Mmunyi mutu Bantemu ba Yehowa bangata masungulangana?

Mu Bible mudi mêyi adi ambuluisha basadidi ba Nzambi bua kuikala ne mmuenenu muimpe pa tshilumbu tshia masungula. Kadi bidi bimueneka ne: kakuena dîyi didi dikandika tshilele tshine tshia dielelangana tukanda to. Tshilejilu, kakuena bualu bubi bikala kasumbu ka balombodi ba kumpanyi kampanda mua kuela tukanda bua kuangata mapangadika adi atangila kumpanyi wabu. Mu bisumbu bia Bantemu ba Yehowa misangu mivule batu bela bianza muulu bua kuangata mapangadika bua mêba a bisangilu ne mushindu wa kutula mfranga ya tshisumbu.

Kadi netuambe tshinyi bua dielela bena tshididi tukanda? Bushuwa, mu amue matunga adi ne demokrasi, bantu batue ku 50 pa lukama kabatu baya bua kuelelangana tukanda dituku dia masungula. Bantemu ba Yehowa kabatu bakandika bantu bakuabu bua kuelelangana tukanda to; peshi kabatu babasaka bua kubenga kusungula bena tshididi. Batu banemeka bakokeshi badi bantu basungule mu mushindu muimpe. (Lomo 13:1-7) Bua bidi bitangila disungula muntu kampanda, Ntemu wa Yehowa yonso udi ne bua kudiangatshila dipangadika bilondeshile kondo kende ka muoyo kalongesha kudi Bible ne bujitu budiye nabu kumpala kua Nzambi ne kua Mbulamatadi. (Matayo 22:21; 1 Petelo 3:16) Kumpala kua kuangata dipangadika dia nunku, Bantemu batu bakonkonona amue malu.

Bua kumpala: Yezu Kristo wakamba bua balongi bende ne: ‘Kabena ba pa buloba, bu mundi meme tshiyi wa pa buloba.’ (Yone 17:14) Bantemu ba Yehowa batu bangata dîyi edi ne mushinga wa bungi. Bu mudibu ‘kabayi ba pa buloba,’ kabatu babuelakana mu malu a tshididi to.​—Yone 18:36.

Buibidi: mupostolo Paulo wakakula buende yeye ne: uvua ‘mulopo’ muleji-mpala wa Kristo kumpala kua bantu ba mu tshikondo tshiende. (Efeso 6:20; 2 Kolinto 5:20) Bantemu ba Yehowa badi bitaba ne: Kristo Yezu udi mpindieu Mukalenge wa Bukalenge bua Nzambi mu diulu, ne buobu badi milopo ya Bukalenge ebu bua kumanyisha bukua-bisamba bualu ebu. (Matayo 24:14; Buakabuluibua 11:15) Milopo kayena ne bua kubuelakana mu malu a mu matunga adibu babatume bua kuenza mudimu to. Bantemu ba Yehowa badi bamone ne: ki mbimpe kubuelakana mu malu a tshididi a mu matunga adibu to, bualu badi baleji-mpala ba Bukalenge bua Nzambu bua mu diulu.

Bualu buisatu bua kuangata ne mushinga ngebu: bantu badi belela muntu tukanda bua kumuteka pa mudimu kampanda badi bambula bujitu bua malu adiye wenza. (Tangila 1 Timote 5:22.) Bena Kristo badi ne bua kukonkonona bualu ebu bimpe ne ntema bikalabu basue kuambula bujitu ebu.

Buinayi: Bantemu ba Yehowa badi bangata buobumue buabu ne mushinga wa bungi. (Kolosai 3:14) Misangu mivule padi bitendelelu bibuela mu malu a tshididi, bena kuitabuja babi batu bapandulukangana. Bu mudi Bantemu ba Yehowa bidikija Yezu Kristo, kabatu babuelakana mu malu a tshididi nansha, batu benza muabu muonso bua kulama buobumue buabu bua bena Kristo.​—Matayo 12:25; Yone 6:15; 18:36, 37.

Bualu buitanu ne bua ndekelu mbuobu’ebu: dibenga kubuela mu malu a tshididi didi diambuluisha Bantemu ba Yehowa bua kuyukila ne bena tshididi bonso ne kubayisha mukenji wa Bukalenge bua Nzambi udi ne mushinga wa bungi.​—Ebelu 10:35.

Bilondeshile mvese ya mu Bible idi kuulu eku, mu matunga a bungi, Bantemu ba Yehowa batu bangata dipangadika dia kubenga kuelela bena tshididi tukanda, ne nansha mene mikenji ya mu matunga au itu ipesha bantu bukenji bua kuenza nanku. Kadi tshiakuenza ntshinyi bikala mikenji ya ditunga ilomba muntu yonso bua kuelelangana tukanda? Mu nsombelu wa mushindu’eu, Ntemu yonso udi ne bua kudiangatshila dipangadika biumvuangane ne kondo kende ka muoyo ne dimanya diende dia Bible bua kumanya tshidiye ne bua kuenza. Biasua muntu kuya mu biro bia vote, abu mbualu buende. Tshienzaye muaba au ntshimutangile anu yeye ne Mufuki wende.

Tshibumba tshia Nsentedi wa dia 1 Lumungulu 1951, dibeji dia 136 ne dia 137 (Mfual.), tshivua tshiamba ne: ‘Mu ditunga mudi Kaisa wenzeja bantu ku bukole bua kuelelangana tukanda . . . [Bantemu] badi mua kuya muaba udibu benzela masungula ne kubuela mu biro bia vote. Muomuemu ke mudibu ne bua kuleja luseke ludibu pa kakanda ka masungula. Beledianganyi ba tukanda badi ne budikadidi bua kuenza tshidibu basue ne tukanda tuabu tua masungula, fukafuka wabu bolabola wabu. Nenku ku mêsu kua Nzambi, muaba eu ke udi bantemu bende ne bua kuenza malu adi umvuangana ne mikenji yende ne ditabuja diabu. Ki ntshilumbu tshietu bua kubalongesha tshidibu ne bua kuenza ne tukanda etu nansha.’

Kadi tshia kuenza ntshinyi bikala muanetu wa bakaji udi ne bayende kayi muena Kristo umuambila bua aye kuelelangana tukanda? Bushuwa, udi ne bua kukokela bayende anu mutu bena Kristo bakokela bakokeshi badi ku mutu. (Efeso 5:22; 1 Petelo 2:13-17) Bienzaye tshidi bayende umulomba ne biayaye mu biro bia vote, atshi ntshilumbu tshiende. Muntu nansha umue kêna ne bua kukeba bua kumulumbuluisha to.​—Tangila Lomo 14:4.

Ntshinyi tshidi muntu mua kuenza mu ditunga mudi kamuyi mikenji idi yenzeja bantu ku bukole bua kuelelangana tukanda, kadi muikale bantu badi batatshisha bakuabu badi kabayi baya kuela tukanda, pamuapa bifuana mua kubakebela njiwu? Kadi ntshinyi tshia kuenza kabidi pikalabu bakosela bantu badi kabayi baya muaba wa vote tshibawu tshinene, nansha mudi mikenji ya ditunga kayiyi ibenzeja bua kuyamu? Tshilumbu tshiotshi tshikale nunku anyi mushindu mukuabu, muena Kristo udi ne bua kudiangatshila dipangadika. ‘Muntu ne muntu neadiambuile bujitu buende.’​—Galatia 6:5.

Bidi mua kulenduisha bamue bantu padibu bamona mu tshikondo tshia masungula a mu ditunga diabu, bamue Bantemu ba Yehowa baya ku biro bia vote eku bakuabu kabayi bayaku. Badi mua kumona bu ne: ‘Bantemu ba Yehowa badi batua eku batua kuaka, bikale dikasa mu mâyi dikasa ku mukuna.’ Kadi tshidi bantu ne bua kumanya ntshiotshi etshi: mu malu adi atangila kondo ka muoyo bu mudi ebu, muena Kristo yonso udi ne bua kudiangatshila dipangadika kumpala kua Yehowa Nzambi.​—Lomo 14:12.

Nansha Bantemu ba Yehowa bobu mua kuangata mapangadika a mushindu kayi mu nsombelu mishilangane, batu benza muabu muonso bua kubenga kubuelakana mu malu a pa buloba bua kumona mua kulama budikadidi buabu. Badi beyemena Yehowa Nzambi mu malu onso bua abakoleshe, abapeshe meji ne abambuluishe bua kabanyangi ditabuja diabu to. Ke bualu kayi badi banyisha ne muoyo mujima mêyi a mufundi wa misambu aa: ‘Bualu bua wewe udi dibue dianyi ne ngumbu yanyi ya mvita; nunku, bualu bua dîna diebe wikale mulombodi wanyi, undombole mu njila.’​—Musambu 31:3.