Kuyisha kudi kutuambuluisha bua kunanukila
1 Dîyi dia Nzambi didi ditulomba bua kunyema ‘ne kutantamana [anyi kunanukila] lubilu luetu ludi lutekibue kumpala kuetu.’ (Eb. 12:1) Anu mutu munyemi wa lubilu muikale dijinga ne kunanukila bua kunyemaye bimpe bua kupeta difutu, tuetu petu tudi ne bua kunanukila bua kupeta petu difutu dia muoyo wa tshiendelele. (Eb. 10:36) Mmunyi mudi mudimu wa bena Kristo mua kutuambuluisha bua kunanukila ne lulamatu too ne ku nshikidilu?—Mat. 24:13.
2 Bidi bitukolesha mu nyuma: Diambila bantu malu mimpe a dikema adibu balaye mu Bible bua bulongolodi bupiabupia bua buakane didi dituambuluisha bua kulama ditekemena dietu katakata. (1 Tes. 5:8) Patudi tupatuka pa tshibidilu mu buambi, tudi tupeta mushindu wa kumanyisha malongesha malelela a mu Bible atudi balonge. Tudi tupeta mushindu wa kubingisha ditabuja dietu diatuambuluisha bua kukola mu nyuma.
3 Bua kumona mua kulongesha bakuabu bimpe, tudi ne bua kumvua tuetu bine malongesha a mu Bible bimpe. Tudi ne bua kuenza makebulula ne kuelangana meji a malongesha aa. Kudienzeja kuetu ne muoyo mujima patudi tudifila ku malu aa kudi kuvudija dimanya dietu, kukolesha ditabuja dietu ne kutukankamija tuetu bine mu nyuma. (Nsu. 2:3-5) Ke bualu kayi patudi tukeba mua kuambuluisha bakuabu, tudi tudikolesha petu.—1 Tim. 4:15, 16.
4 Dienza mudimu wa buambi ne tshisumi ntshitupa tshia mushinga mukole tshia mu ‘bintu bionso bia mvita bia Nzambi’ tshitudi natshi dijinga bua kumona mua kukandamena Diabolo ne bademon. (Ef. 6:10-13, 15) Kuikala ne bia bungi bia kuenza mu mudimu wa Nzambi kudi kutuambuluisha bua kuteka meji etu ku malu adi akolesha ne kubenga bua bulongolodi bua Satana ebu kabutunyangi. (Kolos. 3:2) Patudi tulongesha bakuabu njila ya Yehowa, tudi tutungunuka ne kuvuluka mutudi ne bua kuikala ne bienzedi bimpe.—1 Pet. 2:12.
5 Nzambi udi utukolesha: Ndekelu wa bionso, dienza dietu dia mudimu wa buambi didi ditulongesha mua kueyemena Yehowa. (2 Kol. 4:1, 7) Edi se ndibenesha dia dikema! Tuetu bikale tueyemena Yehowa mushindu eu, kabiakutuambuluisha anu bua kukumbaja mudimu wetu bimpe patupu to, kadi nebituambuluishe kabidi bua kutantamena malu a mishindu yonso adi atukuata mu nsombelu wetu. (Filip. 4:11-13) Bushuwa, kulonga mua kueyemena Yehowa ne muoyo mujima mbualu bua mushinga mukole bua kumona mua kunanukila. (Mus. 55:22) Kuyisha kudi kutuambuluisha bua kunanukila mu mishindu mishilashilangane.