Mandamuna ku nkonko yenu

▪ Bidiku mua kuikala bimpe bua kuangata malu atuikala ne bua kulonga mu Kalasa ka Mudimu wa Nzambi, kuabumbakaja pamue bua kuapesha bantu bakuabu anyi?

Eyowa, muntu udi mua kuenza nanku bua bena mu dîku diende anyi bua balunda bende babala ku minu. Kadi bintu bia nanku kêna ne bua kubiabanyina bantu bonso tshianana anyi kubipanyisha to, bualu yeye muenze nanku, udi ushipa bukenji bua badi babipatule.​—Lomo 13:1.

Bua midimu mikuabu ya mu Kalasa ka Mudimu wa Nzambi, batu baleja anu tshiena-bualu nkayatshi kabayi baleja mukanda wa kuangatshila malu adimu to. Kadi bidiku mua kuikala bimpe bua muntu kufundaye liste wa miaba ya kupetela malu aa mu mikanda yetu bua kuapesha bantu badibu bapeshe midimu eyi anyi? Tòo. Ke mudibi kabidi bua mandamuna a nkonko ya diambulula dia mu kalasa aka. Katuena mua kuapesha bantu bakuabu to, bualu kabiena mua kubambuluisha bua kuvuluka malu manene adi ne mushinga to. Balongi badi ne bua kudikebela malu aa bobu nkayabu mu mikanda yetu. Kudikebela malu mushindu eu mmushindu mukuabu udi Yehowa utulongesha ku diambuluisha dia kalasa aka bua tuetu kufika ku diakula ne “ludimi lua badi bayila” anyi badibu balongeshe.​—Yesh. 50:4.