Tshitupa tshia 10: Tulombolayi malonga a Bible mimpe

Tulongeshe balongi ba Bible mua kuyisha ku nzubu ne ku nzubu

¹ Padi bakulu bamona ne: mulongi kampanda wa Bible mmukumbaje malu malomba bua kuikala mumanyishi udi kayi muanji kutambula, mulongi eu udi mua kutuadija kupatuka mu buambi ne bena mu tshisumbu. (Tangila mukanda wa Bulongolodi budi buenza disua dia Yehowa, dib. 79-81.) Mmunyi mutudi mua kuambuluisha mulongi wa Bible bua kufikaye ku diyisha ku nzubu ne ku nzubu?

² Dilongolola pamue ne mulongi: Didilongolola dimpe ke didi ne mushinga wa bungi. Leja mulongi muaba udiye mua kupetela mishindu ya kutuadija kuyukila ne bantu mu Mudimu wetu wa Bukalenge ne mu mukanda wa Comment raisonner, umuambuluishe bua asungule mushindu udi umueneka mupepele ne muakanyine muaba unudi basombele. Anu ku ntuadijilu, kankamija mulongi bua kuenzaye mudimu ne Bible mu buambi.​—2 Tim. 4:2.

³ Dienza dia manaya a bilejilu dia malu anuaya kuyisha didi diambuluisha bikole mumanyishi mupiamupia. Padi mulongi wambulula mushindu wa kuyukila ne muntu, muleja mudiye mua kuandamuna ne bukalanga nkonko itu ijuka pa tshibidilu mu teritware wenu. (Kolos. 4:6) Mujadikila ne: basadidi ba Nzambi kabena anu ne bua kuikala ne diandamuna dia lukonko luonso ludi muntu mua kujula nansha. Misangu mivule bua nkonko ya mushindu eu bitu bimpe bua kulomba muntu bua tuanji kuya kuenza makebulula ne patuapingana tulue kuyandamuna.​—Nsu. 15:28.

⁴ Yisha pamue ne mulongi: Musangu wa kumpala udi mulongi upatuka mu buambi bua ku nzubu ne ku nzubu, wenze bua amone muudi uyukila ne bantu bilondeshile mêyi anuvua balongolole nende pamue bubidi buenu. Pashishe umulombe bua kuakulaye pende. Imue misangu bidi mua kuikala bimpe bua kufikisha mumanyishi mupiamupia eu ku dienzaye mudimu anu nansha ne mêyi makese a mu binuvua balongolole, bu mudi kubala mvese kampanda ne kumumvuija. Angata bumuntu bua mulongi eu ne dimanya diende ne mushinga. (Filip. 4:5) Ikala wela mulongi webe kalumbandi paudi wenda umulongesha ku kakese ku kakese mua kuyisha mu bitupa bishilashilangane bia mudimu wa buambi.

⁵ Bidi ne mushinga bua kuambuluisha mumanyishi mupiamupia bua ikale ne programe wa kupatuka mu buambi pa tshibidilu, nansha ku lumingu luonso koku mushindu. (Filip. 3:16) Enza programe muimpe bua kuyisha pamue ne mulongi ne umukankamije bua ikale upatuka kabidi mu buambi ne bamanyishi bakuabu ba tshisumi. Tshilejilu tshiabu tshimpe ne bulunda buikalabu mua kudia nende nebimuambuluishe bua kumanya mua kuyisha ne bua kuikalaye ne disanka mu buambi bua ku nzubu ne ku nzubu.