Mpungilu wa Distrike wa Bantemu ba Yehowa wa “Londa Kristo” bua 2007
1, 2. (a) Mose uvua muambile bena Isalele tshinyi bua tshilumbu tshia didisangisha pamue? (b) Mmalu kayi atudi ne bua kulongolola kubangila ku mpindieu?
1 Mose wakambila bena Isalele bonso ne benyi bavua basombele mu Isalele bua kudisangisha bidimu muanda mutekete bionso bua kubabadilabu Mikenji. Bivua bua tshinyi? ‘Bua buonso buabu bumvue, bayile lungenyi.’ (Dut. 31:10-12) Yehowa uvua mumone ne: bivua bikengela bantu bende bikale badisangisha mu tshisumbu tshinene. Mu ngondo mikese emu, Bantemu ba Yehowa nebadisangishe kabidi bua matuku asatu mu Mpungilu wa Distrike wa “Londa Kristo.”
2 Ukadi mubangishe kudilongolola anyi? Udi ne bua kulomba mfumuebe wa mudimu dikisha anyi? Udiku mua kuambuluisha bantu baudi ulonga nabu Bible anyi balela bebe badi kabayi Bantemu bua kubuela pabu mu mpungilu eu anyi? Kudiku bantu bakuabu mu tshisumbu tshienu badi dijinga ne diambuluisha bua kubuelabu mu mpungilu anyi? Udi mulongolole bua kubuela mu mpungilu wa muaba mushilangane ne udibu batume tshisumbu tshienu anyi? Newikale dijinga ne muaba wa kulala anyi? Malu adi alonda aa neakuambuluishe bua udilongolole bimpe.
3. (a) Yeshaya 25:6 udi ukumbana lelu mushindu kayi? (b) Ntshinyi tshitudi bamone bua bantu badi babuela mu mpungilu mu Ditanu? Ntshinyi tshidi muntu yonso mua kuenza?
3 Buela matuku onso asatu: Yehowa udi ulongesha Bantemu bende bikole bienze anu bu udi ubapesha biakudia bia bungi. (Yesh. 25:6) Mu biakudia ebi mudi malongesha atudi tupeta mu mpungilu yetu itutu tuenza tshidimu tshionso. Tudi bamone ne: bantu batu babuela mu mpungilu mu Ditanu batu bakese menemene kupita ba mu Disambombo ne mu Dia lumingu. Udienzeje bua wikaleku matuku onso asatu a mpungilu udi utukolesha udi bulongolodi bua Yehowa butulongoluele! Wewe ne bua kulomba dikisha ku mudimu, usambile bua bualu ebu. Pashishe, ‘ukoleshe mutshima’ bua kuyukila ne mfumuebe wa mudimu diakamue padibu bamanyisha dituku dia mpungilu. (1 Tes. 2:2; Neh. 2:4, 5) Mbimpe kumumvuija ne: mpungilu itudi tuenza tshidimu tshionso idi munkantshi mua malu audi wenza bua kutendelela Nzambi. Wewe mumulombe kumpala kua dîba, bidi mua kuikala bipepele bua kuakajaye malu bua kukupeshaye dikisha.
4. Mmunyi mutudi mua kulongolola balongi betu ba Bible ne balela betu badi kabayi Bantemu bua kubuelabu mu mpungilu?
4 Longolola balongi bebe ba Bible ne balela bebe: Nebikale disanka dia bungi bu wewe ne bua kubuela mu mpungilu pamue ne bantu baudi ulonga nabu Bible bua badimuene pabu dinanga dia bena Kristo mu “disangisha dinene”! (Mus. 22:25) Ubamanyishe kumpala kua dîba bua badilongolole bua kuluabu. Ubambile bua tshinyi wewe utu musue kubuela mu mpungilu. Udi mua kuleja bantu baudi ulonga nabu Bible bande yetu ya video idi ne bindidimbi bia mpungilu yetu ya kale, nangananga wa Unis grâce à l’enseignement divin bua kubumvuija tshikala mua kuenzekamu. Umanyishe kabidi balela bebe badi kabayi Bantemu bua mpungilu. Imue misangu badi mua kudilongolola bua kumona drama anyi bua kubuela mu mpungilu nansha dituku dimue.
5. Mmunyi mutudi mua kuleja lungenyi lua kuambuluishangana ludi mu 1 Timote 6:18?
5 Ambuluisha bena Kristo nebe: Mupostolo Paulo wakabela bena Kristo bavua babanji bua ‘benzele bakuabu bimpe, bikale ne bubanji bua bienzedi bimpe; badilongolole bua kupangana bintu; basue kuikala ne bakuabu luse.’ (1 Tim. 6:17, 18) Tudi mua kuleja lungenyi lua kupeshangana bintu luvua Paulo ukankamija patudi tutangila nsombelu wa bakulakaje ne babedi, bantu badi mu mudimu wa ku dîba ne ku dîba, baledi badi kabayi ne bena dibaka nabu, ne pamuapa bantu bakuabu mu tshisumbu badi dijinga ne diambuluisha bua kubuela mu mpungilu. Bujitu bua kukumbaja majinga a bantu aba budi kumpala pa makaya a balela babu, kadi bakulu ne bantu bakuabu badi mua kuikala ne busunguluji ne kubambuluisha padibi bikengela.—Gal. 6:10; 1 Tim. 5:4.
6. Tudi ne bua kubuela mu mpungilu udibu batutume bua tshinyi?
6 Kubuela mu mpungilu mukuabu: Bua kumonabu mua kulongolola bungi bukumbane bua miaba ya kusomba, bua mikanda, bua miaba ya kulala ne malu makuabu, tudi tukulomba bua ubuele mu mpungilu udibu batume tshisumbu tshienu. Kadi bikala malu kampanda akupangisha bua kubuela mu mpungilu udibu batume tshisumbu tshienu, udi mua kubuela mu mpungilu mukuabu.
7-9. (a) Mmalu kayi a mushinga atudi ne bua kuvuluka patudi dijinga ne muaba wa kulala, ne mbua tshinyi? (b) Mmalu kayi adibu ne bua kulongolola bikalabu mua kuladika bana betu mu Nzubu wa Bukalenge? (c) Ngamue malu kayi atudi ne bua kukonkonona bua tuetu kumona mua kubuela mu mpungilu wa distrike? (Tangila kazubu kadi mu dibeji 4.)
7 Miaba ya kulala: Pa tshibidilu, miaba ya kulala mu tshimenga tshidi mpungilu wenzekela itu ku nzubu ya bena Kristo netu, ku Nzubu ya Bukalenge anyi ya balela betu. Kunyima kua Tshisangilu tshia Mudimu tshinuakonkonona tshisakidila etshi, nebalamike dibeji didi dileja miaba yonso yenzekela mpungilu ku tshibasa tshia mamanyisha. Tudi tunulomba bua kuela meji bimpe ne kusambila bua kusungula muaba unuikala ne bua kubuela mu mpungilu wa 2007.
8 Tudi tulomba sekretere wa tshisumbu afunde mêna a bamanyishi bonso badi basue kusombela kua bena Kristo nabu anyi ku Nzubu wa Bukalenge bua kuatumina Tshibambalu tshia miaba ya kulala tshia muaba wenzekela mpungilu kumpala kua dîba. Aleje bikala mumanyishi udi muntu mulume anyi muntu mukaji, bidimu biende ne bena mu dîku diende badiye nabu. Kuenza nunku nekupeteshe bena mu Tshibambalu tshia miaba ya kulala dîba dia kulongoluela bantu bonso miaba bimpe. Komite wa Mudimu wa Tshisumbu neakonkonone bangabanga ngikadilu ya bamanyishi bonso badi balomba kaba ka kulala kumpala kua kutuminabu bena mu tshibambalu etshi mabeji adi ne mêna abu. Bobu bamane kutupesha muaba wa kulala, ki mbimpe bua tuetu kushintulula kabidi muaba bua kuya kusombela kua muanetu mukuabu anyi kua mulunda wetu nansha. Kuenza nanku kudi mua kutatshisha bena mu Tshibambalu tshia miaba ya kulala. Kadi bikala muntu ujinga kusombela kua mulela wende udi kayi Ntemu mu tshikondo tshia mpungilu, kêna ne bua kufila dîna diende to.
9 Tudi tunuleja mu tshisakidila emu malu adi akengela kulonda bua kuladika bantu ku Nzubu wa Bukalenge. Komite wa Mpungilu wa Distrike neateke mukulu kampanda bua kutangila muenzeka malu aa. Neikale ne muntu wamuambuluisha, nangananga mukulu nende anyi musadidi wa mudimu udi mukumbane. Nebakosolole Nzubu wa Bukalenge mu bitupa bibidi. Tshitupa tshimue netshikale tshia bana betu ba bakaji ne bana babu batekete ne bansongakaji. Tshitupa tshikuabu netshikale tshia bana betu ba balume ne bansongalume. Nzubu wa Bukalenge neikale anu bua kulala. Mu munya padi bantu bonso mu mpungilu, bua bobu kubenga kuiba nudi mua kulongolola bua bantu bikale bashintakanangana bua kulama bintu ku Nzubu wa Bukalenge. Nusungule bana betu ba balume ba ngikadilu mimpe bua kuenzabu mudimu eu. Kanuena ne bua kulambila munda mua Nzubu wa Bukalenge nansha. Nudi mua kuasa katanda kakese mu lupangu bua kulambilamu anu mu matuku a mpungilu au. Padi mpungilu ujika, nupule katanda aka. Mbimpe Nzubu wa Bukalenge ne lupangu ludiye bikale ne mankenda ne bulongame. Nuenze bua tshintu nansha tshimue katshinyanguki to. Bantu balala mu Nzubu wa Bukalenge benze muabu muonso bua kulejangana ngikadilu ya buena-Kristo bulelela ne bayileje bena mutumba kabidi.—1 Kol. 10:31.
10, 11. (a) Mmalu kayi atubu batulongoluela kumpala kua tuetu kufika muaba udi mpungilu wenzekela? (b) Mmunyi mutudi mua kuleja dianyisha dietu bua midimu yonso idibu benze bua diakalenga dietu? (Bala Ebelu 13:17.)
10 Tutumikile malu adibu balongolole: Patutu tufika muaba udi mpungilu wenzekela, tutu tumona ne: mbenze mudimu wa bungi bua kutuakidila. Bana betu ba balume badi bakidilangana batu batuela muoyo, batupesha mabeji a programe ne batuleja miaba ya kusomba. Bana betu mbasukule muaba eu ne mbaulongolole bimpe. Mbenze kabidi mudimu mukole bua kulongolola ndongamu, miaba ya kusombela ne malu makuabu a bungi.
11 Bua mpungilu yonso, bantu ba bungi batu benza mudimu munkatshi mua ngondo ya bungi bua kulongolola malu bimpe, ne bena mu mêku abu batu babambuluisha padibu babashila dîba dia kulongolola malu a mushinga aa. Katuenaku ne dianyisha bua malu onso adibu benze bua diakalenga dietu anyi? Netuleje dianyisha dietu patudi tulonda mibelu idi mu tshiena-bualu etshi ne mikuabu itudi mua kupeta kumpala kua mpungilu wetu. (Eb. 13:17) Padi bantu bonso balonda mibelu eyi ne muoyo wabu mujima, malu ‘neenzeke bilengele ne nealondangane biakane.’—1 Kol. 14:40.
12. (a) Bua tshinyi masangisha a batendeledi ba Nzambi adi ne mushinga mu matuku etu aa? (b) Ntshinyi tshidi yonso wa kutudi mua kuenza?
12 Bu mutudi ‘tumona dituku dia Mukalenge disemena pabuipi,’ nunku masangisha a bantu ba Nzambi adi alua ne mushinga wa bungi. (Eb. 10:25) Mu mpungilu yetu ya bena Kristo, kasumbu ka mupika wa lulamatu ne wa budimu kadi katupesha malu adi atuambuluisha bua ‘kutumikila mêyi onso’ adi Yehowa musue bua tulonde. (Dut. 31:12) Tuadija kudilongolola ku mpindieu bua kubuela mu Mpungilu wa Distrike wa “Londa Kristo,” matuku onso asatu; nunku neupete dikuatshisha ku malongesha onso ne ku malanda mimpe a bana betu!
[Kazubu mu dibeji 3]
Mêba
Ditanu ne Disambombo
9:20 dinda - 5:05 dilolo
Dia lumingu
9:30 dinda - 4:10 dilolo
[Kazubu mu dibeji 4]
Malu a kutangila bua kubuela mu mpungilu wa distrike
1. Biwikala ne bua kuenza luendu lule bua kubuela mu mpungilu, tuadija kulama mfranga ya kufuta njila ne ya biakudia buebe wewe ne bua bena dîku diebe dijima.
2. Kupu muoyo bua kuya ne mapa ebe a ku budisuile bua kukuatshisha nawu malu a mpungilu. Bible udi wamba ne: ‘Muntu kamueneki ku mêsu kua Yehowa bianza bitupu’ kadi ‘atumbishe Yehowa ne biuma biende.’—Dut. 16:16; Nsu. 3:9.
3. Mu mpungilu, tudi tutumbisha dîna dia Yehowa ku bienzedi bietu bimpe ne ku mankenda ne mvuadilu wetu muimpe.—1 Kol. 10:31.
4. Udiakaje bua kueleshangana diboko ne bakididianganyi ne bana betu bakuabu bonso badi ne bujitu bua kufila bulongame. Udi mua kukuatshila anu bena mu dîku dienu anyi bantu banudi bende nabu miaba ya kusomba.
5. Bua wewe kuteleja bimpe tshitupa tshia mu mapingaja, udie bintu bikese padi tshitupa tshia mu dinda tshijika. Biakudia bia bungi anyi bidi mua kukukutshisha bikole bidi mua kukuladika tulu.—Luka 8:18.
6. Mankenda adi atumbisha Yehowa. Ku ndekelu kua tshitupa tshionso tshia mpungilu, muntu yonso udi mua kuangulaku mabeji ne bintu bikuabu bua kubiela muaba udi mulongolola bua kubimansha bua kushiya muaba wa mpungilu ne mankenda.—1 Pet. 1:15, 16.