Mandamuna ku nkonko yenu

▪ Bidiku mua kuikala bimpe bua kulongolola dipanyisha dia bintu peshi bibilu kampanda bua kupeta makuta anyi kuavudija bua kuambuluisha tshisumbu anyi?

Bitendelelu bia bungi bitu bienzeja malu bu mudi: dipanyisha bintu anyi mafesto bua kupeta makuta. Nansha mudi bamue bantu mua kumona ne: badi benza malu aa bua kipatshila kalenga, kadi adi anu bu kunana mfranga bua dibanza. Bantemu ba Yehowa kabatu bapetela abu makuta mushindu eu nansha.

Tshibumba tshia Nsentedi tshibidi (Tshimungu 1879) tshiakaleja bua tshinyi tutu tubenga kunana makuta bu bitendelelu bikuabu mu mêyi aa: “Tudi tuela meji ne: YEHOWA ke udi ukuatshisha dipatuka dia ‘Tshibumba tshia Nsentedi tshia Siona,’ ne bu mudibi nunku, katuena mua kulomba dikuatshisha dia bantu anu bu dibanza tunana to. Pikala Yehowa udi wamba ne: ‘Or ne argent bionso bidi mu mikuna mbianyi,’ mubenge bua kufila mfranga idi ikengedibua, netumone ne: tshikondo tshia kulekela kutshipatula tshiakumbanyi.”

Tudi tutungunuka ne kulonda tshidi Bible wamba etshi: ‘Nunku muntu ne muntu afile bintu bu muakadisunguileye mu mutshima wende; kafidi ne kanyinganyinga, anyi bu muenzeja ku bukole; bualu bua Nzambi udi musue muena kupa udi ufila ne disanka.’ (2 Kol. 9:7) Batu bateka tushete tua mapa mu Nzubu wa Bukalenge bua bantu badi basue, belamu makuta ku budisuile. (2 Bak. 12:9) Katuena tulomba mfranga bu dibanza tunana; anyi katuena tuyifila ne lungenyi lua batupeshe petu tshintu to.