Kalasa kadi katuambuluisha bua kutumikila
1 Patudi tukonkonona malu adi mu Programe wa Kalasa ka Mudimu wa Nzambi bua 2006, tudi ne bua kuenza muetu muonso bua kutumikila malongesha a mu Bible adimu mu mudimu wetu wa buambi ne mu nsombelu wetu wa ku dituku dionso. Tudi ne bua kuditatshisha bua kutumikila malu atudi tulonga.—Yone 13:17; Filip. 4:9.
2 Difila dia mandamuna: Mbasakidile bateleji munite umue mu programe wa tshidimu etshi bua kufilabu mumvuija mu tshitupa tshia malu manene a mu dibala dia Bible. Mbua kuleja ne: muanetu wa balume udibu bapeshe malu manene udi ne bua kuenza mudimu wende mu minite itanu pamutu pa isambombo. Aba badi mu bibasa badi bafila mumvuija badi ne bua kunemeka pabu dîba. Mbimpe kudilongolola kumpala kua dîba bua kumona mua kufila diumvuija mu sekonde 30 anyi mishadile. Dinemeka dia dîba didi mua kuambuluisha bantu batue ku dikumi bua bafile mumvuija mu minite itanu idibu bapeshe bateleji.
3 Miyuki idi ilongesha: Malu manene a mu dibala dia Bible ne muyuki wa ndongeshilu bidi ne bua kushindamena pa mushinga udi nawu malu pa kuleja mushindu wa kuatumikila mu buambi ne mu nsombelu wetu wa ku dituku dionso. Ngamba-malu kêna anu mua kusaka bateleji ku dienza bualu kampanda patupu to. Kadi udi ne bua kuleja bualu abu, kuleja mua kubutumikila ne masanka adi amueneka mu dibutumikila. Udi mene mua kuamba ne: “Monayi mudi mvese eu mua kutuambuluisha,” anyi ne: “Monayi mutudi mua kuenza mudimu ne mvese eyi mu buambi.” Bakulu ne basadidi ba mudimu badi bamanye malu a muaba udibu basombele badi mua kuenza muabu muonso bua kuleja mushindu muimpe wa kutumikila amue malongesha mu nsombelu.
4 Ditela bilejilu bia mu Bible didi mua kuambuluisha bua kuleja mua kutumikila amue malongesha. Kunyima kua ngamba-malu mumane kufila tshilejilu kampanda tshia mu Bible, udi mua kuamba ne: “Udi pebe mua kuikala mu nsombelu wa mushindu eu.” Ngamba-malu udi ne bua kuenza bua ne: diumvuija dionso didiye ufila pa mushindu wa kutumikila tshilejilu tshia mu Bible atshi tshikale mu diumvuangana ne mvese ya muaba udiye mutshipatuile, ne Bible mu kabujima kende ne bikadi “mupika wa lulamatu ne wa budimu” mulongeshe.—Mat. 24:45, NW.
5 Meji mbukokeshi bua kuenza mudimu bimpe ne dimanya ne dijingulula dia mianda. ‘Bualu bua kumpala mmeji.’ (Nsu. 4:7, MMM) Patudi tuenda tupeta meji mu malu atudi tulonga mu Kalasa ka Mudimu wa Nzambi, tudienzeje kabidi bua kuikala ne bukokeshi bukumbane bua kuapetesha bakuabu.