Tshitupa tshia 12: Tulombolayi malonga a Bible mimpe
Tulongeshayi balongi mua kutuadija ne kulombola malonga a Bible
1 Padi balongi betu ba Bible batuadija kuyisha, imue misangu badi mua kuikala ne buôwa bua kutuadija malonga a Bible ne kualombola. Tshitudi mua kuenza ntshinyi bua kubumbusha buôwa?—Mat. 24:14; 28:19, 20.
2 Padi mulongi wa Bible ukumbaja malu malomba bua kulua mumanyishi udi kayi muanji kutambula, pamuapa ukadi mubange kuenza midimu mu Kalasa ka Mudimu wa Nzambi. Padiye ulongolola midimu ya mu kalasa ne uyenza, nealue ‘muena mudimu udi kayi ne bua kufua bundu, udi uludikila bantu njila mululame mu dîyi dia Nzambi.’—2 Tim. 2:15.
3 Longesha ku tshilejilu tshiebe: Bua Yezu kulongesha bayidi bende, uvua ubambila malu mumvuike bimpe ne ufila tshilejilu tshimpe. Wakamba ne: ‘Muntu yonso udi muyishibue bimpe neikale bu muyishi wende.’ (Luka 6:40) Udi ne bua kuidikija Yezu ne kufila pebe tshilejilu tshimpe paudi uyisha. Padi mulongi umona muudi udifila mu buambi, udi ujingulula ne: tshitudi tuenzela makumbula mapiamapia mbua kutuadija malonga a Bible.
4 Umumvuije ne: patudi tulomba muntu bua kutuadija kulonga nende Bible, kabiena amu ne mushinga bua kumuleja mu katoba mu katoba mutu dilonga dienzeka to. Pa tshibidilu, bitu bimpe kuangata tshikoso tshimue anyi bibidi mu mukanda ututu tulonga nawu ne bantu ne kumuleja mutubi bienzeka. Udi mua kupeta ngenyi mimpe mu dibeji dia 8 dia Mudimu wetu wa Bukalenge eu ne mu dibeji 6 dia wa Tshiongo 2002.
5 Koku mushindu, lomba mulongi bua aye kukufila anyi aye kufila mumanyishi mukuabu mupiluke mu malonga a Bible. Mu malonga aa, mulongi udi mua kumvuija mvese anyi amue malu a mu tshikoso kampanda. Nunku, padi mulongi umona muudi wenza, neamanye mua kulombola malonga a Bible mimpe. (Nsu. 27:17; 2 Tim. 2:2) Umuele kalumbandi ne umuleje miaba idiye mua kulengeja.
6 Kulongesha bamanyishi bapiabapia bua kuluabu pabu balongi ba Dîyi dia Nzambi nekubambuluishe bua kumanyabu mua kuenza ‘mudimu muimpe’ eu wa kutuadija ne kulombola malonga a Bible. (2 Tim. 3:17) Kuenza nabu mudimu pamue bua lubila ludi lulonda elu kumvuikalu bikole mbualu bua disanka: ‘Udi musue alue angate mâyi a muoyo tshianana.’—Buak 22:17.