Enza mudimu bimpe ne mikanda yetu ya malu a mu Bible
1, 2. Mmunyi mutu bantu ba bungi bamona mikanda yetu, ne ndukonko kayi lutudi mua kudiela?
1 Muntu mukuabu wakafundila biro bia Bantemu ba Yehowa mukanda wamba ne: “Ndi mutuadije kubala mikanda yenu katshia mu tshidimu tshia 1965. Mvese idibu bafilamu, ntu nyitangila mu Bible pandi mbala, ne malu onso adimu adi apetangana ne tshidi Bible ulongesha. Ntu musue misangu yonso kumanya bulelela pa bidi bitangila Nzambi ne Yezu, ne ndi ngamba mu bulelela ne: ndi mupete mandamuna malelela a nkonko yanyi ku diambuluisha dia Bible ne mikanda yenu.” Muntu eu wakalomba dilonga dia Bible mu mukanda wende eu.
2 Anu bu muntu eu udi ne dianyisha, bantu ba bungi pa buloba bujima batu banyisha mikanda ya kulonga nayi Bible idi “mupika wa lulamatu ne wa budimu” upatula. (Mat. 24:45, NW) Ku tshidimu tshionso, badi bapatula mikanda mipite bungi bua kuambuluisha bantu ba muoyo muimpe bua “bafike ku dimanya dia malu malelela.” (1 Tim. 2:4) Mmunyi mutudi mua kuenza mudimu bimpe ne mikanda yetu ya malu a mu Bible?
3. Mmunyi mutudi mua kuepuka dinyanga dia mikanda?
3 Epuka dinyanga mikanda: Mu kupita kua matuku, tudi mua kupeta mikanda mipite bungi itudi katuyi nansha tuenza nayi mudimu to. Ntshinyi tshitudi mua kuenza bua kubenga kunyanga mikanda itudi nayi eyi ya mushinga mukole? Mbimpe kumanya diambedi mikanda itudi nayi menemene dijinga patudi tulomba mikanda bua mudimu wa buambi. Katuangatshi mikanda ya muomumue mipitepite bungi bua kuya nayi mu buambi to, kadi tudi mua kuangata mukanda umue anyi ibidi patupu ku yonso itudi nayi dijinga, ne tuetu bamane kuyifila tudi mua kupingana bua kuangata mikuabu. Dienza nunku didi dituambuluisha bua kubenga kuvudija mikanda bungi tshianana ku nzubu. Bia muomumue, patudi ne bibejibeji bia bungi ku nzubu bitudi katuyi bafile mu buambi, mbimpe kukepesha bungi bua bitudi tulomba.
4. Tshia kuenza ntshinyi bikala tshisumbu ne mikanda mipite bungi mu stoke?
4 Mikanda mipite bungi mu stoke: Bikala tshisumbu ne mikanda mipite bungi mu stoke, muanetu udi utangila malu a mikanda udi mua kukeba bisumbu biena mutumba bidi mua kuenza mudimu ne mikanda eyi ya pa mutu. Bamanyishi badi mua kupesha bena mu mêku abu anyi balongi ba Bible peshi bantu bakuabu mikanda eyi ya kale. Bantu bapiabapia bakadi batuadije kubuela mu bisangilu badi mua kuikala dijinga ne mikanda eyi ya kale bua tshilaminu tshiabu tshia mikanda ya malu a Nzambi.
5. Mmunyi mutudi mua kuleja dianyisha bua mikanda yetu?
5 Tudi basue bua mikanda yetu ikumbaje tshipatshila tshiayi tshia kuambuluisha bantu ba muoyo muakane bua bamanye malu mimpe adi Yehowa mulongolole. Anu bu Yezu uvua kayi unyangakaja biakudia kunyima kua mumane kudisha misumba ya bantu mu tshishima, tshipatshila tshietu tshikale tshia kuenza mudimu bimpe ne mikanda yetu ya malu a mu Bible itudi nayi. (Yone 6:11-13) Mukenji wa lupandu udi mu mikanda yetu eyi kawena mua kulenga mitshima ya bantu badi banange buakane tuetu bashale bayilame mu tubadi anyi mu bibuta bietu to. Ke bualu kayi tudi ne bua kuikala ne nkatshinkatshi patudi tuangata mikanda bua mudimu wa buambi ne kuenza nayi mudimu bimpe bua kuambuluisha bantu bakuabu.—Filip. 4:5.