Keba mishindu ya kuyisha
1 Mu tshisumbu tshia bena Kristo mudi bantu badi ne nsombelu mishilangane. Kadi tuetu bonso tudi badisuike bua kutumbisha Yehowa. (Mus. 79:13) Nansha nanku, bikala bupele anyi ntatu mikuabu ikupangisha bua kuyisha lumu luimpe, mmunyi muudi mua kupeta dîba dia kuyisha?
2 Mu midimu yetu ya matuku onso: Misangu yonso, Yezu uvua uyisha bantu bavuaye upetangana nabu ne bavuaye usomba nabu. Tshilejilu, dimue dituku pavuaye upita muaba uvuabu balambuisha bitadi, wakayukila ne Matayo; pavuaye mu njila, wakayukila ne Zakayo; pavuaye wikisha, wakayukila ne mukaji muena Samalea. (Mat. 9:9; Luka 19:1-5; Yone 4:6-10) Tudi petu mua kubuelela pa miyuki itudi tuyukila ne bantu bua kubayisha. Tuetu bikale ne Bible ne trakte anyi ne broshire, netumvue dijinga dia kuakula bua malu atudi batekemene.—1 Pet. 3:15.
3 Disama anyi bulema anyi bukulakaje budiku bukupangisha bua kuyisha ku nzubu ne ku nzubu anyi? Keba mushindu wa kuyisha baminganga ne bantu badi balua kukutangila. (Bien. 28:30, 31) Pawikala kuyi ne mushindu wa kupatuka lupangu, ukadiku mutete bua kuyisha bantu ku nshinga anyi pa kubafundila mikanda anyi? Muanetu wa bakaji mukuabu uvua ne tshibidilu tshia kufundila balela bende bavua kabayi Bantemu. Uvua ubambila malu a mu Bible ne ubalondela malu avuaye mupete pavuaye uyisha.
4 Ku mudimu anyi mu tulasa: Dijinga dietu dia kutumbisha Yehowa didi kabidi ditusaka bua kukeba mishindu ya kukuna ntete ya bulelela ku mudimu anyi mu tulasa. Tshilejilu, mumanyishi wa lumu luimpe mukuabu wa bidimu 8 wakambila balongi nende bivuaye mubale mu Réveillez-vous! pa bidi bitangila ngondo. Pakamanya mulongeshi wabu kuvuaye mupetele malu aa, wakatuadija kulomba bibejibeji bia Tshibumba tshia Nsentedi ne Réveillez-vous! Tuetu tuteka mukanda wa Bible ulongesha pa muaba udi bantu bakuabu mua kuumona ku mudimu, nebibafikishe ku dituela nkonko ne nebitupeteshe mushindu wa kuyisha.
5 Kuenaku mua kukeba mishindu iudi mua kuyisha paudi wenza midimu ya ku dituku ne ku dituku anyi? Patudi tuditatshisha bua kuyisha padi mpunga umueneka, katuakupitshisha dituku katuyi ‘bafile kudi Nzambi mulambu wa kumutumbisha nawu’ to.—Eb. 13:15.