Mushindu uudi mua kukumbaja malu audi mudifundile mu mudimu wa Nzambi
1. Mbipatshila kayi bimpe bidi bansonga ba bungi badifundile?
1 Wewe nsonga muena Kristo, udi mudifundile bipatshila bimpe bualu udi munange Yehowa ne udi musue ‘kukeba bangabanga bukalenge bua Nzambi’ bualu ke tshivua Yezu mulombe bena Kristo bonso. (Mat. 6:33) Tshipatshila tshiebe tshidi mua kuikala tshia kulua mpanda-njila bua kumona mua kuvudija mudimu webe anyi kuya kuambuluisha muaba udibu dijinga ne bamanyishi. Bamue badi mua kuikala badifundile bua kuenza mudimu wa diasa dia Nzubu ya Bukalenge ne mikuabu anyi kuya ku Betele. Bipatshila bimpe be!
2. Tshiakuambuluisha bua kukumbaja bipatshila biebe ntshinyi?
2 Mushindu muimpe wa kufika ku dikumbaja bipatshila biebe, ngua kubifunda mu dibeji. Tshibumba tshia Nsentedi tshia mu dia 15 Kashipu 2004 tshidi tshiamba ne: “Lungenyi lubuitshidile ludi lulua lutoke patudi tusungula miaku ya kulumvuija nayi. Ke bualu kayi tudi mua kufunda bipatshila bietu ne mushindu wa kubikumbaja.” Kabidi, bipatshila biudi munkatshi mua dikumbaja mpindieu ke bidi mua kukuambuluisha bua kumona ni wakokesha bikuabu biudi mudifundile.
3. Tela bipatshila bidi muntu ne bua kukumbaja mpindieu bua kufikaye ku ditambula.
3 Bipatshila biudi ne bua kukumbaja mpindieu: Tshilejilu, biwikala kuyi muanji kutambula, mona malu adi mua kukuambuluisha bua wewe kutambula. Imue misangu udi ne bua kukeba bua kumvua bimpe malongesha manene a mu Bible. Nunku, difundila tshipatshila tshia kulonga bimpe menemene mukanda wa Bible ulongesha ne tshia kubala mvese yonso idimu kadi idibu kabayi batela mêyi ayi. (1 Tim. 4:15) Difundila kabidi tshipatshila tshia kubala Bible mujima kutuadijila ku Genese too ne ku Buakabuluibua anu bu mutu bena ku Betele ne bena mu Kalasa ka Gilada benza. Pashishe, lama tshilele tshia kubala Bible dituku dionso. (Mus. 1:2, 3) Wewe muenze nanku, neukole mu nyuma bikole be! Sambila ne muoyo mujima kumpala kua kutuadija kubala Bible anyi kua kudilongela Bible ne sambila kabidi paudi ujikija, pashishe enza muebe muonso bua kutumikila biudi ulonga.—Yak. 1:25.
4. Mbipatshila kayi bidi muntu udi tshilejilu musue kuya ku Betele anyi kulua mpanda-njila wa pa buende ne bua kukumbaja mpindieu?
4 Kadi biwikala ukadi mutambule, mbipatshila kayi biudi mua kudifundila? Udiku musue kulengeja nyishilu webe anyi? Tshilejilu, utuku udifila ne muoyo mujima bua kumanya mua kufila mvese bimpe paudi uyisha anyi? (2 Tim. 2:15) Mmunyi muudi mua kufika ku dikala uyisha bikole? Difundila bipatshila bidi bikukumbanyine biudi ne bua kukumbaja mpindieu bidi mua kukufikisha ku dikumbaja bikuabu bia matuku atshilualua.
5. Mmunyi mudi kudifundila bipatshila bia matuku makese kufikishe muanetu mukuabu bua kukumbaja tshipatshila tshia kuya ku Betele?
5 Tshilejilu tshimpe tshia kulonda: Pavua Tony ne bidimu 19, wakaya kumona mutubu benza mudimu ku Betele. Bualu ebu buakamujula dijinga dia kuenzaye pende mudimu ku Betele. Kadi kavua ne bikadilu bimpe to, ne kavua muanji nansha kudilambula kudi Nzambi to. Tony wakangata dipangadika dia kutuadija kuenza disua dia Yehowa ne kukumbaja malu malomba bua kutambula. Pakatambulaye, wakadifundila tshipatshila tshia kulua mpanda-njila muambuluishi ne wa pa tshibidilu, kufundaye mu kalandriye kende matuku avuaye ne bua kutuadija midimu eyi. Ela meji muakasankaye pakamubikilabu ku Betele matuku makese patupu kunyima kua yeye mulue mpanda-njila!
6. Tshidi mua kukuambuluisha bua kukumbaja bipatshila biudi mudifundile mu mudimu wa Nzambi ntshinyi?
6 Wewe muteke pebe malu a Bukalenge bua Nzambi pa muaba wa kumpala, newenzele Yehowa mudimu bimpe matuku adi kumpala. Teka “mudimu webe” mu bianza bia Yehowa mu disambila ne enza muebe muonso bua kuukumbaja.—Nsu. 16:3; 21:5.