Tshitupa tshia 11: Tulombolayi malonga a Bible mimpe
Tuambuluishayi balongi bua kuenza makumbula mapiamapia
1 Padi mulongi wa Bible utuadija kuyisha, neapetangane ne bantu badi banyisha lumu luimpe. Mmunyi mutudi mua kumuambuluisha bua kuenzaye makumbula mapiamapia bimpe ne kukoleshaye dijinga dia bantu dia kumanya malu makuabu?
2 Tudi tutuadija kulongolola dikumbula dipiadipia dîba ditudi tuyukila ne muntu musangu wa kumpala. Ambila mulongi bua atabalele bantu badiye uyukila nabu. (Filip. 2:4) Umulongeshe ku kakese ku kakese bua abasake ku dileja ngenyi yabu, ateleje tshidibu bamba ne afunde malu adi abatangila. Padi muntu uteleja bimpe, lomba mumanyishi mupiamupia eu bua afunde malu manene adibu bayukila. Angata malu aa bua kumuambuluisha bua kulongolola miyuki yalonda.
3 Kudilongolola bua kupinganyina muntu: Nukonkonone binuvua bayukile kumpala, ne leja mulongi mushindu wa kusungula bualu kampanda budi butangila Bukalenge buasankisha muntu eu. (1 Kol. 9:19-23) Nulongolole pamue dinaya dîpi munudi nubala mvese umue ne tshikoso tshimue tshia mu mukanda kampanda wa kulonga nawu Bible. Nulongolole kabidi lukonko lunudi mua kujula ku ndekelu kua diyukidilangana bua kulua kuluandamuna musangu walonda. Leja mulongi mushindu udiye mua kuambuluisha muntu au bua kuvudija dimanya dia Bible misangu yonso idibu bayukila nende.
4 Mbimpe kulongesha kabidi mulongi mushindu mupepele wa kutuadija muyuki padiye upingana musangu udi ulonda. Mumane kuela muntu muoyo, udi mua kuamba ne: “Mvua musanke bikole bua malu atuvua bayukile nebe musangu mushale, ndi mupingane bua kukuleja bualu bukuabu budi mu Bible [butela].” Udi kabidi mua kuleja mumanyishi eu tshia kuenza padi muntu mukuabu ulua kuitaba ku tshiibi.
5 Londakaja ne disuminyina: Kankamija mulongi bua kuikalaye ne tshibidilu tshia kupinganyina diakamue bantu badi bateleja. Bidi mua kutulomba disuminyina bua kupeta bantu ku nzubu. Longesha mulongi mushindu wa kuangata tshipungidi ne muntu, ne muambuluisha bua kumonaye mushinga wa kumupinganyina bu mudiye mulaye. (Mat. 5:37) Longesha mumanyishi mupiamupia bua kuikalaye muena bulunda, muntu udi utabalela bakuabu ne ubanemeka padiye wenda ukeba bantu badi bafuane mikoko ne ukolesha dijinga diabu dia kumanya bia bungi.—Tito 3:2.