Tutabalelayi bakuabu: Pa kuyisha bantu bonso katuyi tusunguluja
1 Mupostolo Yone wakamona mu tshikena-kumona muanjelu upapala muulu, muikale ne lumu luimpe lua tshiendelele lua kuambila bantu ba mu ‘ditunga dionso ne tshisamba tshionso ne muakulu wonso ne bantu bonso.’ (Buak. 14:6) Tudiku petu tuyisha bantu bonso bua kuidikija muanjelu eu anyi? Pamuapa tutu tudianjila kuelela bantu meji mabi kumpala kua kuyukila nabu kadi katuyi bamanye. Tutu tuyisha bantu lumu luimpe bilondeshile mushindu utudi tubamona. Ke bualu kayi tudi ne bua kuikala ne dinanga patudi tuyisha bantu ba mishindu yonso.
2 Tangila mu teritware webe: Mu teritware webe mudiku bantu ba miaba mikuabu anyi bena tshimuangi anyi? Bitu bitekete bua kubenga kutabalela bantu ba nunku. Ubakebe ne utete mua kubamanya bimpe. Keba mua kumanya bidibu nabi dijinga ne malu adi mabatonde, malu atubu basue ne atubu bakine, atubu batshina ne mutubu bamona bantu bakuabu. Dienzeja bua kubayisha bilondeshile malu aa. (1 Kol. 9:19-23) Anu bu mupostolo Paulo, tudi ne bua kudimona ne dibanza dia kuyisha bantu bonso badi mu teritware, kusangisha ne badi bafumine mu matunga makuabu, ba bilele bishilashilangane, badi bakula muakulu mukuabu ne badi ne makuta a bungi.—Lomo 1:14.
3 Kadi mmunyi muudi mua kuyisha bantu badi bakula muakulu mukuabu? Yisha bimpe ne kakanda ka Une bonne nouvelle pour des gens de toutes nations. Udi kabidi mua kuikala ne trakte anyi broshire wa miakulu idibu bakula mu teritware webe. (Tangila Mudimu wetu wa Bukalenge wa Kashipu 2003, dib. 4, tshik. 2-3.) Bamue bamanyishi mbadienzeje bua kumanya mutubu belangana muoyo mu muakulu wa bena mu teritware wabu, mbalonge ne mua kutuadija kuyukila nabu mu muakulu au. Misangu ya bungi bantu batu basue kuteleja muntu udi uditatshisha bua kuakula muakulu wabu nansha yeye muambe anu mêyi makese patupu, nunku bidi mua kubafikisha ku diteleja lumu luimpe.
4 Idikija Yehowa: Patudi tuyisha bantu ba mishindu yonso, tudi tuidikija Yehowa Nzambi wetu udi kayi ne kansungasunga, udi ‘musue bantu bonso basungidibue, bafike ku dimanya dia malu malelela.’—1 Tim. 2:3, 4.