Bande wa video udi uleja imue ngondapilu milenga

Banzuji ne baminganga mbatuadije kunemeka mmuenenu ne manême a babedi bikole. Bualu ebu mbupatuishe ngondapilu mipiamipia idi mimpe bua Bantemu ba Yehowa. (Bien. 15:28, 29) Ke tshipatshila tshia bande wa video wa Soigner sans transfuser​—Besoins et droits du patient. Nutangile bande eu ne pashishe nukonkonone binuvua bamone. Dimanyisha: Bu mudi bande eu muikale ne imue miaba mikese idibu bapanda bantu, mbimpe baledi bikale ne budimu padibu bamutangila ne bana babu batekete.

(1) Bua tshinyi bamue baminganga kabatshitu bela bantu mashi? (2) Fila bilejilu bisatu bia bantu bavuabu bapande ne lutatu lua bungi kadi kabayi babele mashi to. (3) Kudi baminganga bungi kayi pa buloba bujima badi bitabe bua kupanda bantu kabayi babela mashi? Bua tshinyi mbitabe bua kuenza nanku? (4) Ntshinyi tshidi malu adibu bakonkonone mu imue mpitadi matuku aa maleje pa tshilumbu tshia dielangana dia mashi? (5)  Njiwu kayi idi mua kumueneka padibu bela bantu mashi? (6) Ntshinyi tshidi bamue bamanyi bapiluke bafike ku diamba bua bulenga bua diondapa bantu kabayi babela mashi? (7) Misangu ya bungi ntshinyi tshitu tshijikijija mashi? Ndîba kayi didi njiwu kayiyiku nansha mashi makepele? Bidi bikengela kuenza tshinyi bua kuepuka dijika dia mashi? (8) Mmushindu kayi udibu mua kuvudija globile mikunze mu mubidi wa mubedi? (9) Mmishindu kayi idibu mua kuenza nayi mudimu bua mashi kaapatuki a bungi padibu bapanda muntu? (10) Ngondapilu ya kubenga kuela mashi idi mua kukumbanyina bana bakese anyi bantu badi ne njiwu ya lufu anyi? (11) Ntshimue tshia ku bikadilu binene kayi bimpe tshidi munganga ne bua kuikala natshi? (12) Bua tshinyi mbimpe bena Kristo kudianjilabu kusungula kumpala mushindu kampanda wa luondapu udi kauyi wa dielangana mashi? Ntshinyi tshidibu mua kuenza?

Kuitaba imue ya ku mishindu idibu baleja mu bande eu ndipangadika didi muntu ne muntu ne bua kudiangatshila bilondeshile kondo kende ka muoyo kalongesha kudi Bible. Ukadi musungule mushindu wa luondapu udi muimpe buebe ne bua bana bebe anyi? Manyisha bimpe menemene bena dîku diebe badi kabayi Bantemu dipangadika diebe edi ne tshiudi mudiangatshile.​—Tangila “Nkonko ya babadi” mu Tshibumba tshia Nsentedi tshia dia 15 Kabalashipu 2004, ne tshia dia 15 Kasuamansense 2000.