Tutabalelayi bakuabu: Pa kudianjila kudilongolola
1 Kudilongolola bimpe kumpala kua kuya mu buambi kudi kutuambuluisha bua kutabalela bakuabu. Bualu, tuetu bikale badilongolole bimpe, meji etu kaakuikala matuma anu ku bitudi tuamba to, kadi netutabalele bikole muntu utudi tuyukila nende. Netuikale ne dikima ne netuakule ne muoyo mujima. Kadi mmunyi mutudi mua kudilongolola bua kuyisha bimpe?
2 Keba mushindu muimpe wa kuyukila ne bantu: Sungula lumue lua ku ngenyi idibu baleje mu Mudimu wetu wa Bukalenge wa Tshiongo 2006 ludi luakanyine muaba unudi, ne keba mua kuluamba mu ebe mêyi. Uluambe bilondeshile bantu ba mu teritware webe. Tshilejilu, wewe utamba kupetangana ne bena nzambi kampanda anyi tshisa kansanga, keba mushindu uudi mua kubambila malu mushindu muimpe. Paudi uyisha bantu bilondeshile tshidibu, udi uleja muudi ubatabalela ne muoyo mujima.—1 Kol. 9:22.
3 Tungunuka ne kulengeja nyishilu webe. Bu mudi mêyi a ntuadijilu mikale ne mushinga, ikala ukeba bua kumona tshidi bantu benza paudi utuadija kuyukila nabu. Bualu buudi ubambila budi bubasankisha anyi? Badi bandamuna nkonko iudi ubela anyi? Pikalabi kabiyi nanku, akaja nyishilu webe too ne pawamona ne: walu mulenga.
4 Malu adi mua kukuambuluisha: Bambi ba lumu luimpe ba bungi batu ne lutatu lua kuvuluka mushindu wa kuyisha padibu bafika kumpala kua muntu. Biobi bikuenzekela nanku, ukadiku mutete bua kuambulula malu awamba mu buambi ne dîyi dikole anyi? Wewe wambulula malu aa, neuakuate mu mutu bimpe ne neuambe kakuyi lutatu. Nebikuambuluishe kabidi bua kumona mua kupita ne ntatu mikuabu iudi mua kupeta mu buambi.
5 Mushindu mukuabu udi mua kukuambuluisha ngua kufunda mêyi makese a biudi ne bua kuamba pa kabeji ne kutapaku dîsu kumpala kua kubuela kua muntu. Bamue mbamone ne: mêyi makese mafunda pa kabeji adi abambuluisha bua kuakula badilekelele ne kuyukila ne bantu bimpe. Kudilongolola bimpe ke kuatuambuluisha bua kutabalela bakuabu ne kuyisha lumu luimpe bimpe menemene.