Mandamuna ku nkonko yenu

▪ Tshisumbu tshidi ne bua kulamika karte ka teritware watshi mu Nzubu wa Bukalenge anyi?

Eyowa, karte ka teritware badi ne bua kukenzela kadre ka kukelamu ne kukakudika ku tshimanu mu Nzubu wa Bukalenge muaba mukuabu kabiyi ku tshibasa tshia mamanyisha to. Kadi ne bua kuleja bimpe mikalu yonso ya teritware wa tshisumbu tshienu ne mikalu ya teritware wa mumanyishi yonso ne nomba wa teritware eu. Kadi kabidi ne bua kuleja mikalu ya teritware wa tshisumbu ne tshisumbu tshionso tshidi tshienzela bisangilu biatshi mu Nzubu wa Bukalenge umue. Kuenza nunku nekuambuluishe bamanyishi ne bapiabapia bonso badi banyisha bulelela bua kumanya tshisumbu tshiena teritware wa muaba udibu basombele. Kuleja miaba idi tusumbu tua Dilonga dia Mukanda dia Tshisumbu pa karte aka nekuambuluishe kabidi bantu bonso bua kumanya muaba udi dilonga dia mukanda didibu ne bua kubuela dienzekela. Karte aka nka kuakajulula misangu yonso padi teritware ishintuluka.

Dikudika dia karte aka mu Nzubu wa Bukalenge nedivuluije bamanyishi bonso ne: koku mushindu, mbimpe muntu ne muntu ikale ne wende teritware. Karte nekambuluishe bana betu badi bakeba kusungula teritware wa pabuipi ne muaba udibu basombele. Misangu mikuabu kadi mua kuambuluisha bua kubenga kujimija dîba mu bisangilu bia mudimu wa buambi, bualu kadi kambuluisha muanetu udi wabanya bantu bua kuleja bamanyishi teritware udibu babapeshe bua kuyisha ne lukasa luonso.

Karte kadi kabidi kaleja ne: tshisumbu ntshidilongolole bimpe bua kuyisha mukenji wa Bukalenge bua Nzambi ku ntengu yonso inayi ya teritware watshi.​—Luka 9:6.