Mpindieu ke tshikondo tshia kuyisha!
1. Bua tshinyi mpindieu ke tshikondo tshia kuyisha?
1 “Nutshine Nzambi, numutumbishe.” Mukenji eu ke udibu benda bamanyisha ‘tshisamba tshionso ne muakulu wonso ne bantu bonso’ ku bulombodi bua banjelu. Bua tshinyi badi baumanyisha? ‘Bualu bua dîba dia dilumbuluisha [dia Nzambi] diakulua.’ Lelu’eu, tudi ‘dîba dia dilumbuluisha’ adi, diafika ku ndekelu kuadi ne kabutu ka malu a tshikondo etshi. Bantu badi ne bua ‘kukukuila yeye wakafuka diulu ne buloba ne mâyi manene ne mishimi ya mâyi.’ Kakuena mudimu mukuabu lelu udi mua kuikala ne mushinga anyi ulomba mitalu bu eu wa dimanyisha “lumu luimpe lua tshiendelele” to. Bushuwa, mpindieu ke tshikondo tshia kuyisha!—Buak. 14:6, 7.
2. Ntshinyi tshidi basadidi ba Yehowa benza bua kuleja mudibu bamanye bimpe tshikondo tshitudi?
2 Mu bidimu dikumi bishale ebi, basadidi ba Yehowa bavua benze mêba pabuipi ne miliyare 12 mu mudimu wa kuyisha Bukalenge bua Nzambi ne kuvuija bantu bayidi. Bantu ba bungi mbashintulule nsombelu wabu bua kupeta mushindu wa kuenza mêba a bungi mu mudimu eu wa dinowa dia mu nyuma. (Mat. 9:37, 38) Tshilejilu, tshidimu tshishale, bamanyishi bapite pa 850 000 bavua bampanda-njila ku ngondo yonso. Bua bampanda-njila ba pa tshibidilu, bitu bibalomba mêba matue ku 70 ku ngondo yonso mu buambi. Bua bampanda-njila bambuluishi, batu babalombe mêba 50.
3. Mmalu kayi adi bamanyishi ne bua kuakaja bua kuenza bumpanda-njila?
3 Tshidi tshikengela bua kuenza bumpanda-njila: Bu mudi bampanda-njila bamanye bimpe ne: “dîba didi dienda dikepa,” batu badienzeja bua nsombelu wabu ikale mupepele. (1 Kol. 7:29, 31, MMM) Badi bakeba mishindu ya kutula makuta makese bua kabikadi mua kupitshisha dîba dia bungi ku mudimu wa bianza. Tshilejilu, bamue mbabuele mu nzubu mikese. Banga mbalekele bintu bidi kabiyi ne mushinga. (Mat. 6:19-21) Misangu mivule, batu balekela kukeba malu adi abasankisha. Batu benza bionso ebi bua kumona mua kudifila muabu muonso ne kushala ne lungenyi luteka anu ku mudimu wa buambi. (Ef. 5:15, 16) Dinanukila, didifila, dieyemena Yehowa ne dimulomba mu masambila bua abakuatshishe, bionso ebi mbiambuluishe bamanyishi ba bungi ne mbafike ku diakaja malu abu bua kuenza bumpanda-njila.
4. Mmalu kayi adi mua kukuambuluisha bua kulua mpanda-njila?
4 Udiku mua kuenza bumpanda-njila anyi? Bua tshinyi kubenga kuyukila bualu ebu ne bampanda-njila badi bapatula bipeta bimpe? Ikala upatuka nabu mu buambi bua umvue disanka ditubu bumvua. Longa biena-bualu bidi biakula bua mudimu wa bumpanda-njila. Difundila bipatshila biudi mua kukumbaja bidi mua kukuambuluisha bua kuangata mudimu wa bumpanda-njila. Pikalaku malu adi akupangisha bua kulua mpanda-njila, uambile Yehowa ne umulombe bua akuambuluishe uajikije.—Nsu. 16:3.
5. Mmunyi mudi bumpanda-njila butuambuluisha bua kulengeja ngenzelu wetu wa mudimu wa buambi?
5 Mabenesha ne masanka: Bumpanda-njila budi bulengeja ngenzelu wetu wa mudimu ne Dîyi dia Nzambi, didi padi difila disanka divule. Nsongakaji kampanda udi mpanda-njila wakamba ne: “Kuikala mumanye mua kuludikila bantu njila mululame mu Dîyi dia Nzambi didi ne bulelela ndibenesha dinene. Paudi wenza bumpanda-njila, udi utamba kuenza mudimu ne Bible. Mpindieu pantu nya kuyisha ku nzubu ne ku nzubu, ntu mvuluka mvese idi mikumbanyine muntu yonso undi nyikila nende.”—2 Tim. 2:15.
6. Mmalu kayi atu bumpanda-njila bulongesha muntu?
6 Bumpanda-njila budi kabidi butulongesha malu mimpe a bungi adi mua kutuambuluisha mu nsombelu wetu. Budi mua kuambuluisha bansonga bua kuenza mudimu bimpe ne dîba diabu, mua kutula makuta ne mua kusomba ne bantu. Bumpanda-njila butu buambuluisha bantu bavule bua kuikala ne mmuenenu wa malu bu wa bena Kristo. (Ef. 4:13) Bampanda-njila batu kabidi ne diakalenga dia kumona mudi tshianza tshia Yehowa tshibakuatshisha.—Bien. 11:21; Filip. 4:11-13.
7. Mmunyi mudi bumpanda-njila butuambuluisha bua kushemeja malanda etu ne Yehowa?
7 Bumue bua ku malu mimpe menemene adi bumpanda-njila butuenzela nkutuambuluisha bua kudia malanda mimpe ne Yehowa. Ebi bidi mua kutukuatshisha mu ntatu. Muanetu wa bakaji mukuabu wakatantamena ntatu mikole wakamba ne: “Malanda mashême adi mudimu wa bumpanda-njila mungambuluishe bua kudia ne Yehowa mmampeteshe mushindu wa kutantamena ntatu yanyi yonso.” Wakamba kabidi ne: “Ndi ne disanka dia bungi bua mundi muenze bidimu bianyi bia ku buntu bukole mu mudimu wa ku dîba ne ku dîba. Mbingambuluishe bua meme kudifila mu malu amvua tshiyi ngelela meji to.” (Bien. 20:35) Nunku, tuenzayi mudimu wa mushinga mukole eu ne muoyo wetu mujima.—Nsu. 10:22.