Lungenyi lua didifila ludi lupetesha masanka
1. Mmunyi muvua Davidi ne Nehemiya baleje lungenyi luabu lua didifila?
1 Pavua Goleyata muyobole bena Isalele, musalayi yonso tshianana uvua mua kudifila bua kuluangana nende. Kadi anu Davidi, nsongalume kampanda mulami wa mikoko uvua kayi mumanye malu a busalayi ke wakadifila. (1 Sam. 17:32) Pavua bena Isalele bapingane ku Yelushalema kadi bapangile bua kuibakulula bimanu bia Yelushalema, Nehemiya muntu uvua upesha mukalenge wa bena Pelasa mvinyo ke wakadifila bua kulekela mudimu wende mulenga ku nzubu wa mukalenge ne kuya ku Yelushalema bua kulongolola mudimu. (Neh. 2:5) Yehowa wakabenesha Davidi ne Nehemiya bua lungenyi luabu lua didifila.—1 Sam. 17:45, 50; Neh. 6:15, 16.
2. Bua tshinyi bena Kristo badi ne bua kuikala ne lungenyi lua didifila?
2 Lelu’eu, lungenyi lua didifila bua kuenza mudimu kampanda ku budisuile kaluena mu bantu to. Mu ‘matuku a ku nshikidilu’ aa, bantu badi ne bia kuenza bia bungi ne bavule ‘mbadisue.’ (2 Tim. 3:1, 2) Mbipepele bua muntu kudina ne kasuki mu midimu yende bimufikisha too ne ku dipanga kudifila bua kuambuluisha bakuabu padibi bikengela. Kadi tuetu bena Kristo, tudi basue kuidikija Yezu bualu uvua udifila bua kuambuluisha bantu bakuabu. (Yone 5:5-9; 13:12-15; 1 Pet. 2:21) Mmushindu kayi utudi mua kuleja lungenyi lua didifila, ne mmasanka kayi atuapeta?
3. Lungenyi lua didifila ludi lutuambuluisha bishi mu bisangilu?
3 Bua bena Kristo netu: Tudi mua kupesha bantu bakuabu ‘kupa kua nyuma’ patudi tudifila bua kuandamuna mu bisangilu padibu balomba bantu bua kuandamuna. (Lomo 1:11) Patudi tuandamuna, tudi tutumbisha Yehowa, tushindika bulelela mu lungenyi ne mu muoyo wetu, ne tumona bisangilu bilua bilenga. (Mus. 26:12) Tudi kabidi mua kudifila bua kuenza mudimu kampanda mu Kalasa ka Mudimu wa Nzambi padibu bakeba muntu udi mua kuwenza. Kuenza nunku nekutuambuluishe bua kulengeja ndongeshilu wetu.
4. Tudi mua kuleja lungenyi lua didifila mu mishindu kayi mikuabu?
4 Bana betu ba balume badi mua kuleja lungenyi lua didifila padibu bajinga kuambula majitu mu tshisumbu. (Yesh. 32:2; 1 Tim. 3:1) Tuetu bonso tudi mua kuenza bua mpuilu ne mpungilu bipitakane bimpe patudi tudifila bua kuenza mudimu mu bibambalu kampanda. Patudi tudifila bua kuyisha pamue ne mutangidi muena ngendu anyi bua kumupesha biakudia, tudi ‘tusambangana’ nende. (Lomo 1:12) Patudi tudifila bua kuambuluisha bana ba nshiya, bakaji ba mu lufuila, babedi ne bakulakaje, bamamu badi ne bana bapuekele, ne bantu bakuabu mu tshisumbu, tudi tumvua disanka ne Yehowa udi utunanga.—Nsu. 19:17; Bien. 20:35.
5. Mmalu kayi adi atangila Nzubu wa Bukalenge adi alomba bena budisuile?
5 Tudi mua kufila dîba dietu ne bukole buetu patudi tukomba Nzubu wa Bukalenge, tumukolopa ne tumulongolola. Kabidi, bu mudi bantu ba bungi balua mu bulelela, dijinga dia kupeta Nzubu ya Bukalenge ne bena budisuile badi mua kuyibaka didi dienda divula. Tshilejilu, muanetu mukuabu ne muena kuende bavua badifile bua kuambuluisha Komite wa luibaku nansha muvuabu kabayi bamanye kuibaka to. Bakabalongesha mudimu ne mpindieu mbamanye kuenza bimanu bia nzubu. Muena kuende wakamba ne: “Dienza mudimu dîba dionso ne bantu bakuabu nditufikishe ku didia nabu bulunda bukole. Nansha mutu mubidi mutshioke ku dilolo, malanda etu ne Yehowa adi akola.”
6. Bua tshinyi mudimu wa buambi ke mudimu mutambe bunene utudi mua kudifila bua kuenza?
6 Patudi tuyisha: Mudimu mutambe bunene utudi mua kudifila lelu bua kuenza nkuyisha Bukalenge bua Nzambi. Patudi tuambuluisha bantu bua kumvua mibelu ya mu Bible ne kuyitumikila, badi bumvua bua tshinyi badi ne muoyo ne nunku badi bapeta bukole bua kulekela bibidilu bibi. Badi bamanya malu malenga adi Bible ulaya bua matuku atshilualua. Patudi tulongesha bantu Bible, tudi tudifila mu mudimu wa mushinga mukole udi upetesha bantu bakuabu masanka a kashidi. (Yone 17:3; 1 Tim. 4:16) Imue misangu tudi mua kuikala ne mushindu wa kulua bampanda-njila bambuluishi anyi ba pa tshibidilu, wa kuya muaba udibu dijinga ne bamanyishi ba Bukalenge, anyi wa kulonga muakulu mukuabu.
7. Bua tshinyi kudifila bua kuenza mudimu ku budisuile kudi ne mushinga nangananga lelu?
7 Davidi wakamba ne: tshikondo tshikala Masiya mua kusomba mu nkuasa, batendeledi ba Nzambi bavua ne bua ‘kudifila ne disanka.’ (Mus. 110:3) Bu mudi Yehowa wendesha lukasa disangisha bantu dia ndekelu, kudi mudimu wa bungi utudi mua kudifila bua kuenza. (Yesh. 60:22) Udiku muambile Yehowa ne: ‘Ke meme eu, utume meme’ anyi? (Yesh. 6:8) Bulelela, patudi ne lungenyi lua didifila, tudi tusankisha Yehowa ne tudi tupeta masanka.