Tuenze bua mulambu wa Yezu wambuluishe bantu netu
Netuenze Tshivulukilu tshia lufu lua Yezu mu dia matuku 12 ngondo muinayi
1. Tela bualu bumue budi bantu ba Nzambi benza bua kuleja dianyisha bua mulambu wa Yezu.
1 Tudi tuela Nzambi ‘tuasakidila bua kupa kuende kudi kakuyi mua kuambibua.’ (2 Kol. 9:15) Mêyi aa adi aleja tshitutu tumvua bua buimpe ne bulenga budi Nzambi mulejile bantu ku mulambu wa Muanende Yezu Kristo. Bua kuleja dianyisha dietu, netudisangishe mu dia matuku 12 ngondo muinayi bua kuenza Tshivulukilu tshia lufu lua Yezu.
2. Mbanganyi bakuabu batu balua mu Tshivulukilu ne Bantemu ba Yehowa? Bidi bikengela benze tshinyi bua mulambu wa Yezu ubambuluishe?
2 Tshidimu tshionso etshi, Bantemu ba Yehowa ne bantu bakuabu batue ku miliyo dikumi batu benza Tshivulukilu tshia lufu lua Yezu. Padibu balua mu Tshivulukilu, badi baleja ne: badi banyisha mulambu eu. Kadi bua wowu kubambuluisha, badi ne bua kuwitabuja. (Yone 3:16, 36) Tuenze tshinyi bua bapete ditabuja edi? Tubalombe bua bikale balonga Bible ne babuela mu bisangilu lumingu luonso. Tumonayi amue malu aa.
3. Tudi mua kutuadija kulonga Bible ne bantu batudi tubikidisha mu Tshivulukilu munyi?
3 Malonga a Bible: Paudi ubikila muntu mu Tshivulukilu, keba mushindu wa kutuadija kulonga nende Bible ne mukanda wa Bible ulongesha. Umumvuije mutu Tshivulukilu tshienzeka bilondeshile malu adi mu dibeji dia 206-208 mu tshiena-bualu tshia: “Didia dia Mukalenge ntshibilu tshidi tshitumbisha Nzambi.” Nudi mua kulonga nende malu aa musangu umue anyi ibidi, imue misangu bimanyine nansha kuulu. Pamuapa panudi nujikija bintu ebi, muntu au udi mua kuitaba bua nulonge nshapita 5 udi wamba ne: “Tshia-bupikudi ndipa ditambe bunene dia Nzambi.” Padi dilonga edi dibanga kuenzeka bimpe, nutuadije kulonga mu nshapita wa kumpala ne mikuabu anu mudiye milondangane amu.
4. Tudi mua kutuadija kulonga Bible ne banganyi mu tshikondo etshi?
4 Tudi mua kutuadija kulonga ne banganyi? Udi mua kutuadija ne bena mudimu nebe anyi balongi nebe anyi bena mutumba nebe. Bana betu ba balume badi mua kukeba bua kulonga ne ba bayende ba bana betu ba bakaji badi kabayi Bantemu. Kanupu muoyo balela ne balunda benu. Tudi mua kubikidisha nangananga bantu bonso bakadi kabatshiyi babuela mu bisangilu. (Luka 15:3-7) Bana betu, tuenze muetu muonso bua mulambu wa Yezu ubambuluishe pabu.
5. Mmunyi mutudi mua kufikisha balongi ba Bible ne bantu bakuabu bua kubuela mu bisangilu?
5 Bisangilu bia tshisumbu: Tshivulukilu tshitu tshisangilu tshia kumpala tshitu balongi ba Bible ba bungi ne bakuabu bantu babuela. Tshia kuenza ntshinyi bua bantu aba babuele kabidi mu bisangilu bietu bikuabu? Badi bamba mu Mudimu wetu wa Bukalenge wa Tshisanga 2005, mu dibeji dia 8 ne: “Bambila tshiena-bualu tshia muyuki wa patoke wenzeka musangu udi ulonda. Baleja malu alongeshabu mu dilonga dia Tshibumba tshia Nsentedi ne mu Dilonga dia Mukanda dia Tshisumbu. Bumvuije tshidi Kalasa ka Mudimu wa Nzambi ne Tshisangilu tshia Mudimu. Wewe ne mudimu wa kuenza mu kalasa, nudi pamuapa mua kuwambulula nabu. Bambila ngenyi minene ivuabu baleje mu bisangilu. Baleja bimfuanyi anyi foto idi mu mikanda yetu bua kubambuluisha bua bafuanyikije ne malu adi enzeka. Anu musangu wa kumpala unudi nutuadija kulonga au, ubabikile bua balue kubuela mu bisangilu.”
6. Mmishindu kayi ibidi itudi mua kuenza bua mulambu wa Yezu wambuluishe bantu?
6 Patudi tulonga Bible misangu milondangane bimpe ne bantu ne kabidi batuadija kubuela mu bisangilu bionso, kabitu binenga bua kuluabu bayidi ba Yezu to. Bana betu, tuambuluishayi bantu netu bua mulambu wa Yezu ne bintu bikuabu bidibu balongolole ebi bibakuatshishe.