Kuyisha Bukalenge ndiakalenga dinene
1 Dituku dionso edi, bantu ba bungi batu bapeta bintu bimpe bia kudi Yehowa. (Mat. 5:45) Kadi anu bakese menemene ke badi ne diakalenga dinene dia kuyisha lumu luimpe lua Bukalenge bua Nzambi bua kuleja dianyisha kudi Mufuki wabu. (Mat. 24:14) Udiku munange mudimu muimpe eu anyi?
2 Kuyisha Bukalenge kudi kutumbishisha Nzambi ne kutuadila bantu badi babungame bua ndululu ya lelu ditekemena ne ditalala. (Eb. 13:15) Bantu badi bitaba mukenji wa Bukalenge eu nebapete muoyo wa tshiendelele. (Yone 17:3) Mmudimu kayi mukuabu udi mua kufila masanka a nunku? Mupostolo Paulo wakaleja muvuaye wanyisha mudimu wende ku mushindu wakawenzaye. Uvua uwangata bu tshintu tshia mushinga mukole.—Bien. 20:20, 21, 24; 2 Kol. 4:1, 7.
3 Tuikalayi ne dianyisha bua mudimu wetu eu: Tudi tuleja dianyisha bua mudimu eu patudi tuenza muetu muonso bua kuulengeja. Tutuku tulongolola malu a kuamba bua alenge mitshima ya batudi tuya kuyisha anyi? Kudiku tshitudi mua kuenza bua kulengeja nkuatshilu wetu wa mudimu ne Bible ne kumanya mua kueleshisha bantu meji anyi? Tudiku tuenza muetu muonso bua kuyisha bantu ba ntengu yonso inayi ya teritware wetu anyi? Tudiku bamanye mua kutuadija ne kulombola dilonga dia Bible anyi? Anu bu bena Kristo ba lulamatu ba kale ne ba lelu, tudi bamanye bimpe tshitudi tuenzela mudimu eu ne kabidi tudi baunange bikole.—Mat. 25:14-23.
4 Padi bukulakaje bututatshisha, patudi tusama anyi bikale ne ntatu mikuabu, bidi bitukolesha ku muoyo bua kumanya ne: lukunukunu luetu mu mudimu eu ntshintu tshidi mua kutuambuluisha bikole. Dîyi dia Nzambi didi ditujadikila ne: tshionso tshitudi tuenza, ni ntshinene ni ntshikese ku mêsu kua bantu, Yehowa yeye udi utshiangata ne mushinga wa bungi.—Luka 21:1-4.
5 Kuyisha malu a Bukalenge bua Nzambi kudi kutupetesha disanka divule. Tshilejilu, muanetu mukuabu wa bakaji wa bidimu 92 wakamba ne: “Pandi mvuluka mudimu eu undi muenzele Nzambi munkatshi mua bidimu 80 bijima, ndi ngumvua disanka dia bungi menemene! Bu meme ne bukokeshi bua kudipingaja ku buana, mvua anu nguenzulula bualu ndi mumone bushuwa mudi ‘luse lujalame lua Nzambi lupite muoyo bulengele.’” (Mus. 63:3) Tuetu petu tunangayi anu kunanga mudimu eu udi Nzambi mutupeshe wa kuyisha Bukalenge buende.