Tubambuluishe bua bayukile kabidi ne Bantemu
1 Patutu tuyisha lumu luimpe, tutu misangu mivule tupetangana ne bantu batu kabayi basombele mu teritware wa tshisumbu tshietu anyi badi bakula muakulu muenyi, nansha kabidi muakulu wa tumama. Bantu bakuabu pabu batutu tuyukila nabu badi mua kumuangala mu teritware wetu. Ntshinyi tshitudi mua kuenza bua bantu ba nunku kutungunukabu ne kuyukila ne Bantemu? Nkuenza mudimu ne formilere ya Intérêt à suivre dans une langue étrangère (S-70a) itudi nayi mu bisumbu mpindieu. Pashishe, netuenze mudimu ne formilere wa Veuillez suivre l’intérêt (S-43).
2 Bantu ba bungi batu basanka bua kuteleja lumu luimpe padibu babambilalu mu muakulu wabu wa ku dibele. (Bien. 22:1, 2) Nunku, mu mishindu yonso patudi tupetangana ne muntu udi kayi wakula muakulu wetu, tudi ne bua kuuja formilere eu nansha bikala muntu eu kayi uleja mudiye usankidila mukenji wa Bukalenge utudi bamutuadile. Kadi, pikala muaba unudi muikale bantu ba bungi batu bakula muakulu muenyi au badibu bayisha pa tshibidilu mu muakulu au, kabiena ne mushinga bua kuuja formilere eu padi muntu kayi muleje dijinga dia kumanya bia bungi to, amba anu yeye mudileje.
3 Diuja dia formilere: Udi mua kukeba ne budimu bua bungi bua kumanya dîna dia muntu, adrese wende ne nimero yende ya telefone kabidi. Paudi uuja, leja mushindu udi muntu wanyisha bulelela, dîba didibu mua kumupeta ku nzubu, mukanda uuvua mumushile anyi uvuaye mulombe ne muakulu udi muntu au umvua bimpe kakuyi lutatu. Wewe mumane kuuja mushindu’eu, ufile diakamue formilere eu kudi sekretere wa tshisumbu tshienu, ne yeye pende neamutume mu tshisumbu tshidi tshikengela anyi kudi kasumbu ka muakulu au.
4 Dituma dia formilere: Bikala sekretere kayi mumanye kua yeye kutuma formilere eu anyi kayi ne adrese wa tshisumbu tshia kumutumina, udi mua kuela nshinga kubikila Tshibambalu tshia mudimu tshidi ku Biro bua kukonka malu adiye nawu dijinga bua kumona mua kutuma formilere eu. Kabitshiena kabidi ne mushinga bua kumanyisha mutangidi wa tshimenga bua kutuma formilere eu nansha.
5 Padi tshisumbu anyi kasumbu ka muakulu kampanda kapeta formilere wa Intérêt à suivre dans une langue étrangère mumana kuuja, bidi bikengela diakamue kudilongolola bua kuya kutangila muntu au lukasa. Patudi tukumbaja tshietu tshitupa dia mudimu ne muoyo mujima, tudi tushala ne dishindika dia ne: Yehowa neunzulule mitshima ya bantu badi ‘badiakaje bimpe bua muoyo wa tshiendelele.’—Bien. 13:48, NW.