Nzubu wa Bukalenge, tudi tulomba bua sekretere afunde mêna a badi basue ne kuatumina Tshibambalu tshia miaba ya kulala tshidi muaba wenzelabu mpungilu kumpala kua dîba. Sekretere aleje dîna, biwikala muntu mulume anyi mukaji, bidimu ne tshiudi mu dîku. Kuenza nunku nekuambuluishe bena mu Tshibambalu tshia miaba ya kulala mushindu wa kulongolola miaba bua bantu bonso. Komite wa Mudimu wa Tshisumbu neakonkonone bangabanga ngikadilu ya mumanyishi yonso udi ulomba kaba ka kulala kumpala kua kutuminabu bena mu Tshibambalu tshia miaba ya kulala mabeji adi ne mêna. Bobu bamane kutupesha muaba wa kulala, kabiakuikala bimpe bua tuetu kushintulula kabidi bua kuya kusombela kua muanetu mukuabu anyi kua mulunda wetu. Bualu kuenza mushindu eu kudi kufila lutatu ku mudimu wa bena mu Tshibambalu tshia miaba ya kulala. Nuamanya ne: bikala muntu ujinga kusombela kua mulela wende udi kayi Ntemu mu tshikondo tshia mpungilu, kêna ne bua kufila dîna diende bua kudituminabu bena mu Tshibambalu tshia miaba ya kulala to.
5 Dilala ku Nzubu wa Bukalenge: Tudi tunutumina kabidi mu tshisakidila emu malu adi akengela kulonda bua kuladika bantu ku Nzubu wa Bukalenge. Komite wa Mpungilu wa Distrike neateke mukulu umue bua kutangila muenzeka malu aa. Neikale ne muntu udi umuambuluisha, nangananga mukulu nende anyi musadidi wa mudimu udi mukumbane. Nebakosolole Nzubu wa Bukalenge mu bitupa bibidi. Tshitupa tshimue bua bana betu ba bakaji, bana batekete ne bua bansongakaji. Tshitupa tshikuabu netshikale tshia bantu balume. Nzubu wa Bukalenge neikale anu bua kulala patupu. Mu munya padi bantu bonso mu mpungilu, nudi mua kulongolola bua bantu bikala bashintakanangana bua kulama bintu ku Nzubu wa Bukalenge. Nusungule bana betu ba balume ba tshikadilu tshimpe ne bakole mu nyuma bua kuenza mudimu eu. Ki mbianyishibue bua kuipikila munda mua Nzubu wa Bukalenge to. Nudi mua kuasa katanda kakese mu lupangu bua kulambilamu anu bua mu matuku a mpungilu au. Padi mpungilu ujika, nupule katanda aka. Nzubu ne mu lupangu bikale ne mankenda ne bilongolola bimpe. Kanunyangi tshintu nansha tshimue. Bantu basombaku benze muabu muonso bua kulejangana ngikadilu ya bena Kristo balelela ne kudi bena mutumba kabidi.—1 Kol. 10:31.
6 Majinga a pa buawu: Mupostolo Paulo udi uleja muvua bamue bena Kristo balume balue “busambi” kudiye. (Kolos. 4:7-11) Umue mushindu uvuabu bamusambe nkuenzela Paulo midimu ivuaye nayi dijinga. Mmunyi mutudi mua kulua “busambi” kudi bakuabu badi mu mpungilu eu? Bana betu bakulakaje, balema, aba badi mu mudimu wa ku dîba ne ku dîba badi mua kuikala ne dijinga ne diambuluisha bua kufuta njila anyi kupeta muaba wa kulala. Bana babu ne bantu aba ke badi ne bujitu bua kubambuluisha bangabanga. (1 Tim. 5:4) Bikalabu kabayi mua kukokesha, bana betu bena Kristo badi mua kuambuluisha bantu badi ne majinga aa. (Yak. 1:27) Batangidi ba dilonga dia mukanda badi ne bua kukeba mu kasumbu kabu muntu udi ne majinga a pa buawu bua kumona bua kudilongolola kumpala kua dîba bua mpungilu.
7 Dibuela mu mpungilu mukuabu: Bua kulongololabu bua kuikale bungi bukumbane bua miaba ya kusomba, ya kulala, mikanda, ne malu makuabu kabidi, mbimpe bua bamanyishi bonso kubuela anu mu mpungilu udibu batume tshisumbu tshiabu. Bikala nsombelu webe ukulomba bua wewe kubuela mu mpungilu mukuabu, suaku umonangane ne sekretere wa tshisumbu tshienu.
8 Dijinga dia bena budisuile: Yezu wakatushila tshilejilu tshipuangane tshia kuikala tudipuekesha ne tuditatshisha bua majinga a bakuabu. (Luka 9:12-17; Yone 13:5, 14-16) Bantu badi badifila bua kuikala bena budisuile badi pabu baleja lungenyi lua mushindu umue. Bua kukumbaja majinga adi mu bibambalu bionso bia mpungilu, Komite ya Mpungilu neikale dijinga ne bantu bua kuenza nabu midimu. Kudi nangananga dijinga dia bakulu bua kuikala bena budisuile ne kuenza midimu eyi. Tshilejilu tshiabu tshilenga tshidibu bafile netshiambuluishe bantu bonso mu tshisumbu.—1 Pet. 5:2, 3.
9 Bidi bakuabu bamona: Mamu mukuabu udi utangila nzubu kansanga wa tshilala benyi uvua muambe ne: “Nudi bantu batutu basue kuakidila bikole. Nudi ne bikadilu bilenga kupita bantu bakuabu batutu tuakidila muaba eu. Bamamu batu benza mudimu wa dikolopa badi bamba mudibu babenzela malu ne bulenga buonso ne babapaku ne kantu bua mudimu wabu mulenga. Bantu bonso batu bajinga kuenza mudimu ku ndekelu kua lumingu dîba dinudi kuoku!” Mukalenge mukuabu pende udi utangila malu a nzubu kansanga wa tshilala benyi udi wamba ne: “Bantemu ba Yehowa mbantu ba kuenza nabu mudimu bipepele bia dikema.” Pamuapa, tshilejilu tshiebe tshilenga ntshifikishe bakuabu bua kuamba pabu mêyi a mushindu eu. Anji tshinkabi mudi Yehowa mua kumvua padiye utumona tuenza malu adi afila lumu mushindu eu!—1 Pet. 2:12.
10 Ku butuangaji bua “mulami wa bulamate,” Yehowa Nzambi mmulongolole bua bantu badisangishe bua kubalongeshabu mu nyuma tshidimu etshi. (Luka 12:42, MMM) Kudilongolola bua kubuela matuku onso asatu aa kudi kulomba kudienzeja, kadi bidi ne mushinga wa bungi bua kuenza mushindu eu. Mpungilu wa Distrike wa “Tutumikilayi Nzambi” bua tshidimu etshi neakoleshe dipangadika dietu dia kusadila Yehowa bua mpindieu too ne kashidi. Tuikalayi ne dipangadika dia kulonda mubelu eu wa mufundi wa Misambu wa ne: ‘Vudijilayi Nzambi disanka mu masangisha a bantu.’—Mus. 68:26.
[Kazubu mu dibeji 3]
Programe
Ditanu ne Disambombo
9:30 dinda - 5:05 dilolo
Dia lumingu
9:30 dinda - 4:10 dilolo
[Kazubu mu dibeji 4]
Amue malu a kutangila bua kubuela mu Mpungilu wa Distrike
1. Biwikala ne bua kuenza luendu bua kubuela mu mpungilu, tuadija kulama mfranga ya kufuta njila ne ya biakudia buebe ne bua bena dîku diebe dijima.
2. Kupu muoyo bua kuikala ne mapa ebe a ku budisuile. Bible udi wamba ne: ‘Muntu kamueneki ku mêsu kua Yehowa ne bianza bitupu’ kadi ‘atumbishe Yehowa ne biuma biende.’—Dut. 16:16; Nsu. 3:9.
3. Mu tshikondo tshia mpungilu, tudi tutumbisha dîna dia Yehowa bua tshikadilu tshietu tshimpe ne ku mankenda ne mvuadilu wetu mulenga.—1 Kol. 10:31.
4. Wikale mudiakaje bua kueleshangana diboko ne bakididianganyi ne kabidi bana betu bonso badi ne bujitu bua kulama bulongame. Udi mua kulama miaba anu bua bena mu dîku diebe anyi bua bantu banudi bende nabu.
5. Bua wewe kuteleja bimpe tshitupa tshia dilolo, udie bintu bikese mu tshikondo tshia dikisha dia mu midi. Biakudia bia bungi anyi bia bujitu bidi mua kukufikisha ku dilala tulu.—Luka 8:18.
6. Mankenda adi atumbisha Yehowa. Ku ndekelu kua tshitupa tshionso tshia mpungilu, muntu yonso udi mua kuangulaku mabeji ne bintu bikuabu ne kubiela muaba udi mulongolola bua kubimansha. Nanku netushiye muaba eu mutoke ne mankenda.—1 Pet. 1:15, 16.