Tshitupa tshia 8: Tulombolayi malonga a Bible mimpe
Tulombole balongi ba Bible ku bulongolodi bua Nzambi
1. Bua tshinyi bidi bia mushinga bua kuakuila pa malu adi atangila bulongolodi bua Yehowa lumingu luonso ne mulongi wa Bible?
1 Tshipatshila tshietu patudi tulombola malonga a Bible ntshia kulongesha bantu malongesha a nshindamenu ne kubambuluisha kabidi bua balue bena mu tshisumbu tshia bena Kristo. (Zek. 8:23) Broshire wa Bantemu ba Yehowa—Mbanganyi? Mmalu kayi adibu balongesha? udi mua kutuambuluisha bikole. Pesha balongi bapiabapia ba Bible broshire eu ne ubambile bua kumubalabu. Kabidi, ikala wangata minite mikese ku lumingu luonso lua dilonga bua kuakuila pa malu adi atangila bulongolodi bua Yehowa.
2. Mmunyi muudi mua kukankamija balongi ba Bible bua kubuelabu mu bisangilu?
2 Bisangilu bia tshisumbu: Mushindu munene udi balongi ba Bible mua kufika ku dianyisha bulongolodi bua Nzambi ndibuela pamue netu mu bisangilu bia tshisumbu. (1 Kol. 14:24, 25) Ke bualu kayi udi mua kutuadija kubumvuija bisangilu bionso bitanu bia ku lumingu tshimue ku tshimue. Bambila tshiena-bualu tshia muyuki wa patoke wenzeka musangu udi ulonda. Baleja malu alongeshabu mu dilonga dia Tshibumba tshia Nsentedi ne mu Dilonga dia Mukanda dia Tshisumbu. Bumvuije tshidi Kalasa ka Mudimu wa Nzambi ne Tshisangilu tshia Mudimu. Wewe ne mudimu wa kuenza mu kalasa, nudi pamuapa mua kuwambulula nabu. Dianjila kubaleja ngenyi minene yakuilabu mu bisangilu. Enza mudimu ne bimfuanyi anyi foto idi mu mikanda yetu bua kubambuluisha bua bafuanyikije ne malu adi enzeka. Anu musangu wa kumpala unudi nutuadija kulonga au, ubambile bua balue kubuela mu bisangilu.
3. Mmalu kayi a bulongolodi atudi mua kuyukila ne mulongi wa Bible?
3 Padi tshikondo tshia Tshivulukilu, tshia mpuilu ne mpungilu ne tshia dikumbula dia mutangidi wa tshijengu bisemena pabuipi, angata minite mikese bua kubumvuija ne enza bua disanka diabu divule bua malu adibu balongolola au. Ku kakese ku kakese udi mua kuandamuna nkonko bu mudi: Bua tshinyi badi batubikila ne: Bantemu ba Yehowa? Bua tshinyi tutu tubikila muaba ututu tuenzela bisangilu bietu ne: Nzubu wa Bukalenge? Mmajitu kayi adi nawu bakulu ne basadidi ba mudimu? Mudimu wa buambi ne teritware wa tshisumbu mbilongolola mushindu kayi? Mmunyi mutu mikanda yetu ipatuka? Makuta atu bulongolodi buetu bukuata nau mudimu atu afumina kuepi? Mmidimu kayi idi nayi biro bia filiale ne Kasumbu kaludiki mu ditangila mudimu wetu?
4, 5. Mmunyi mudi bande yetu ya video mua kukolesha dianyisha dia balongi ba Bible bua bulongolodi buetu?
4 Ditangila bande ya Video: Mushindu mukuabu udi balongi ba Bible mua kumona buimpe bua bulongolodi bua Yehowa nkutangila bande yetu ya video. Badi mua kutangila bande bu mudi wa Jusqu’aux extrémités de la terre, udi uleja mushindu udi mudimu wetu wa buambi wenzeka pa buloba bujima. Bua kumanya mutudi ne bana betu pa buloba bujima badi mua kutangila bande wa Toute la communauté des frères, ne bua buobumue buetu badi mua kutangila bande wa Unis grâce à l’enseignement divin. Mamu mukuabu uvuabu bapesha bibejibeji ne mikanda yetu mu bidimu bitanu wakapuekesha binsonji pakamonaye bande wa Les Témoins de Jéhovah: un nom, une organisation. Wakafika ku dianyisha Bantemu bavua balue kumutangila, kadi kunyima kua yeye mumane kumona bande eu wa video, wakalua kuanyisha kabidi bulongolodi buetu bikole. Bakatuadija kulonga nende Bible, ne mbingu mikese patupu wakatuadija kubuela mu bisangilu ku Nzubu wa Bukalenge.
5 Tuetu bikale tuangata minite mikese patupu ku lumingu luonso bua kumvuija balongi betu ba Bible malu adi mu mikanda yetu, ku kakese ku kakese tudi mua kulombola balongi ba Bible aba ku bulongolodi budi Yehowa wenza nabu mudimu lelu.