Muanebe udi mua kuangataku dipangadika dia mushinga mukole anyi?
1. Ndipangadika kayi didi bana ba Bantemu bangate bua tshilumbu tshia mashi? Fila tshilejilu.
1 Dipangadika dia mushinga mukole bua tshilumbu kayi? Bua dielangana mashi mu mubidi. Anu bu muvuabi bileja mu tshiena-bualu tshia “Tuendayi mu mikenji ya Yehowa” mu Tshibumba tshia Nsentedi tshia dia 15 Kabalashipu 1991 (Mfual.), bana ba Bantemu ba Yehowa badi ne bua kuangata dipangadika dishindame bua kuleja ne: dijinga diabu dia kutumikila mukenji wa Nzambi pa tshilumbu tshia mashi didi ne mushinga kudibu ne kudi baledi babu kabidi. Bualu ebu budiku butangila too ne muanebe wa tshitende anyi?
2. Mmukenji kayi uvua kabadi kampanda kele bua muana wakabenga bua kabamuedi mashi, ne ndilongesha kayi didi baledi bena Kristo ne bana babu batshidi bapuekele mua kupeta mu bualu ebu?
2 Mikenji idi yamba tshinyi? Mu ditunga dia États-Unis, Kabadi Kakulu ka mu Illinois ke kabadi kanene kakadi kakose tshilumbu tshia budikadidi bua muana ukadi mushindame bua kubenga dimuela mashi. Mu dikonkonona tshilumbu tshia muanetu wa bakaji wa bidimu 17, kabadi aku kakakosa ne: “Koku kuikale bijadiki bidi bileja bimpe ne: muana eu ukadi mushindame bua kuitaba bipeta bia mapangadika ende ne bua kuela meji a buntu bukole, dîba adi ditabuja diende didi dimupetesha budikadidi budi mu mikenji ya kabukulu bua kubenga anyi kuanyisha ngondapilu kampanda.” Ke bua tshinyi patu baminganga anyi bena mbulamatadi bateta bua kumanya ni muana ukadi mushindame bua kudiangatshila dipangadika, batu bamuela nkonko bua kumvuabu mudiye ubenga yeye nkayende dimuela mashi. Nunku bidi bikengela bua muana ikale mumanye bimpe bubi ne buimpe bua ngondapilu udiye usungula ne bipeta bidi mua kumueneka bua ngondapilu au, ne kuleja patoke ditabuja diende pa bidi bitangila mukenji wa Nzambi bua mashi.
3. Nnkonko kayi idi baledi ne bua kukonkonona bimpe, ne mbua tshinyi?
3 Muanebe neambe tshinyi? Bana bebe badiku mua kumvuija nkayabu tshidibu bumvue pa tshilumbu etshi anyi? Badiku bitaba ne mutshima wabu mujima ne: Nzambi ke udi muele mukenji wa ‘kulekela mashi’ anyi? (Bien. 15:29; 21:25) Badiku mua kumvuija dilongesha edi ne Bible anyi? Badiku mua kushala ne dikima balamate ku dipangadika diabu edi dia kubenga kubelabu mashi nansha baminganga mua kubaleja ne: muoyo wabu udi mu njiwu padi baledi babu kabayiku anyi? Bu mudiku ‘bikondo bidi malu mua kutulukila yonso wa kutudi,’ mmunyi muudi mua kulongesha bana bebe mua kushalabu ne lulamatu bikala bualu kampanda mua kubafikila mu mpukapuka?—Muam. 9:11; Ef. 6:4.
4, 5. (a) Mbujitu kayi budi nabu baledi, ne mmunyi mudibu mua kubukumbaja? (b) Mbinganyi bidi mua kuambuluisha baledi?
4 Baledi, ntshinyi tshinudi mua kuenza? Nudi ne bujitu bua kulongesha bana benu mmuenenu wa Nzambi pa tshilumbu tshia mashi. (2 Tim. 3:14, 15) Diumvuija dimpe didi mu mukanda wa Comment raisonner mu dibeji dia 359-362. Longa mukanda eu ne bena mu dîku diebe. Enza mudimu ne malu adi mu ka tshiena-bualu kadi mu dibeji dia 362-364 ka “Si quelqu’un vous dit“ [Bu muntu mua kuamba ne:], wambulule malu adimu ne bana bebe bua kubambuluisha bua bamanye mua kumvuija bimpe malu adibu bitabuje ne tshidibu baitabujile. (1 Pet. 3:15) Diambuluisha dikuabu ditudi nadi pa tshilumbu tshia mashi didi mu broshire wa Comment le sang peut-il vous sauver la vie? ne mu Tshibumba tshia Nsentedi tshia dia 15 Kabalashipu 2004, dibeji dia 14-24. Kudi kabidi bande ya video bu mudi wa Soigner sans transfuser: besoins et droits du patient ne wa Pas de sang: la médecine relève le défi idibu bapatule mpindieu pa ditadi dia DVD didi ne tshiena-bualu etshi: Des alternatives à la transfusion—Documentaires, mudi ngenyi mimpe idi ileja bua tshinyi bidi bia meji bua kuitaba luondapu anyi dipandibua kabayi batuela mashi, ne bipeta bimpe bidi bifuminaku. Bena mu dîku diebe bakadiku bamone bande eyi ne bayukidilanganepu matuku aa anyi?
5 Ambuluisha bana bebe bua ‘badijinguluile tshidi disua dia Nzambi dimpe, didi dimusankisha ne didi diakane tshishiki’ pa tshilumbu tshia mashi. Dîba adi badi mua kuangata dipangadika dia mushinga mukole didi disankisha Yehowa.—Lomo 12:2.